Usa ka Leon nga Ingon og Karnero
“Ako anak sa Dios, gipadala dinhi” (Mga Himno ug mga Awit sa mga Bata, 58).
Usa sa akong paborito nga istorya mao ang istorya ni Lambert ang Leon nga ingon og Karnero. Nahimo kining inila sa usa ka cartoon pipila ka tuig na ang milabay.
Si Lambert mao ang usa ka nati nga leon nga nagpuyo uban sa panon sa karnero sukad siya gipanganak. Tungod niana, siya naghunahuna nga siya usa ka karnero. Usa ka gabii sa tingpamulak si Lambert ug ang mga panon natulog nga malinawon. Sa kalit lang si Lambert nakadungog og makahahadlok nga uwang sa usa ka lobo didto sa layo. Tungod kay si Lambert nagtuo nga siya usa ka karnero, siya nagsugod sa pagkahadlok.
Ang uwang nagkakusog, ug ang lobo nagkaduol ug nagsugod sa pagguroy sa usa sa mga karnero. Sa kalit lang si Lambert mibati og kaisug nga wala niya mabati sukad. Sama sa kilat, midagan siya padulong sa lobo aron sa pagluwas sa karnero!
Dayon si Lambert nakaamgo og usa ka butang. “Dili ko karnero. Dili ko anak sa karnero. Anak ko sa leon!” si Lambert naghunahuna. Sa dihang iyang gigukod ang lobo ug nanalipod sa mga karnero, siya nasayud sa iyang tinuod nga kinaiya.
Kamo anak sa Dios, ug Siya nahigugma kaninyo. Sa wala pa kita matawo dinhi sa yuta, matag usa nato usa ka hinigugmang anak nga lalaki o anak nga babaye sa pamilya sa atong Langitnong Amahan. Apan kadaghanan nato wala makahibalo niini. Kon kita makahibalo kinsa kita, kita mahimong sama sa leon ug makig-away sa dautan nga mga butang aron nga kita manalipod sa uban ug dili masaag sa atong agianan.
Mapasalamaton ko sa talagsaong mga gasa sa ebanghelyo ug sa plano sa kaluwasan. Mapasalamaton ko nga kita nasayud kinsa kita aron kita mahimong lig-on—sama gayud ni Lambert.