Banana Cake nga mga Misyonaryo
Alang niining batan-ong mga lalaki, ang pagpakigbahin og hiniwa nga pan nakapanalangin sa dili maihap nga mga kinabuhi, lakip sa ilang kaugalingon.
Mga litrato sa ward sa maayong kabubut-on ni Nolfo Zambrano
Kon ang usa ka tawo motanyag kaninyo og piraso sa lamian nga banana cake, unsa kahay inyong reaksyon? Alang sa batan-ong mga lalaki sa usa ka ward didto sa Ecuador, mao kana ang usa ka paagi nga sila makasugod og pag-istoryahanay kabahin sa ebanghelyo.
Matag duha ka bulan duna silay missionary day uban sa open house sa laing dapit sa ilang ward. Magbahin sila ngadto sa daghang mga grupo, matag usa dunay usa ka batan-ong lalaki, usa ka full-time o bag-ong returned missionary, ug usa ka elder o high priest. Pipila sa mga grupo anaa sa tolda, ang uban mokontak sa mga tawo sa parke, ug ang uban manuktok sa mga pultahan.
Kon sila makahimamat og tawo, ilang hatagan og piraso sa banana cake. Kon ang tawo modawat, siya ingnon nga bisan tuod ang pan lamian ug maayo alang sa lawas, ang mga misyonaryo adunay usa ka mensahe nga moamuma sa kalag sa tawo. Ang batan-ong mga lalaki ug ang ilang mga kompanyon modapit sa mga tawo nga makigkita sa mga misyonaryo. Niining paagiha, nakakuha sila og 40 ngadto 50 ka mga referral alang sa mga misyonaryo sulod sa duha ka oras.
Ang batan-ong mga lalaki usab nakigdait sa mga miyembro sa ilang kaugalingong korum. Sa Sabado magkita sila alang sa kalihokan sa Young Men ug maghimo sa Katungdanan ngadto sa Dios. Dayon sila mobisita sa dili kaayo aktibo nga miyembro sa ilang korum. Sila nag-awhag kanila sa pagtambong sa simbahan ug dayon modapit nila sa pagbalik sa pagdula og sports o moapil sa laing mga kalihokan.
Niining paagiha ug uban pa, kining batan-ong mga lalaki nag-andam nga mahimong mga misyonaryo sa tibuok kinabuhi. Duha kanila (sa tuo) mipakigbahin sa ilang gibati nga nalig-on ug nadasig tungod sa ilang mga kasinatian.
Nausab pinaagi sa Ebanghelyo
Miyembro ako sa Simbahan sulod sa lima ka tuig. Ang akong mga ginikanan dili mga miyembro, apan ang akong tiyo nga si Jorge mao ang presidente sa Young Men, ug siya nahimong usa ka mahinungdanon nga suporta. Mapasalamaton usab ako sa akong bishop sa iyang makanunayon nga suporta ug pag-awhag.
Mihukom ko nga magpaduol sa Simbahan human sa usa ka missionary day sa ward. Mao kadto ang usa sa akong unang kasinatian nga midasig nako nga magpamiyembro sa Simbahan. Isip usa ka deacon, teacher, ug karon usa ka priest, akong mga lider kanunay misuporta ug miawhag nako sa pag-apil sa tanan nga mga kalihokan sa misyonaryo nga buhat. Ganahan ko sa open house, diin ako adunay oportunidad sa pagpakigbahin sa uban sa mga panalangin sa pagkamiyembro sa Simbahan ni Kristo. Ang nakadasig nako pag-ayo mao ang mga kalihokan sa pagserbisyo, diin ako adunay oportunidad sa pagserbisyo sa akong silingan sama sa gitudlo ni Jesus nga atong buhaton.
Usa ka tuig ang milabay, ang akong manghud nga lalaki, si Luis, edad 15, ug si Israel, edad 12, nagpamiyembro sa Simbahan. Dungan kami nga naghimo sa mga proyekto sa Katungdanan ngadto sa Dios, ug sukad sa ilang mga bunyag kami nakaambit og talagsaon nga mga kasinatian nga nagtinabangay. Ang tanang mga batan-ong mga lalaki sa ward suod kaayo, ug nagsuporta sa usag usa.
Ako nasayud nga ang bunyag mao ang ganghaan sa pagsulod sa gingharian sa langit. Kon kita anaa sa pag-alagad sa atong isigkatawo, kita anaa sa pag-alagad sa Dios (tan-awa sa Mosiah 2:17). Ang misyonaryo nga buhat nagpanalangin sa mga pamilya, ug ako nasayud nga ang akong kinabuhi nausab tungod sa ebanghelyo.
Alvaro T., edad 17
Pagkat-on sa Akong mga Responsibilidad
Isip usa ka deacon nakakat-on ko sa akong mga responsibilidad salamat sa pagsuporta sa akong mga ginikanan ug mga lider ug sa paghimo sa mga tumong sa booklet nga Katungdanan ngadto sa Dios. Isip usa ka teacher nakakat-on ko og dugang pinaagi sa pagbisita isip home teacher, pag-apil sa open house sa missionary day, pagpakigbahin sa banana cake, pagtambong og Mutual, ug pag-apil sa mga kalihokan sa ward ug stake.
Karon isip usa ka priest ako naka-focus sa misyonaryo nga buhat. Nagtrabaho uban sa presidente sa Young Men ug isip assistant sa bishop, daghan pa gayud kaayo ang akong nakat-unan kabahin sa akong mga responsibilidad isip usa ka tighupot sa priesthood.
Ang atong mga lider kanunay nagdapit nato sa pag-uban kanila ug sa full-time nga mga misyonaryo aron kita makapamilyar sa misyonaryo nga buhat. Sila usab nag-awhag nato sa pagbasa sa mga kasulatan, ilabi na sa Basahon ni Mormon. Kining tanang mga kasinatian nagdasig ug nag-andam nako sa pagdawat sa mas taas nga priesthood ug sa pagserbisyo og full-time nga misyon.
Isaac G., edad 17