Te faati‘a nei te mau tahua itenati i te parau no te taviniraa, te faaroo.

Te horo‘a nei te feia mo‘a i te mau mahana hopea nei i te taviniraa e te faaite nei ratou i to ratou faaroo na te ao taatoa nei. E itehia te mau parau faaite no taua mau ohipa ra i ni‘a i te mau tahua itenati a te mau piha parau apî a te mau fenua, o tei haapoto-tamau-hia newsroom.lds.org, te pû mana a te Ekalesia no te mau parau apî, te mau papa‘i ve‘a, e te huiraatira.

I te area no Patifita, ua horo‘a te feia mo‘a i te mau mahana hopea nei i te pape, te maa, te matini ee, te mau titi‘a pape, te mau matini horo‘a uira, e te tahi atu mau tauihaa no te tau rû no te tauturu i te feia no Tonga i muri a‘e i te tu‘inoraa a te mata‘i rorofai Ian. I Samoa, ua amui atu te u‘i api feia mo‘a i te hoê rururaa faaroo e piti mahana ma te faaitoitoraa pae varua, te upa, te ori e te tu‘aro.

I Berezilia, ua oomo mai te mau melo no te Ekalesia i te mau piriaro ‘Te mau Rima Tauturu Momoni’ e ua tauturu i te tamâraa e te opereraa i te mau tauihaa i muri a‘e i to te pape pu‘e tu‘inoraa i te mau nohoraa taata e te mau vahi ohiparaa, ma te vaiiho e rave rahi mau taata ma te fare ore. I te tahi atu vahi, ua tauturu te mau melo i te opereraa e 211 pereoo tura‘i tei pûpûhia mai e te Piha Toro‘a Totauturu a te Ekalesia na te mau taata e fifi taa ê to ratou. Ua fatata teie nei e 700 pereoo tura‘i tei horo‘ahia i Berezilia.

I Afirika, ua amui te mau faanahoraa no te fenua e no te ao nei i te LDS Charities, te rima totauturu a te Ekalesia, i roto i te faanahoraa matamua no Ghana no te tinai i te ma‘i puupuu na roto i te patiaraa i te mau tamarii aruaru e tae atu i te 14 matahiti. I Nigeria e Ghana, ua fana‘o e tauasini mau taata i roto i na 100 vahi nohoraa taata i te hoê mahana Rima Tauturu a tauturu ai te Feia Mo‘a ua rau te huru faito matahiti i te paturaa i te mau e‘a turu, tanuraa i te mau tumu raau, vaereraa, peniraa i te mau fare e te tamâraa e te faanaheneheraa i te mau vahi nohoraa taata. I Zimbabwe, hau atu i te 60 feia apî momoni tei horo‘a i to ratou toto. E i Afirika Apatoa, ua ma‘itihia te momoni ra o Nozibele Makanda, e metua vahine e ono tamarii ta’na, ei tavana oire no Queenstow, e oire e 200 000 huiraatira.

I Amerika Ropu, hau atu i te 500 u‘i apî momoni i Guatemala tei haa i piha‘iho i te faatereraa hau no te tanu 1 944 tumu raau. I Costa Rica, ua riro te mau fare pureraa momoni ei vahi ohiraa no te û, e ua tauturu e 370 melo no te Ekalesia i te afa‘iraa i te reira i te mau fare toa ei tautururaa i te feia vĕvĕ.

E i Canada, ua haa te feia mo‘a i piha‘iho i te Pŭpŭ Tau‘araa Parau Keresetiano-Ati Iuda no Montreal (Québec) no te faaineine i te mau uiuiraa video hou te titorotororaa a te faatereraa hau i ni‘a i te parau o te mau ti‘araa faufaa. Ua paraparau te feia i uiuihia no te patururaa i te faaotiraa a te huiraatira no ni‘a i te faaturaraa, te haamaramaramaraa, te faariiraa, e te ti‘amâraa i te pae faaroo, ma te haapapû e e vai faufaa noa te haapaoraa faaroo i roto i te oraraa o te huiraatira e rave rahi no Québec.

No te tabula no te mau tahua itenati no te pû parau apî no te fenua i roto i te mau reo e rave rahi, a hi‘o mormonnewsroom.org/newsroom-country-sites.