2014
Ko e ʻAho ʻe Fitu kimuʻa He Toetuʻú
ʻEpeleli 2014

Ko Hotau Ngaahi ʻApí, Hotau Ngaahi Fāmilí

Ko e ʻAho ʻe Fitu kimuʻa He Toetuʻú

Te ke lava ke ako mo ho fāmilí fekauʻaki mo e meʻa naʻe fai ʻe Sīsū lolotonga ʻEne kei ʻi he māmaní. Kamata ʻi he Sāpate kimuʻa he Toetuʻú. ʻI he ʻaho kotoa, lau e folofolá, fai ʻa e ʻekitivitií, pe hivaʻi ha hiva (pe ko ha foʻi hiva ʻe taha ʻi he tefito ko iá). Hili iá pea kosi pea fakapipiki ʻi ha ngeʻesi puha ʻa e fakatātā ʻo Sīsū ʻoku felāveʻi pea mo e folofola ko iá. ʻI he kakato ko ia ʻo e puhá ʻi hono fakafonú, ʻe vave mai leva e Sāpate Toetuʻú!

ʻAho 1

Naʻe fekauʻi mai ʻe he Tamai Hēvaní Hono ʻAló, ko Sīsū Kalaisi, ke ʻaloʻi mai ʻi he māmaní.

  • Luke 2:4–7

  • “Naʻá Ne Fekau Hono ʻAló” (Tohi Hiva ʻa e Fānaú, 20).

ʻAho 2

Naʻe hoko pē ʻa Sīsū ko ha fānau. Te tau lava pē ʻo hangē ko Iá ʻaki ʻetau fai leleí mo angaʻofá.

  • Luke 2:40, 52

  • “Ko Sīsuú Naʻá Ne Hangē Ha kiʻi Tamasiʻí” (Tohi Hiva ʻA e Fānaú, 34).

ʻAho 3

Naʻe tauhi kotoa pē ʻe Sīsū ʻa e ngaahi fekau ʻa e Tamai Hēvaní, kau ai ʻa e fekau ke papitaisó.

  • Mātiu 3:13–17

  • “When Jesus Christ Was Baptized” (Childrenʻs Songbook, 102).

ʻAho 4

Naʻe fakahoko ʻe Sīsū ha ngaahi mana lahi, ʻo hangē ko hono fakamoʻui e kakai naʻe puké, ko hono tokoniʻi ʻa e kakai kuí ke nau toe ʻā, pea taʻofiʻa e matangí.

  • Maʻake 4:36–39

  • “Talamai ʻa e Ngaahi Talanoa ʻo Sīsū” (Tohi Hiva ʻa e Fānaú, 36).

ʻAho 5

ʻI he ʻOhomohe Fakaʻosí, naʻe kole ʻe Sīsū ki Heʻene kau ākongá ke nau maʻu ʻa e sākalamēnití ko ha founga ke manatu ai kiate Ia. ʻI he taimi ʻoku tau maʻu ai ʻa e sākalamēnití he uike kotoa pē te tau lava ʻo manatuʻi ʻa e Fakamoʻuí.

  • Luke 22:19–20

  • Talanoa ki hoʻo mātuʻá ʻo kau ki ha meʻa te ke lava ʻo fai ke tokoniʻi ai koe ke ke fakakaukau kia Sīsū lolotonga e sākalamēniti ʻo e Sāpate ko ʻení.

ʻAho 6

Koeʻuhí ʻoku ʻofa ʻa e Tamai Hēvaní mo Sīsū ʻiate kitautolu, naʻe haʻu ʻa Sīsū ki he māmaní ke fua ʻetau ngaahi angahalá koeʻuhi ke fakamolemoleʻi kitautolu pea tau foki ki he Tamai Hēvaní.

  • Luke 22:41–44

  • Ko e hā ha meʻa ʻe lava ke ke fai ʻi he ʻahó ni ke fakahaaʻi ai kia Sīsū ʻokú ke fakamālō koeʻuhí ko ʻEne feilaulaú?

ʻAho 7

Naʻe toetuʻu ʻa Sīsū, hili haʻane ʻi he fonualotó ʻi he ʻaho ʻe tolu. Koeʻuhí naʻá Ne toetuʻu, te tau lava ʻo toetuʻu foki.