Pweng sin Prestuhnsi Se Met, Eprel 2014
Sie Kawuck Akwucki Fokoko
Tiac pacl paht somlah oasr pacl wowo luhk in kalkal ke oak na luhlahp soko sisken pe acn askuhlacna fin acn Alaska, USA. Ke kacptin el ahkolah nuh ke monglac luhn oak soko ah ke fong uh wekof nwacsnwacs uh, el akihlen ke lahlmwetmwet acn ac ma uh ke wekof ingacn, oacna ohiyac luhn ahlong ah, loaliyen kof ah, ac lusacn ma sensenkihnyuck uh. Ke puhlakihn wo, el tolyac kawuck uh oak soko ah in muh oan ac kawucki wo, ac lwelah pacl wowo nuh sin mwet fin oak soko an elos in muh kuh in liye wo na pwacye ke kahtoiyacn ma oreklac sin God.
Ke nga ngwet nuh ke weacn ah, nga tuh akihlen muh oak soko ah pahtpaht apkuhran in tiac akihlenyuck ke eng na srihsrihk ah ac acsr ye kof ah. Ne ohinge, oak uh oan na kuh ke kihtin raun ma ahkuhtweyucki ke lusen sucl in kawuck ac fokokoiyacn kawuck an.
Kacptin el tiac fihliyac kawuck ah in oan oak soko ah, ahkolah in akwucki muhkwena fin pahkah na luhlahp se tuhkuh. Moh, el tuh akiyac oak soko ah in oacna ohiyac se in ahkolah in karihngihn oak ah in tiac som nuh ke kof sensen kuh pahtpaht kahkahsrihk nuh acn sahyac in muh mwet fin oak ah kuh in puhla wo.
Ke nga tuh nuhnkuh ke ma inge, nga nuhnkuh lah fin ma inge tiac pacl wowo se nuh ke sie puhpuhlyuck, nga soenna wi wucn soko oaksohk.
Efuh Kuht Enenuh Kawuck uh
Srihpac se ke sie kawuck pa in karihngihn soko oak in sef ac wo ke acn kenaiyuck kuh in kahsruh sruok oak soko ke pacl eng koluk. Tuhsruhktuh, in ahkfalye srihpac enenweyuck inge, orekmakihn sie kawuck tiac fal. Kawuck sac enenuh in kwekwe, luhlahlfongiyuck, ac orekmakihnyuck wo ke pacl ac acn fal.
Kais sie ac sucu uh enenuh pac kawuck uh.
Pacl upac uh kuh in tuhkuh oacna sie pahkah upac in uk kuhtlac nuh sahyac ac ahkkolukye in tolkuhtyang nuh ke yot uh. Tuhsruhktuh kuhtuh pacl uh kuht oacyacpac oasr fin acn sensen finne ma nuh kwewa luhman wo—eng uh muhlahlah ac meoa uh fwel. Pwacye na, kuht kuh in oasr fin acn sensen yohk emet ke kuht pahtpaht ac mukwikwi uh arulacna srihk apkuhran in tiac liyeyuck.
Wosasuc uh Pa Kawuck Lasr
Kawuck uh enenuh in kwekwe, fokoko, ac karihngihnyuck wo in ahkolah nuh ke pacl enenweyuck. Oacyacpac, ac enenuh in kuhpahsrlah nuh ke pwelucng se ma kuh in us toasr luhn ma lainyac.
Pwacye na, wosasuc luhn Jisus Kraist pa kain kawuck se. Ac ahkoeyucklac sel Mwet Orwaclah luhn kuhsrao ke srihpac muhtahl se ac oreklac in sang karihngihnyuck ac kolyuck nuh sin tuhlihk Nahtuhl.
Meac wosasuc uh, finne tukun ma nuh kwewa, sahyacn plwacn luhn God in molwelah tuhlihk Nahtuhl ac usaclos fohlohklac nuh ye Muhtahl?
In etuh lah ohiyac luhn ma nuh kwewa uh in pahtpaht, kuht enenuh in akiyac fokoko kawuck lasr fin yot kwekwe ke ma pwacye luhn wosasuc. Elos tiac kuh in kahkahsrihk fihliyucki fin puhk luhn inse fuhlwact kuh apkuhran in sun acn lucng ke kena lasr uh.
Mahlwem se inge oasr pacl wowo lasr in lohng sin mwet kuhlwacnsap luhn God ke toeni luhlahp luhn Alu uh. Kahs lalos, weacng ma suhmuhslah uh ac pihrihkyuck luhn Nguhn, use pwelucng kwekwe na kuh ac fokoko ke ip sacohk ac ip yohk ma pahtpaht ma kuht kuh in sruhmasr kawuck lasr nuh kac in muh kuht kuh in muhta na fokoko ke luhlahlfongi ac kuh inmahsrlon ma upac ac ma elyah luhn moul uh.
Mwet pahluh Helaman ke pacl yoh sac luti lah kuht enenuh in esam in muhsahi pwelucng lasr uh fin yot luhn Mwet Molwelah, suc Christ, Wen nuhtin God. Na, ke pacl setuhn lac suhpwacma eng upac lal uh---osra in fakfuck soko nahtuhl ke for luhn eng uh---ac ke af srihngsrihng ac eng upac lal srihngihl kuht uh, oruh se inge fah kuh kac nuh sesr in amackihnkuhti nuh ke ongaia upac ac koluk nuh se wacngihn sahflahiyac, ke srihpen yot se kuht muhsah fac uh, suc ma pa pwelucng pwacye se---pwelucng se ma kuht fin muhsah fac kuht ac tiac puhtatlac (liye Helaman 5:12).
Srihpac Sacohk ke Kawucki Wo
Moul uh oasr na ohiyac kac in srihfe kawuck lasr ac srihke kuht in pahtpaht. Ne ohinge, kawuck lasr fin akwucki wo fin yot luhn Mwet Molwelah lasr, elos ac fah muhta na—finne fuhkah upaciyen eng uh, kuh luhn ahlong ah, kuh fuhlwactiyacn noa uh.
Pwacye na, soko oak tiacna oreklac in kawucki oan ke acn in oai luhn oak uh tuh in sruhkwack kawuck uh ac kalkal ke meoa luhn moul uh. Tuh pa ingacn sie puhpuhlyuck nuh ke sie pacl.
Na ingena, nga eis ahkkweyeyuck in etuh lah kawuck luhn wosasuc ac yot luhn Mwet in Molwelah se lasr fah karihngihnkuhtyang in kuh ac sef.
Kain kawuck inge fah karihngihnkuhtyang in tiac pahtpaht nuh ke ma sensen kuh ma koluk. Ac fah use nuh sesr pacl wolacna in engankihn kahtoiyacn ma siena liki nuh kwewa luhn ma eklac ac askuhlacna luhn moul uh.
Moul uh kahto ac fal in moulkihnyuck. Eng, pahkah, ac acsr fokoko uh kuh in srihke kuht in pahtpaht nuh acn sensen liyeyuck kuh tiacna liyeyuck, tuh pweng luhn wosasuc ac kuh muhtahl la fah karihngihnkuhtyang in muhta na ke inkacnek lasr fohlohk nuh ke acn in oai luhn oak sef okwacn Pahpah Tuhmasr Inkuhsrao.
Lwelah kuht, ohinge, in tiac lohng muhkwena nuh ke sramsram ke toeni luhlahp ke Eprel tuh oacyacpac orekmakihn pweng lalos in oacna sie kawuck akwucki fokoko in moul lasr lwen nuh kwewa.
Lwelah God El in ahkinsewowoye ac kol kuht ke srihpac enenweyuck yohk srihpac inge!
© 2014 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn First Presidency Message, April 2014. Kosraean. 10864 868
Luti ke Pweng Se Inge
Nuhnkuh in asramsrami ke yohk srihpaciyen kawuck uh nuh ke ohiyac ke kalkal luhn sucu lal Lehi nuh ke acn olweyucklac (liye 1 Nephi 18). Kom ac kuh in ahkkahlwemye ke 1 Nephi 18:11–15, pacl se ma Nephi el kapriyucki, Liahona tilac orekma, ac oak ah usyuck sin pahkah upac uh. Ma sikyak fuhkah kuht ac sun ke kuht tiac kawucki wo ke wosasuc uh? Kom ac kuh pac in ahkkahlwemye ke 1 Nephi 18:21–22 ac sramsramkihn ohiyac kuht kuh in konwacack acn in wihklac in forwacng nuh sin Mwet Lahngo.