Ko Hono Fakaʻaongaʻi e Palani ʻo e Fakamoʻuí ke Tali e Ngaahi Fehuʻí
ʻI he taimi ʻoku tau maʻu ai pe koha niʻihi kehe ha ngaahi fehuʻi fekauʻaki mo e ongoongolelei ʻo Sīsū Kalaisí, ʻoku tau ʻiloʻi nai e feituʻu ke maʻu mei ai ʻa e ngaahi tali?
ʻOku tau moʻui ʻi ha taimi fakafiefia. ʻOku haʻu ʻa e ongoongolelei kuo toe fakafoki mai ʻo Sīsū Kalaisí “mei he kakapú” (T&F 1:30). Ko hono olá, ʻoku lahi ange ha fānau ʻo e Tamai Hēvaní ʻoku ʻikai ke nau kau ki heʻetau tui fakalotú ʻoku nau fanongo ʻo kau ki he “kau Māmongá.” Ko ha niʻihi ʻoku nau fanongo ki ha ngaahi meʻa ongo ngali kehe mo puputuʻu. Ko ha niʻihi ʻoku nau fanongo ki ha ngaahi meʻa ʻoku ongo angamaheni mo fakafiemālie. ʻE haʻu ha niʻihi fakafoʻituitui mei he ongo kulupú kiate kitautolu ke fekumi ki ha ngaahi tali ki heʻenau ngaahi fehuʻí. ʻOku maʻu ʻa e ngaahi tali lahi ʻi he palani ʻo e fakamoʻuí, ʻa ia ʻoku toe ʻiloa ko e “palani lahi ʻo e fiefiá” (ʻAlamā 42:8).
Ko e fehuʻi ʻoku faʻa tuʻo lahi ʻa hono ʻeké ko e “Naʻá ku haʻú mei fē?” “Ko e hā ‘a e ʻuhinga ʻoku ou ʻi heni aí?” mo e “Te u ‘alu ki fē ‘o ka hili ‘a e moʻui ko ‘ení?” ʻE lava ke ke tali kotoa ʻa e ngaahi fehuʻi ko ʻení ʻi he ngaahi moʻoni ʻoku maʻu ʻi he palani ʻo e fakamoʻuí. ʻOku vahevahe ʻe he fakamatala ko ʻení e niʻihi ʻo e tali kuo ʻomai ʻe he folofolá mo hotau palōfitá, Palesiteni Tōmasi S. Monisoni, ki he ngaahi fehuʻi ko ʻení.
Naʻá ku haʻú mei fē?
Naʻe pehē ʻe Palesiteni Monisoni, Ko ha kakai tautolu ʻoku taʻengata. Naʻa tau nofo mo e ʻOtuá kimuʻa e moʻuí ni ko ʻene fānau fakalaumālié. “Naʻe [akoʻi] ʻe he ʻaposetolo ko Paulá ʻo pehē ʻko e hako ʻo e ʻOtuá ʻa kitautoluʼ [Ngāue 17:29].” “Talu mei heʻetau ʻilo ko hotau sino fakamatelié ko e fakatupu mei heʻetau mātuʻa fakamatelié, kuo pau ke tau fekumi ki he ʻuhinga ʻo e lea ʻa Paulá. Kuo fakahā ʻe he ʻEikí ʻko e laumālié mo e sinó ko e moʻoniʻi laumālie ia ʻo e tangatáʼ [T&F 88:15]. Ko ia ko e laumālié ko e fakatupu ia ʻa e ʻOtuá. ʻOku ʻuhinga ʻa e tokotaha faʻu tohi ʻo e kakai Hepeluú kiate Ia ʻko e Tamai ʻo e ngaahi laumāliéʼ [Hepelū 12:9].”1
Ko e hā ʻoku ou ʻi heni aí?
Naʻe pehē ʻe Palesiteni Monisoni, ʻo kau ki he ʻetau moʻui ʻi he māmaní: “Hono ʻikai totonu ke tau fakafetaʻi hono faʻu ʻe he Tupuʻanga poto ha māmani pea tuku kitautolu heni mo ha veili ʻo ʻikai toe manatu ki heʻetau moʻui kimuʻá kae lava ke tau foua ha taimi ʻo e siviʻi, mo ha faingamālie ke fakamoʻoniʻi ai kitautolu kae lava ke tau taau mo e meʻa kotoa pē kuo teuteu ʻe he ʻOtuá ke tau maʻú.
“ʻOku mahino, ko e taha ʻo e tefitoʻi taumuʻa ʻo ʻetau moʻuí ʻi he māmaní ko e maʻu ha sino ʻo e kakano mo e hui. Naʻe toe foaki mai kiate kitautolu ʻa e meʻafoaki ʻo e tauʻatāina ke filí. ʻOku tau monūʻia ke tau fili ʻi ha founga ʻe lauiafe. ʻOku tau ako heni mei he ngaahi faingataʻa ʻoku tau aʻusiá. ʻOku tau ʻiloʻi ʻi he vahaʻa ʻo e leleí mo e koví. ʻOku tau fakafaikehekeheʻi ʻa e koná mo e melié. ʻOku tau ʻiloʻi ʻoku ʻi ai ha ngaahi nunuʻa ʻoku muiaki mai ʻi heʻetau tōʻonga moʻuí.”2
Te u ʻalú ki fē hili e moʻuí ni?
ʻOku hoko ʻa e maté ki he kau mēmipa kotoa pē ʻo e fāmili ʻo e tangatá. Ka “ʻo kapau ʻe mate ha tangata, ʻe toe moʻui ia?” (Siope 14:14). Naʻe pehē ʻe Palesiteni Monisoni, “ʻOku mau ʻilo ko e maté ʻoku ʻikai ko e ngataʻangá ia. Ko e moʻoni ko ʻení naʻe akoʻi ʻe he kau palōfita moʻuí ʻi he kuonga kotoa pē. ʻOku toe maʻu ia ʻi heʻetau ngaahi folofola māʻoniʻoní. ʻOku tau lau ʻi he Tohi ʻa Molomoná ʻa e ngaahi lea pau mo fakafiemālie:
ʻKo ʻeni, ko e meʻa ki he tuʻunga ʻo e laumālié ʻi he vahaʻa ʻo e maté mo e toetuʻú—Vakai, kuo fakaʻilo mai kiate au ʻe ha ʻāngelo, ʻoku fakafoki ʻa e laumālie ʻo e tangata kotoa pē, ʻo ka hili ange ʻa ʻenau mavahe mei he sino fakamatelié ni, ʻio, ʻa e laumālie ʻo e tangata kotoa pē ʻo tatau ai pē pe ʻoku nau angalelei pe angakovi, ki honau ʻapí ki he ʻOtua pē ko ia ʻa ia naʻe foaki ʻa e moʻuí kiate kinautolú.
ʻPea ʻe toki hoko ʻo pehē, ko e ngaahi laumālie ʻo e faʻahinga ʻoku māʻoniʻoní ʻe tali ʻa kinautolu ki ha potu ʻo e fiefia, ʻa ia ʻoku ui ko palataisi, ko ha potu ʻo e mālōlō, ko ha potu ʻo e melino, ʻa ia te nau mālōlō ai mei heʻenau ngaahi faingataʻaʻia kotoa pē mo e hohaʻa kotoa pē mo e mamahiʼ [ʻAlamā 40:11–12].”3
Hili ʻetau toetuʻú, ʻoku tau ʻalu ki he puleʻanga fakasilesitialé ʻoku hangē ko e nāunau ʻo e laʻaá, ko e puleʻanga fakatelesitialé ʻoku hangē ko e nāunau ʻo e māhiná, ko e puleʻanga fakatilesitialé ʻoku hangē ko e nāunau ʻo e ngaahi fetuʻu, pe ki he fakapoʻuli ʻi tuʻá (vakai, T&F 76).
ʻOku ʻi ai moʻoni ha ʻOtua? ʻOku moʻoni ʻa Sētane?
Naʻe kau kotoa ‘a e Tamai Hēvaní, Sīsū Kalaisi, pea mo Sētane ʻi he Fakataha Alēlea ʻi he langí ki muʻa pea toki fanauʻi kitautolú. Ko e konga ʻo e palani ʻo e fakamoʻuí, ko hono kole ʻe he Tamai Hēvaní ki ha taha ke ʻalu ki māmani ʻo fai ʻa e fakaleleí maʻa ʻetau ngaahi angahalá. Na’á ne pehē “Ko hai te u fekauʻí? Pea tali ʻe ha taha ne hangē ko e Foha ʻo e Tangatá [Sīsū Kalaisi]: Ko Au ʻeni, fekauʻi Au. Pea tali ʻe ha taha kehe [Sētane] ʻo pehē: Ko au ʻeni, fekauʻi au. Pea naʻe folofola ʻa e ʻEikí: Te u fekauʻi e ʻuluakí.
“Pea naʻe ʻita ʻa hono uá [Sētane], ʻo ʻikai te ne tauhi ki hono ʻuluaki tuʻungá; pea ʻi he ʻaho ko iá, naʻe muimui kiate ia ʻa e tokolahi” (ʻĒpalahame 3:27–28; vakai foki T&F 29:36–37; Mōsese 4:1–4).
ʻOku tau maʻu nai ha mālohi ke tekeʻi ʻa e ngaahi ʻahiʻahi ʻa Sētané?
Naʻe kapusi ki tuʻa e vahetolu ʻe taha ʻo e ngaahi laumālie ne fili ke muimui ʻia Sētane hili e fakataha Alēlea ʻi he Langí. Naʻa nau maʻu pē mo Sētane ʻa e laumālié taʻe ʻi ai ha sino fakamatelié. Naʻe akoʻi ʻe he Palōfita ko Siosefa Sāmitá: “Ko e kakai kotoa pē ʻoku nau maʻu ha sinó ʻoku nau maʻu ha mālohi kiate kinautolu ʻoku ʻikai ke ʻi ai hanau sinó.”4 ʻE lava ke fakataueleʻi kitautolu ʻe Sētane, ka ʻoku tau maʻu e mālohi ke tekeʻi ia.
Ko e hā ʻa e ʻuhinga ʻoku hangē ʻoku ʻi ai e taimi ʻe niʻihi ʻoku ʻikai tali ai ʻe he Tamai Hēvaní ʻeku ngaahi lotú?
“Ko e lotú ko e ngāue ia ‘oku feongoongoi ai e finangalo ‘o e Tamaí mo e loto ‘o e fānaú. ʻOku ʻikai ko e taumuʻa ʻo e lotú ke liliu ʻa e finangalo ʻo e ʻOtuá” (Bible Dictionary, “Prayer”). ʻOku hoko ʻa e lotú ko ha meʻangāue ia ʻoku tokoni ke tau fakapapauʻi pe ʻoku tau fakaʻaongaʻi ʻetau tauʻatāina ke filí ke fakatatau hotau lotó mo e finangalo ʻo e ʻOtuá (vakai, ʻĒpalahame 3:25). ʻOku tali maʻu pē ʻe he Tamai Hēvaní ʻetau ngaahi lotú, pea ko e ngaahi talí ʻe lava ke ʻio, ʻikai, pe kiʻi tatali. ʻOku mahuʻinga ʻa e taimí.
Ko e hā ʻoku hoko mai ai ʻa e ngaahi faingataʻá ʻi he taimi ʻoku ou feinga ke maʻu ha moʻui ʻoku leleí?
Ko e ngaahi faingataʻá ko e konga pē ia ʻo e palani ʻa e fakamoʻuí. ʻOku nau ngaohi kitautolu ke tau mālohi ange, fakamaʻa mo fakahaohaoaʻi ʻa kitautolu ʻi heʻetau falala kia Sīsū Kalaisi mo ʻene ongoongoleleí. ʻOku tokoniʻi kitautolu ʻe he Tamai hēvaní ʻi hotau ngaahi faingataʻaʻiá. ʻOku “ʻomi ʻe hotau ngaahi faingataʻa kotoa pē ʻa e potó kiate [kitautolu] pea ʻe hoko ia ʻo ʻaonga kiate [kitautolu]” (T&F 122:7).
Te u lava fēfē ke ʻiloʻi e meʻa ʻoku totonú mo ia ʻoku halá?
ʻOku fāʻeleʻi kotoa mai e fānau ʻa e ʻOtuá mo e Maama ʻo Kalaisí, ʻa ia ʻokú ne tokoniʻi kitautolu ke “ʻiloʻi ʻa e leleí mei he koví” (Molonai 7:16). ʻIkai ngata aí, ʻe lava ʻe he Laumālie Māʻoniʻoní ke fakamoʻoniʻi mai kiate kitautolu ʻa e moʻoní ʻi hotau ʻatamaí mo hotau lotó ʻaki ʻa e ngaahi ongo ʻo e melino mo e māfana (vakai, T&F 8:2–3).
ʻE lava ke fakamolemoleʻi au neongo naʻá ku fakahoko ha ngaahi angahala mamafá?
ʻOku ʻafioʻi ʻe he ʻotuá te tau faiangahala ʻi heʻetau ako ke fili ki he meʻa ʻoku totonú mo e halá.5 Neongo ia, ʻoku ʻi ai ha tautea ki he angahala kotoa pē. ʻOku fie maʻu ʻe he fakamaau totonú ke fakahoko ʻa e tauteá. Naʻe fakangofua ʻe he Tamai Hēvaní ʻi Heʻene ʻaloʻofá, ʻa Sīsū Kalaisí ke fakahoko ai e Fakaleleí mo feau e ngaahi fie maʻu ʻa e fakamaau totonú maʻatautolu kotoa pē (vakai, ʻAlamā 42). ʻI hono fakalea ʻe tahá, naʻe faingataʻaʻia ʻa Kalaisi ʻi Ketisemani pea pekia ʻi Kolokotá ke totongi kotoa ʻetau ngaahi angahalá ʻo kapau ʻoku tau fie maʻu ʻa e Fakalelei ʻa Kalaisí ʻi haʻatau fakatomala mo tali ʻa e ngaahi ouau ʻo e ongoongoleleí. ʻE fakamolemoleʻi leva ʻetau ngaahi angahalá (vakai, T&F 1:31–32).