Ngaahi Fehuʻi mo e Talí
“Ko e hā ʻoku tonu ke u fai ʻi he taimi ʻoku ʻohake ai ha tefito ʻi he akó ʻoku fepaki mo e ngaahi akonaki ʻo e ongoongoleleí, hangē ko e fakatōtamá?”
ʻOku lahi ha ngaahi founga ke ke fai ai ha tali—pe ʻikai fai ha tali—ʻo fakatatau ki he tuʻunga ʻo e meʻa ʻoku hokó. ʻUluakí, fakakaukau ki ha meʻa naʻe mei hoko kapau te ke fai ha meʻa pe ʻikai lea ʻaki ha meʻa. Kapau ko hoʻo fakalongolongo ʻe tupu ai ha fakakaukau ʻa e niʻihi kehé ʻokú ke loto fiemālie ki ha meʻa ʻokú ke ʻiloʻi ʻoku hala, mahalo ʻe fie maʻu ke ke kumi ha founga faingofua ke nau ʻiloʻi ai hoʻo taʻe loto fiemālié. Kapau ʻokú ke pehē ʻoku fakatupu ʻe hoʻo ngaahi fakamatalá ha fakakikihi, te ke lava ʻo feinga ke maʻu ha taimi kehe ke fai ha ai fakamatala. Neongo ia, kapau ʻoku fefakaʻapaʻapaʻaki hoʻo kalasí pea ʻoku kole ʻe he faiakó ke nau kau mai, te ke lava ʻo lotua ha tataki fakalaumālie peá ke fakamatalaʻi leva hoʻo tui fakalotú.
Te ke lava ʻo tomuʻa teuteu kapau ʻokú ke ʻiloʻi ʻe aleaʻi ha tefito pau ʻi hoʻo kalasí. Makehe mei he folofolá mo e ngaahi malanga konifelenisi lahi fekauʻaki mo e tefitó, vakai ki he Tuʻu maʻu ʻi he Tuí, Ngaahi Tefitoʻi Moʻoni ʻo e Ongoongoleleí, pe Ki hono Fakamālohia ʻo e Toʻu Tupú. Te ke lava foki ʻo akoako ʻaki ʻa hono vahevahe ʻa e tefito ko ʻení ʻi ha efiafi fakafāmili ʻi ʻapí.ʻI he taimi ʻokú ke mateuteu aí, talanoa ki hoʻo faiakó pe ko ho kaungā-kalasí.
Founga hoʻo talí ʻoku mahuʻinga tatau mo e meʻa ʻokú ke lea ʻakí. Anga fakaʻapaʻapa pea feinga ke ʻoua naʻa fakaʻaongaʻi ha ngaahi foʻi lea ʻoku ngāue ʻaki ʻe he Siasí. ʻE ʻikai mahino ki ho kaungā-kalasí hoʻo pehē, “Naʻe akoʻi au ʻe he ʻetivaisa ʻo e Kau Finemuí ʻi hoku uōtí ʻo pehē …”
Ko e meʻa ʻoku mahuʻinga taha kiate koé ke ke ʻiloʻi ʻa e ngaahi meʻa ʻoku akoʻi ʻe he Siasí mo e ngaahi meʻa ʻoku fakahā atu ʻe he Laumālié koeʻuhí ke ʻoua ʻe kākaaʻi koe ʻe he ngaahi fehalaaki te ke fanongo pe lau ʻi hoʻo kalasí.
Manatuʻi ko Hai ʻokú Ke Fakafofongaʻí
ʻI he taimi ʻoku fehangahangai ai mo e ngaahi tūkunga ko ʻení, feinga ke ke manatuʻi ʻoku ʻikai ke maʻu ʻe he niʻihi kehé ʻa e ongo tatau ʻokú ke maʻu ʻo fekauʻaki mo e tefito ko iá. ʻOua te ke fakamālohi, kae ʻoua naʻá ke manavahē ke taukapoʻi hoʻo tuí. Manatuʻi ʻokú ke fakafofongaʻi ʻa Kalaisi.
Madeline K., taʻu 16, Uaiōmingi, USA
Anga Fakaʻapaʻapa
ʻOku ou ongoʻi ʻoku totonu ke u vahevahe ʻeku tuí ʻi ha founga fakaʻapaʻapa mo fakamatalaʻi ʻa e ʻuhinga ʻoku ou tui ai ki aí. ʻOku ou tui ʻoku ʻikai fie maʻu ke u ʻai e niʻihi kehé ke nau tui tatau mo au, ka ʻoku ou tui ʻoku totonu ke nau ʻilo ʻa e tuʻunga ʻoku ou tuʻu aí fekauʻaki mo ha ngaahi tefito pau pea mahino kiate kinautolu ʻeku ngaahi fakakaukaú.
Sabrina S., taʻu 16, ʻOlikoni, USA
Fakaʻapaʻapaʻi
ʻOku mahuʻinga ke ongona ʻa hotau leʻó, ka ʻoku mahuʻinga ʻaupito ke tau fakaʻapaʻapaʻi foki e tui fakalotu ʻa e niʻihi kehé foki. ʻOua ʻe fakafekiki. ʻOku fakatupu ʻe he fakafekikí e tāufehiʻá mo e puputuʻú. Kapau ʻoku ʻohake ha fakakaukau ʻoku fepaki mo ʻetau tui fakalotú, mokomoko pē, tokanga, anga fakaʻapaʻapa, pea ʻoua naʻa ngalo ke fakafanongo ki he Laumālié. ʻOku ʻi ai ha ngaahi meʻa ʻoku ʻikai ke mahino kiate kitautolu ka ʻoku ʻafioʻi ia ʻe he ʻOtuá. ʻOku totonu ke tau fanongo mo ako mei Hono Laumālié.
Hannah M., taʻu 18, ʻIutā, USA
Vahevahe e Meʻa ʻoku Akoʻi ʻe he Siasí
ʻOku ou feinga ke tali ʻa e ngaahi fehuʻí ko iá ki he lelei taha te u malavá koeʻuhí he ʻoku ʻikai ke ʻilo ʻe hoku ngaahi kaungāmeʻá mo e kau faiakó, ʻa e tuʻunga ʻoku tuʻu mei ai ʻa e Siasí fekauʻaki mo e ngaahi kaveinga ko iá, kae ʻoua ke u toki fakahā ange kiate kinautolu. ʻI heʻeku fai iá, ʻoku nau lava leva ʻo ʻilo ia ʻo ka toe hoko ʻi he kahaʻú, pea te ke tupulaki fakalaumālie leva ai. Manatuʻi: “Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí” Mātiu 5:16.
Siosiua M., taʻu 16, Manisesitā, ʻIngilani
Tokoniʻi e Niʻihi Kehé ke nau Fakakaukau fekauʻaki mo e Meʻa ʻOku Totonú
Vahevahe totonu hoʻo ngaahi ongó. ʻOku lahi ʻa e ngaahi tefito ʻi he akó, ʻoku lahi hono tālangaʻí, ʻo hangē ko e fakatōtamá, ko ia ai ʻoua te ke mā ke lea hake. Ko ha faingamālie lelei eni ke vahevahe e ongoongoleleí mo e ngaahi tuʻunga moʻui ʻoku tau tui ki aí. Kapau te ke vahevahe hoʻo tuí, te ke lava ʻo tokoni e kakaí ke nau fakakaukau ki he meʻa ʻoku totonú.
Metasoni R., taʻu 14, Kalolaina Noate
Fakatonutonu e ngaahi Tokāteline Halá
ʻOku tau kau ki ha Siasi ʻoku taumuʻa ʻaki e ngāue fakafaifekaú pea ʻoku ui kitautolu ke tau malanga ʻaki; ko ia ai, he ʻikai ke tau fakaʻatā ʻa e ngaahi tokāteline halá ke mafola atu.ʻI he ngaahi meʻa peheé, kuo pau ke tau lea kae lava ke fakatonutonu ʻa e ngaahi tokāteline halá pea tokoniʻi ʻa e kakaí ke mahino kiate kinautolu ʻa e fakakaukau ʻa e ongoongolelei kuo toe fakafoki maí ki he tefito ko iá.
Tēvita M., taʻu 16, Vahefonua Kasai-ʻOkisitenitolo, Lepupelika Fakatemokalati ʻo Kongokoú
ʻIloʻi ʻa e Tuʻunga ʻo e Siasí
Naʻá ku ʻi ha kalasi ʻa ia naʻe faʻa aleaʻi ai ha ngaahi tefito mahuʻinga. Ko e ʻuluaki meʻa ke faí ko hono fakaʻapaʻapaʻi e tui fakalotu ʻa e niʻihi kehé, ʻo tatau mo e meʻa ʻokú ke ʻamanaki ke fai atu ʻe ho kaungā-kalasí. Kapau ʻoku fepaki fakahangatonu e tefitó mo e Siasí, ʻokú ke tauʻatāina ke fakahā hoʻo fakakaukaú. ʻOku ʻikai totonu ke ke fakaʻasi ʻe koe ʻa e Siasí ʻi hoʻo talí. Ka neongo iá, ʻoku mahuʻinga ke ke ʻiloʻi ʻa e tuʻunga ʻo e Siasí ʻi he ngaahi meʻa ko iá.
Siosefa Z., taʻu 18, Meleleni, USA
Fakaʻehiʻehi mei he Fakakikihí
Te u fakamatalaʻi ange ʻeku fakakaukaú, taukapoʻi ʻeku ngaahi tefitoʻi moʻoní mo e ngaahi tokāteline ʻo e Siasí, mo fakaʻapaʻapaʻi e ngaahi fakakaukau ʻa e niʻihi kehé. He ʻikai ke u fakakikihi, he te ne tuli ʻa e Laumālié, ʻa ia te ne lava ʻo tākiekina e niʻihi kehé ʻi ha founga ʻoku leleí.
Taiana V., taʻu 15, Puenosi ʻAealesi, ʻAsenitina