Pagdala sa Primary ngadto sa Panimalay
Maanindot nga mga Kalihokan Makapalig-on sa Akong Pamilya
Ang tagsulat nagpuyo sa Utah, USA.
Pagkat-on og dugang mahitungod sa tema sa Primary karong bulana!
Gilaay si Lucas. Gilibut niya ang balay aron makakita og ikadula. Ang iyang igsoon nga lalaki, si Ben, nagdula sa computer. Ang iyang igsoong babaye, si Sophie, nag-text sa iyang higala. Si mama nagtan-aw sa mga sulat, ug nagbasa si Papa.
“Makalaay dinhi,” miingon si Lucas.
Si papa mitan-aw niya. “Unsay buot nimo nga ipasabut?”
“Kitang tanan lain-lain og gibuhat,” miingon si Lucas. “Nag-iyahay ta.”
Gisira ni papa ang iyang libro. “Sakto ka,” siya miingon. “Akong pundukon ang tanan, ug maglingaw-lingaw ta.”
Mingisi ni Lucas. “Maayo kaayo!”
Pipila ka minuto ang pamilya ni Lucas nagkapundok, naghunahuna kon unsay buhaton. Si Sophie gusto nga mo-text sa iyang higala. Si Ben gustong magpadayon og dula sa iyang mga dula sa computer.
“Ang akong higala nga si Pablo ganahan nga makigpanglakaw uban sa iyang pamilya,” miingon ni Lucas. “Ug ang pamilya ni Alexander ganahan nga magdula og sports.”
Apan si Sophie dili gusto nga mogawas sa init nga panahon, ug si Ben dili makadula og sport tungod kay nagsakit ang iyang buol-buol [ankle].
“Kadto ang ganahan sa imong mga higala, Lucas, miingon si mama, “apan unsay ganahan sa atong pamilya nga buhaton?”
Miingon si Ben nga ganahan siya og mga board game. Miingon si Sophie nga siya ganahan nga mobasa. Si Lucas miingon nga ganahan siyag lumba sa sakyanan.
“Magpili ta og usa niana nga atong buhaton karon,” miingon si Papa. “Nganong dili ta magdula og board game pag-una?”
Sa wala madugay silang tanan naglibut ug nagsugod sa pagdula. Pagkataud-taud si Sophie mipadaplin sa iyang telepono. Si Ben mihunong sa pagtan-aw sa computer. Pagkahuman sa dula, ang tanan nagpahiyom, apan ang pahiyom ni Lucas maoy kinadak-an.