Pōpoaki ʻa e Kau Palesitenisī ʻUluakí
Ko ha Taula Mālohi mo Fefeka
Ne ʻikai ke fuʻu fuoloa mei heni naʻá ku maʻu ʻa e faingamālie ke folau ʻi ha vaka lahi ʻi he matāfanga fakaofo ʻo ʻAlasikā, USA. Neongo naʻe teuteu ʻa e ʻeikivaká ki he nofo pō kakato ʻa e vaká ʻi ha feituʻu ne tasilo hono matāfangá, ka naʻá ne vakaiʻi fakalelei e feituʻú pea mo e ngaahi tūkungá, hangē ko e taimi mamaha mo e huʻa ʻo e tahí, loloto ʻo e vaí, pea mo e mamaʻo mei ha meʻa ʻe ala hoko ai ha fakatuʻutāmakí. ʻI he taimi naʻá ne ongoʻi fiemālie aí, naʻá ne fakaholo hifo leva e taulá ke lava ʻo malu mo tuʻumaʻu ʻa e vaká, kae lava ʻa e kau pāsesé ʻo maʻu ha faingamālie ke nau matamataleleiʻia ʻi he fakaʻofoʻofa makehe ʻo e ngaahi fakatupu ʻa e ʻOtuá.
ʻI heʻeku vakai ki he matāfangá, ne u fakatokangaʻi e kamata ke tēkina ʻa e vaká ia ʻi he kiʻi havilivili ne ʻasí mo e ʻau ʻa e tahí. Ka neongo ia, naʻe tētē pē vaká ia pea ʻikai toe mavahe mei he foʻi feituʻu naʻe ngata mei ai e maeá mo e mālohi ʻo e taulá.
Naʻe ʻikai tuku pē ʻe he ʻeikivaká ia e taulá he loto vaká ke toki tukuhifo pē kapau ʻe ofi mai ha matangi. ʻIkai, naʻá ne lī e taula ʻo e vaká ke fakaʻehiʻehi pē mo maluʻi e vaká mei haʻane tēkina atu ki ha potu tahi ʻoku ʻikai malu pe mei haʻane tēkina ʻo hake ʻi ha hakau, kae kei ongoʻi malu pē ʻa e kau pāsesé mo e kau ngāue ʻo e vaká.
ʻI heʻeku fakakaukau ki he meʻa ko ʻení, naʻe haʻu ki heʻeku fakakaukaú kapau ʻoku ʻikai ko ha faingamālie ʻeni ki ha talanoa fakatātā, ta kuo teʻeki ai ke u pailate ʻi ha vakapuna.
Ko e hā ʻoku Tau Fie Maʻu ai Ha Taulá
Ko e taumuʻa ʻo e taulá ke ne tauhi maʻu mo malu ha vaka ʻi ha feituʻu pau pe ko ʻene tokoni ke mapuleʻi e vaká lolotonga ha matangi kovi. Neongo ia, ke aʻusia e ngaahi taumuʻa mahuʻinga ko ʻení, ʻoku ʻikai feʻunga ʻa e taulá pē. Kuo pau ke fefeka ʻa e taulá, falalaʻanga, pea tonu hono fakaʻaongaʻí ʻi he taimi mo e feituʻu totonu.
ʻOku fie maʻu foki ʻe he fakafoʻituitui mo e ngaahi fāmilí ha taula.
ʻE lava ke hoko mai ʻa e ngaahi faingataʻá ko ha matangi mālohi ke ne ofeʻi kitautolu mei he hala totonú mo ne fakamanamanaʻi ke tekeʻi kitautolu ki he ʻuluʻulú. Ka ko e taimi ʻe niʻihi ʻoku tau ʻi ha tuʻunga fakatuʻutāmaki neongo ʻoku ʻasi malu ʻa e meʻa kotoa—pea malū ʻa e matangí mo toka ʻa e vaí. Ko hono moʻoní, ʻe lava pē ke tau ʻi he fakatuʻutāmaki taupotu tahá ʻi he taimi ʻoku tau tēkina mo ʻikai fuʻu ngaue aí, ʻo ʻikai ke tau fakatokangaʻi.
Ko e Ongoongoleleí ʻa Hotau Taulá
Ko e taulá ʻoku fie maʻu ke fefeka, mālohi, pea tokangaʻi lelei ke maau ʻi he taimi ʻoku fie maʻu aí. ʻIkai ngata aí, ʻoku fie maʻu ke ne lava ʻo matuʻuaki ʻa e mālohi ʻo e ivi ʻokú na fehangahangaí.
Ko e moʻoni, ko e ongoongolelei ʻo Sīsū Kalaisí ko ha taula. Naʻe teuteuʻi ia ʻe he Tupuʻanga ʻo e ʻunivēsí koeʻuhí ko ha taumuʻa fakalangi pea fakataumuʻa ke hoko ko ha maluʻanga mo ha fakahinohino ki Heʻene fānaú.
He ko e hā koā ʻa e ongoongoleleí, makehe mei he palani ʻa e ʻOtuá ke huhuʻi ʻa ʻEne fānaú mo fakafoki kinautolu ki Hono ʻaó?
ʻI heʻetau ʻiloʻi ko ia ko e natula ʻo e ngaahi meʻa kotoa pē ke ʻauhia, ʻoku fie maʻu ke fokotuʻu maʻu ʻetau ngaahi taulá ʻi he fakavaʻe ʻo e ngaahi moʻoni ʻo e ongoongoleleí. Kuo pau ke ʻoua naʻa tuku hifo fakamaʻamaʻa pē ia ʻi he ʻoneʻone ʻo e hīkisiá pe koloa pē ke kiʻi lave atu ki heʻetau fakamoʻoní.
ʻOku tau maʻu he māhiná ni ha faingamālie ke fanongo ki he kau tamaioʻeiki ʻa e ʻOtuá ʻi he konifelenisi lahi ʻo e Siasí. ʻOku hanga ʻe heʻenau ngaahi leá, fakataha mo e folofolá pea mo e ueʻi ʻa e Laumālié, ʻo ʻomai ha fakavaʻe mālohi ʻo e ngaahi tuʻunga ʻulungaanga mo e ngaahi tefitoʻi moʻoni taʻengata ʻe lava ke fakamaʻu ki ai ʻetau taulá ke tau lava ʻo tuʻu maʻu mo taʻeueʻia pea mo malu ʻi he uhouhonga ʻo e ngaahi faingataʻa ʻo e moʻuí.
Naʻe akoʻi mai ʻe he palōfita ko Hilamaní ʻo pehē, “ʻOku makatuʻunga ʻi he maka ʻo hotau Huhuʻí, ʻa ia ko Kalaisi ko e ʻAlo ʻo e ʻOtuá, kuo pau ke mo langa ai homo makatuʻungá; koeʻuhi ka tuku atu ʻe he tēvoló ʻa ʻene ngaahi matangi mālohí, ʻio, ʻa ʻene ngaahi ngahaú ʻi he ʻahiohio, ʻio, ka faʻaki kiate kimoua ʻa hono kotoa ʻo ʻene ʻuha maká mo ʻene fuʻu afā lahí, ʻe ʻikai maʻu ʻe ia ha mālohi kiate kimoua ke fusi hifo ʻa kimoua ki he vanu ʻo e mamahí mo e faingataʻaʻia ʻoku ʻikai hano ngataʻangá, koeʻuhí ko e maka kuo langa ai ʻa kimouá, ʻa ia ko e makatuʻunga mālohi, ʻa ia ko ha makatuʻunga kapau ʻe langa ai ʻa e tangatá ʻe ʻikai lava ke nau hinga” (Hilamani 5:12).
Ko e Mahuʻinga ʻo ha Taula Mālohí
ʻOku lahi ha ngaahi founga ʻi he moʻuí ʻokú ne siviʻi ʻetau taulá mo ʻahiʻahiʻi kitautolu ke tau tēkina. Ka neongo iá, kapau ʻoku tonu hono fokotuʻu ʻa ʻetau ngaahi taulá ʻi he maka ʻo hotau Huhuʻí, te nau tuʻu maʻu—neongo e mālohi ʻo e matangí mo e ʻau e tahí, pe ko e lalahi ʻa e kaupeaú.
Ko e moʻoni, ʻoku ʻikai ngaohi ha vaka ke tuʻu maʻu pē ʻi ha taulanga ka ʻokú ne ʻohake ʻa e taulá ʻo ne folaua e tahi ʻo e moʻuí. Ka ko ha talanoa fakatātā ia ki ha taimi kehe.
ʻI he taimi ní, ʻoku ou nonga ʻi heʻeku ʻiloʻi ko e taula ʻo e ongoongoleleí pea mo e maka ʻa hotau Huhuʻí te ne tokoniʻi kitautolu ke tau tuʻu taʻeueʻia mo malú.
ʻE hanga ʻe he taula ko iá ʻo tokoniʻi kitautolu ke ʻoua te tau tēkina atu ki he fakatuʻutāmakí mo e faingataʻá. Te ne lava ʻo ʻomai ha faingamālie ke tau fiefia ai ʻi he ngaahi fakaʻofoʻofa taʻefakatataua moʻui mohu feliliuʻaki mo fakaʻeiʻeikí ni.
ʻOku fakaʻofoʻofa mo mahuʻinga ʻa e moʻuí. ʻE lava ʻe he matangí, afaá, mo e taʻau ʻo e moʻuí ʻo tafia atu kitautolu ki he fakatuʻutāmaki ʻoku tau lava ʻo mamata pe ʻikai mamata ki aí, ka ʻe hanga ʻe he pōpoaki ʻo e ongoongoleleí mo hono mālohi fakalangí ʻo pukemaʻu kitautolu ʻi he hala ke tau foki malu hake ai ki he taulanga ū ʻo ʻetau Tamai Hēvaní.
Ko ia ai, ʻoua muʻa naʻa ngata pē ʻi heʻetau fanongo ki he ngaahi lea ʻo e konifelenisi lahi ʻo ʻEpelelí ka tau fakaʻaongaʻi ʻenau ngaahi pōpoakí ko ha taula mālohi mo fefeka ki heʻetau moʻui fakaʻahó.
ʻOfa ke tāpuekina kitautolu ʻe he ʻOtuá mo tataki kitautolu ʻi he ngāue mahuʻinga ko ʻení!
Ko e Faiako mei he Pōpoaki ko ʻEní
Fakakaukau ke aleaʻi ʻa e mahuʻinga ʻo e ngaahi taulá ʻo hangē ko ia ne hoko ʻi he fāmili ʻo Līhaí mo ʻenau folau ki he fonua ʻo e talaʻofá (vakai 1 Nīfai 18). Te ke lava ʻo fakamahinoʻi ange ʻa e 1 Nīfai 18:11–15, ko e taimi ia naʻe haʻi ai ʻa Nīfaí, ʻikai toe ngāue ʻa e Liahoná, pea naʻe ʻuli-mo-tafoe pē ʻa e vaká ʻe he ngaahi matangi mālohí. Ko e hā e ngaahi nunuʻa ʻoku tau fehangahangai mo ia ʻi he taimi ʻoku ʻikai fakamaʻu ai ʻetau taulá ʻi he ongoongoleleí? ʻE lava foki ke ke fakamahinoʻi ange ʻa e 1 Nīfai 18:21–22 pea mou aleaʻi e founga te tau lava ʻo malu ai ʻi heʻetau tafoki ki he Fakamoʻuí.