Etop eke First Presidency, eke Ofiong Inang ke isua 2014
Anchor Emi Etimde Ewuk
Itimke ibighi Ami mma nyene ufang ndisanga ke akamba ubom nsungikang ke akwa mben esuk eke Alaska, USA. Adanga ini awat nsungikang ebengede idem man ubom nsungikang adang esiere ke ekpri mben akpa mmong, enye enengere ese ebiet ye ndaha, oruk nte oto ye ekebe mmong, ndaha utungo mmong, ye anyan ebiet mbemiso ekesim idiok mmong. Ke esede oro okure, enye ama osuhore anchor man otodo ubom nsungikang ada ofon onyung osongo ada, ono mme andidu ke esit ufang ndidu ke mkpaidem kabanga sanga-sanga uyai ke nkpo emi Abasi okobotde.
Nte Ami nkesede mben akpa mmong, ami mma ntongo ndikut nte ubom nsungikang enyengede kini ekpri ofum ye ubara ofum mmong ofumede. Nte ekedide, ubom nsungikang ama osongo owuho onyung ada ke ekara emi ekenimde tiene ye idaha anyan uruk anchor ye odudu eke anchor oro.
Awat nsungikang ikenimke anchor ke esit ubom nsungikang, man osuhore kini oyobio mmong ekperede ndidi kpot. Ihn-ihn, enye okowuk anchor ono ubom nsungikang oro nte nkpo ikpan man edikpeme nsungikang oro ndisanga nkoduk idiok mmong ye ndisanga nkesim mben inyang kini mme andidu ke esit ye andiwat enyenede ifure.
Nte Ami nsuk nkerede mbanga ndise emi, ami ndikut nte kemi midige ufang ono mbuk nke, akananam Ami nkewatke ubom ofum.
Ntak emi Nnyin Iyomde Anchors.
Ufon anchor edi ndimum ubom nsungikang nkama nnyung nnim enye ke eti ebiet ye ndikpeme ubom nsungikang kini idiok oyobio mmong. Nte ededi, man inyene mme akpan ufon emi, ndinyene anchor kpot ikemke. Anchor oro enyene ndisong idem, ada ke idemesit, ndien eda enam utom ke eti ini ye ke eti ebiet.
Mme owo kiet kiet ye ufok idung eyom mme anchor nko.
Idomo ekeme ndidi nte akamba oyobio man amia nnyin osio okpong usung onyung anwana ndimia nnyin ndian ke itiat. Edi ke ubak ini nnyin nko idu ke afanikong ke ini emi kpukpru nkpo etiede nte ofon ama — kini ofum ememde ye mmong eferede. Ke akpaniko, nnyin imekeme ndidu ke akamba afanikong ini emi nnyin ifemede ndien isang efere tutu nnyin ikemeke ndikut afanikong oro.
Iko Abasi Edi Anchor Nnyin.
Mme anchors enyene ndidi eti uduot, osongidem, ndien etim ekama man ofon ke utom kini eyomde. Ke ndidian do, enyene ndidian mmo ke ukwak emi edikemede ndiyo ye udobi mbiomo eke edisimde enye.
Ke ntre, iko Abasi eke Jesus Christ edi oruk anchor oro. Edi Andibot ofuri kpukpru ererimbot akanam emi ono eti ntak onyung enim man anam uboho ye ndausung ono ndito Esie.
Iko Abasi edi nso, ke akpa ifet, ke miboghoke uduak Abasi man afak ndito Esie onyung afiak ad ammo edisim iso Esie?
Nte ofiokde ete ke edi uduot ofuri nkpo ndifum, nnyin inyene ndisongo nwuk mme anchors nnyin ke akwa itiat akpaniko eke iko Abasi. Nnyin inyeneke ndisuhore anchors nnyin nsin ke ndaha ntangidem ye nditutuk se inimde ke akpaniko kpot.
Ofiong emi nnyin imenyene ufang ndikop nto mme isungutom Abasi oto ke akwa mboho eke ufok Abasi. Mme iko mmo, diana ye nwed Abasi ye ntim eke Spirit, ono ukpeme ye akwa itiat nsongonda eke ufon nsinsi ye ukpebnkpo emi nnyin ikemede ndibop mme anchors nnyin man otodo nnyin isongo ida inyung imum ikama ke ufot enwan ye idomo eke uwem.
Akani prophet eset Helaman ekekpeb ete, “Ke edi ke itiat eke Andifak nnyin, emi edide Christ Eyen Abasi, ke nnyin inyene ndibop nsongo nda nnyin; man otodo kini andidiok edidongde idiok akwa ofum esie, ntre mme eto eduat esie ke esit idio, ntre, kini ofuri ofum itiat ye mkposong oyobio esie edimiade mbufo, oro idinyeneke odudu ndomo kiet ndiduri mbufo nkesin ke obube ntuanga ye unana utit ebiet ufen, koro ke ntak itiat emi ekebopde mbufo, emi edide itiat akpaniko, itiat idak isong emi mme owo ekebopde edori eke mikemeke ndiduo” Helaman 5:12 .
Ufon Ndiwuk mme Anchors Osongo
Uwem isong enyene usung ndidomo mme anchors nnyin ye ndinam man nnyin ifeme. Okposukedi, ke itimde iwuk mme anchors nnyin ke itiat eke Andifak nnyin, mmo eyesongo eda — odudu ofum ekpenwana se anwana, odudu oto ye ekebe mmong, ye eke ndaha ofum mmong.
Ke ntre, owo ibopke ubom nsungikang ete ada ke ebiet kiet ke akpa mmong edi ebop man esuhore anchor onyung awat ke mme akpa inyang ibom eke uwem. Oro edi mbuk nke ono ini efen.
Idahaemi, Ami mmebo ndongesit ke ndidiongo ete anchor eke iko Abasi ye itiat eke Andifak nnyin eyemum nnyin akama onyung ekpeme nnyin.
Oruk anchor oro eyekpeme nnyin mbak nnyin ididuo iduk afanikong ye ndiok iso. Oruk anchor oro eyeno nnyin akwa ufang nditabi anana mbiet uyai eke nsinsi ye nkongkong mbana nkpo mbre eke uwem
Uwem isong eye onyung ofon ndidu. Ofum, oyobio, ye ubara ofum mmong ekeme ndidomo nnyin man ifeme iduk ke mme afanikong eke ikutde ye enye eke nnyin mikutke, edi etop iko Abasi ye edisana odudu esie eyekpeme nnyin ke mkpafaha usung afiak ada aka ke ebiet nduok odudu eke Ete nnyin ke Enyong.
Yak nnyin, ndien, idige ndikpang utong kpot nno mme iko eke akwa mboho Ofiong Inang kpot edi ida mme etop mmo emi nte anchor emi itimde iwuk ino uwem nnyin k’usen k’usen.
Yak Abasi odiong onyung ekpeme nnyin ke ata sanga-sanga ye akpan utom emi!
© 2014 otode Intellectual Reserve, Inc. Emenim kpukpru unen. Ekeming ke USA. Enyimme eming ke Iko Mbakara: 6/13. Enyimme Ndikabare: 6/13. Edikabare eke First Presidency Message, April 2014. Efik. 10864 553
Ukpeb nkpo eketode Etop Emi
Kere banga ndinneme ufon mme anchors ke nditiene ufokidung eke Lehi nte ekewatde eka ke isong unwongo (kese Akpa Nwed Nephi 18 . Mbufo emekeme ndisio nwut Akpa Nwed Nephi 18:11–15 nte ke ini emi ekebopde Nephi enim, ke Liahona ama etre ndinam utom, ndien ke ndutime oyobio mmong okonuk ubom nsungikang nte amade. Nso idiok idaha esisim nnyin kini nnyin mitimke isongo ida ke iko Abasi? Mbufo ako emekeme ndisio nwut Akpa Nwed Nephi – 22 enyung eneme ebanga nte nnyin ikpekemede ndikut uboho ke ndifiak ntiene Andinyanga.