Ko e Mālohi ke Faitāpuekina ʻa e Kakai kotoa Pē
Kuo akoʻi kitautolu ʻe he kau taki ʻo e Siasí ʻoku ʻatā ʻa e ngaahi ouau mo e ngaahi fuakava ʻo e lakanga fakataulaʻeikí ki he kotoa ʻo e fānau ʻa e ʻOtuá—tangata mo e fefine.
Tā Fakatātā ʻa Gail Armstrong
“Ko e lakanga fakataulaʻeikí ko e mālohi mo e mafai ia ʻo e ʻOtuá naʻe ʻomi ke fakamoʻui mo tāpuekina ʻaki e taha kotoa—ʻa e tangata, fefine, mo e fānau. …
“ʻOku ʻi ai ha ngaahi tāpuaki makehe mei he ʻOtuá maʻá e taha moʻui taau kotoa pē ʻoku papitaiso, maʻu e Laumālie Māʻoniʻoní, mo maʻu maʻu pē e sākalamēnití. ʻOku ʻomi ʻe he temipalé ha toe mahino mo ha mālohi lahi ange, fakataha mo e talaʻofa ʻo e moʻui taʻengatá [vakai T&F 138:37, 51].
ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu mā Uá, “Mālohi ʻi he Lakanga Fakataulaʻeikí,” Liahona, Nōvema 2013, 92.
“ʻOku ʻomi ʻe he ngaahi ouau ʻo e lakanga fakataulaʻeikí mo e ngaahi fuakavá ʻa hono kakato ʻo e ngaahi tāpuaki kuo talaʻofa mai ʻe he ʻOtuá maʻatautolú, ʻa ia ʻoku malava ʻi he Fakalelei ʻa e Fakamoʻuí. ʻOku nau fakamahafu ʻa e ngaahi foha mo e ngaahi ʻofefine ʻo e ʻOtuá ʻaki ʻa e mālohí, ʻa e mālohi ʻo e ʻOtuá, mo ʻomi maʻatautolu ʻa e faingamālie ke maʻu ʻa e moʻui taʻengatá—ke foki ki he ʻao ʻo e ʻOtuá ʻo nofo mo Ia ʻi Hono fāmili taʻengatá.”
Carole M. Stephens, tokoni ʻuluaki ʻi he kau Palesitenisī Lahi ʻo e Fineʻofá, “ʻOku Tau ʻIlo Nai ʻa e Meʻa ʻOku tau Maʻú?” Liahona, Nōvema 2013,12.
“ʻOku mahuʻinga ke mahino kiate kitautolu naʻe ʻomi ʻe he Tamai Hēvaní ha founga ke lava Hono ngaahi fohá mo Hono ngaahi ʻofefiné ʻo maʻu e ngaahi tāpuakí pea fakamālohia ʻe he mālohi ʻo e lakanga fakataulaʻeikí. Ko e uho e palani ʻa e ʻOtuá ki Heʻene fānau fakalaumālié ʻa ʻEne fakahā: ʻKo ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatáʼ (Mōsese 1:39).”
ʻEletā M. Russell Ballard ʻo e Kōlomu ʻo e Kau ʻAposetolo ʻe Toko Hongofulu mā Uá, “ʻKo ʻEku Ngāué ʻEni mo Hoku Nāunaú,ʼ” Liahona, Mē 2013, 19.
