Elder Hugo E. Martinez

Pŭpŭ piti no te Hitu Ahuru

I te matahiti 1982, te rave ra Elder Hugo E. Martinez e ta’na vahine faaipoipo, te tuahine Nuria Alvarez de Martinez, i ta raua tau haapiipiiraa taote i Mississipi, HAM, a tae mai ai te hoê patotoraa tia‘i-ore-hia i to raua uputa fare i mua.

Te ti‘a ra e piti na misionare momoni.

« Ua iriti maua i to maua utuafare ia raua, aita râ maua i ite i te tahi noa‘e mea no ni‘a i Te Ekalesia a Iesu Mesia i te Feia Mo‘a i te mau Mahana Hopea nei. Aita maua i faaroo noa‘e i te parau no ni‘a i te Pŭpŭ Himene no te Fare Menemene », te parau ïa a Elder Martinez ma te ataata.

Ua putapû ‘oi‘oi râ te aau o teie tane e vahine faaipoipo apî i te mau haapiiraa evanelia tei faaitehia e te mau misionare. Aita i maoro roa ua faarii raua i te aniraa a te mau misonare ia bapetizo.

« E aita roa maua i tatarahapa noa‘e mai taua taime mai â ».

I te 5 no eperera 2014 ua piihia o Elder Martinez i te Pŭpŭ piti no te Hitu Ahuru, e ua riro ei Hui Mana Faatere Matamua no te mau fenua Caribbean mai. Ua « î roa oia » i te taiâ no teie nei piiraa apî.

Ua parau oia e « Ua tae mai râ te hoê varua hau e te marû i ni‘a ia’u no te faaite mai ia’u e o te Fatu te faatere ra i te ohipa ».

Hoê matahiti e hoê ava‘e i muri a‘e i to raua bapetizoraa, ua taatihia o Hugo e Nuria Martinez i roto i te Hiero no Roto Miti i te 3 no Atopa 1983. E metua raua no na tamarii e pae e e pae mootua tamahine ta raua.

Ua fanauhia o Elder Martinez i te 10 no tenuare 1957 i Mayagëz, Puerto Rico, ia Hugo E. Martinez-Sandin e Daly Morales-Alamo de Martinez. I to’na taure‘are‘araa, ua ma‘iti oia i te pee i te e‘a ohipa a to’na metua tane e ua riro mai ei taote. Ua farii oia i ta’na parau tu‘ite taote i te fare haapiiraa tuatoru no Puerto Rico (1981) e ua faahope i ta’na tau haapiipiiraa i te fare haapiiraa tuatoru no Mississipi (1984). Ua rave oia i te toro‘a taote e tae noa’tu ua faatuhaahia oia i te matahiti 2004.

Tau taime poto noa i muri a‘e i to’na bapetizoraa, ua piihia oia ei orometua Haapiiraa Sabati na te feia apî. Ua tavini mai oia i muri iho ei episekopo, tauturu i roto i te peresideniraa tĭtĭ, peresideni mataeinaa e tauturu i roto i te peresideniraa misioni no Puerto Rico San Juan. Ua peresideni oia i te misioni no Guatemala Guatemala City Central e te tavini ra oia ei Hitu Ahuru Area a piihia’i oia ei Hui Mana Faatere.