Ko e Matapaá pea mo e Halá

ʻOku hanga ʻe he ngaahi ouau ʻo e lakanga fakataulaʻeikí mo e ngaahi fuakavá ʻo fokotuʻu kitautolu ʻi he hala ki he moʻui taʻengatá mo tāpuakiʻi kitautolu ʻaki ʻa e mālohi ʻoku tau fie maʻu he taimí ni.

ʻOku tau fekumi kotoa ki he moʻui taʻengatá, ʻa ia ʻoku ʻuhinga ki hono fakahaofi mo hakeakiʻi ʻi he tuʻunga māʻolunga taha he puleʻanga fakasilesitialé, ʻa ia te tau lava ʻo nofo ʻi he ʻao ʻo e Tamai Hēvaní ko e ngaahi fāmilí.

Ko e tānaki atu ki he tui kia Sīsū Kalaisí mo e fakatomalá, ko e ngaahi ouau mo e ngaahi fuakava ʻo e lakanga fakataulaʻeikí ʻokú ne fakangofua kitautolu ke tau hū ki he hala ʻoku fakatau ki he moʻui taʻengatá. ʻOku ʻikai ke mahuʻinga e taimi naʻá ke hū atu ai ki he hala ko ʻení pe ko e fē feituʻu ʻokú ke ʻi aí—pea ʻoku tatau ai pē pe naʻe fanauʻi koe ʻi he Siasí pe toki ului mai kimui, pe naʻá ke mālohi ʻi he kotoa hoʻo moʻuí pe naʻá ke toki foki mai pē ʻo mālohi ʻi he Siasí—ʻe lava ke ke fakalakalaka ai kimuʻa ʻi hono tukutaha hoʻo tokangá ki hoʻo ngaahi fuakavá mo e ngaahi meʻa te ke fai ke maʻu mo tauhi ai kinautolú.

ʻOku mahuʻinga ai ke ʻiloʻi ʻoku ʻikai ke foaki mai pē ʻe he ngaahi ouau ʻo e lakanga fakataulaʻeikí mo e ngaahi fuakavá e talaʻofa ʻo ha kahaʻu nāunauʻia. ʻOkú ne toe foaki mai e ivi, fakafiemālie, mo e poupou ʻoku tau fie maʻu he taimí ni kae lava ke tau muimui ʻi he halá mo kātaki ki he ngataʻangá ʻi he māʻoniʻoni.

Matapā

Hala ʻoku fakatau ki he moʻui taʻengatá (kātaki ʻo aʻu ki he ngataʻangá)

Vakai, 2 Nīfai 31

Ngaahi Ouau Mahuʻingá mo e Ngaahi Fuakavá

“Ko e mafai ʻo e lakanga fakataulaʻeikí ʻi he Siasí ʻokú ne fakahoko e ngaahi ouau mo e fuakava toputapu ʻoku haʻi fakataha ai ʻa e ngaahi fāmilí mo fakafeʻungaʻi ai kitautolu ke toe foki ki he ʻOtua ko e Tamaí pea mo Sīsū Kalaisi ʻi he puleʻanga fakasilesitialé. ʻOku ʻomi ʻe he ngaahi ouau ko ʻení ha nonga he ʻoku nau fefuakavaʻaki mo e ʻEikí.”

ʻEletā Quentin L. Cook ʻo e Kōlomu ʻo e Kau ʻAposetolo ʻe Toko Hongofulu Mā Uá, “Melino Fakatāutahá: Ko e Pale ʻo e Anga Māʻoniʻoní,” Liahona, Mē 2013, 32.
- Papitaisó
- Meʻafoaki ʻo e Laumālie Māʻoniʻoní
- Foaki ʻo e lakanga fakataulaʻeikí mo e fakanofó (maʻá e kau talavou)
- Ko e ʻEnitaumeni ʻi he Temipalé
- Ko e Sila ʻi he Temipalé
Fakafoʻou mo Fakamālohia ʻa e ngaahi Ouaú

“ʻI hoʻo moʻui taau ʻo kau ki he ngaahi ouau ʻo e lakanga fakataulaʻeikí, ʻe foaki atu ʻe he ʻEikí kiate koe ha mālohi lahi ange, nonga, mo e fakakaukau ʻoku taʻengatá.”

ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu mā Uá, “Mālohi ʻi he Lakanga Fakataulaʻeikí,” Liahona, Nōvema 2013, 92.
- Sākalamēnití—ko hono fakafoʻou fakauike ʻo e fuakava ʻo e papitaisó
- Ngaahi tāpuaki fakapēteliaké—ko ha fakahinohino makehe fakafoʻituitui mo e ngaahi tāpuaki kuo talaʻofa maí
- Tāpuakiʻi ʻo e mahakí—tokoni mo e fakamoʻui
- Ngaahi tāpuaki fakatamai mo e ngaahi tāpuaki kehe ʻo e fakafiemālié mo e faleʻí—melino mo e fakahinohino ʻi he taimi ʻoku fie maʻu aí

Moʻui taʻengatá (ko e puleʻanga fakasilesitialé mo e ngaahi fāmilí)

Tokoni ʻi he Halá

Ngaahi Folofolá—fakahinohino kuo maʻu ko ha konga ʻo e fuakava ʻi he vahaʻa ʻo e ʻOtuá mo Hono kakaí (vakai, T&F 84:57)

Lotú—“ʻOku foaki mai kiate kitautolu [Ko e ʻEikí] e fuakava ke ʻmanatu maʻu pē kiate Iaʻ mo e fakatokanga ke ʻlotu maʻu ai pēʻ koeʻuhí ke tuku ʻetau falalá kiate Ia, he ko maluʻangá pē ia” (Palesiteni Henry B. Eyring, Tokoni ʻuluaki ʻi he kau Palesitenisī ʻUluakí, “Always,” Ensign, Oct. 1999, 9).

Ngāue Tokoní—ko hono fakahoko ʻetau ngaahi fuakavá ʻi he ngāue ʻa e ʻOtuá mo ʻEne fānaú, kau ai ʻa e ngaahi uiuiʻí, ngāue fakatemipalé mo e hisitōlia fakafāmilí, vahevahe e ongoongoleleí, ngāue fakafaifekau taimi kakató

Fakatomala—ko hono manatuʻi ʻetau ngaahi fuakavá pea ʻunuʻunu ʻo ofi ange ki he Fakamoʻuí ʻi he taimi kuo tau hē ai, taimi ʻe niʻihi ʻoku kau ai ʻa e tokoni mei he kau taki lakanga fakataulaʻeikí