Mensahe sa Unang Kapangulohan
Ang Ani sa Dios
Paghulagway pinaagi ni Andrew Banneker
Usa ka babaye nga ginganlan og Christa makausa nagtrabaho sa usa ka gamayng kompanya nga nagbaligya og liso. Ganahan kaayo siya sa iyang trabaho. Kini tinubdan sa dakong katingala nga ang matag gamayng liso nga iyang gibaligya adunay kapasidad nga mousab sa kaugalingon niini nga daw milagro nga mahimong—carrot, ripolyo, o dakong kahoy nga oak.
Ganahan kaayo si Christa nga maglingkod sa iyang computer mokuha sa mga order ug motubag sa mga pangutana. Apan usa ka adlaw nakadawat siya og reklamo nga nakapalibog niya.
“Wala motubo ang mga liso,” ang kustomer miingon. “Gipalit ni nako duha ka bulan na ang milabay ug walay nahitabo.”
“Imo ba ning gitanom sa maayong yuta ug gihatagan og igo nga tubig ug saktong hayag sa adlaw?” nangutana si Christa.
“Wala, pero akong gibuhat ang akong bahin,” mitubag ang kustomer. “Gipalit nako ang mga liso. Total, kini gigarantiyahan nga motubo.”
“Apan wala ni nimo gitanom?”
“Intawon wala gyud. Magkahugaw unya ang akong mga kamot.”
Si Christa naghunahuna niini ug nakadesisyon nga kinahanglang magsulat og mga lagda sa pagtanom. Mihukom siya nga ang unang lagda mao ang: “Kinahanglan ninyong sundon ang mga instruksyon sa pagtanom aron moturok ang liso. Dili kini mahimong ibutang lang sa estante ug magdahum nga motubo.”
Wala madugay laing reklamo na usab ang nakapalibog niya.
“Ang mga liso wala mamunga,” misulti ang usa ka kustomer.
“Imo ba ning gitanom sa maayong yuta?” nangutana si Christa. “Imo ba ning gihatagan og igo nga tubig ug saktong hayag sa adlaw?”
“Oo,” miinsister ang kustomer. “Akong gibuhat ang tanan―sama sa nakasulat diha sa putos. Apan kini wala motubo.”
“Wala ba gyuy nahitabo bisan gamay? Nanurok ba kini?”
“Walay nahitabo,” miingon ang kustomer. “Gitanom ni nako sumala sa gitudlo. Naglaum ko nga makabaton og tamatis para sa panihapon. Karon nasagmuyo ko og maayo.”
“Taymsa,” mitubag si Christa. “Imo bang gipasabut nga karon lang nimo gitanom ang mga liso?”
“Ayaw gani’g pakatawa,” mitubag ang kustomer. “Gitanom ni nako usa na ka semana ang milabay. Wala ko maglaum nga aduna nay tamatis sa unang adlaw; nagpailub ko. Sultian tikaw, aduna nay daghang pagpamisbis sa tubig ug pagpaabut matag karon ug unya.”
Si Christa nasayud nga kinahanglan niyang dugangan og laing lagda: “Kini nga mga liso nagsunod sa mga balaod sa biology. Kon imong itanom ang liso karong buntag ug maglaum nga makakaon og tamatis sa katapusan sa semana, kamo masagmuyo. Kamo kinahanglan nga magpailub ug maghulat una ninyo makita ang buhat sa kinaiyahan.”
Ang tanan maayo ra hangtud nakadawat na usab si Christa og laing reklamo.
“Nasagmuyo gyud ko og maayo sa inyong mga liso,” misugod ang kustomer. “Gitanom ni nako sumala sa girekomendar sa putos. Gibisbisan nako og tubig, gisiguro nga kini adunay kahayag sa adlaw, ug nagpaabut hangtud kini mibunga.”
“Mora og sakto gyud ang tanan nimong gibuhat,” miingon si Christa.
“Mao gyud ang tanan,” mitubag ang kustomer. “Apan ang akong nakuha zucchini!”
“Sa akong rekord mao man kana ang mga liso nga imong gi-order,” miingon si Christa.
“Apan dili ko ganahan og zucchini; gusto nako og kalbasa!”
“Wala ko kasabut.”
“Gitanom nako ang mga liso sa tamnanan og kalbasa—sa sama gyud nga yuta nga namunga og kalbasa sa miaging tuig. Gidayeg nako ang mga tanom kada adlaw, nagsulti niini unsa kanindot nga mga kalbasa kini mamahimo. Apan imbis nga dagko, lingin, orange nga mga kalbasa, aduna koy, berde nga zucchini akong nakuha. Daghan kaayo niini!”
Nasayud si Christa nga ang mga lagda tingali dili gyud paigo ug kinahanglan nga sulatan og usa ka baruganan: “Ang liso nga imong gitanom ug ang panahon sa pagpananom modeterminar sa ani.”
Ang Balaod sa Pag-ani
Si Apostol Pablo mitudlo kabahin sa pag-ani sa Dios:
“Ayaw kamo palimbong; ang Dios dili mabiay-biay: kay bisan unsay igapugas sa tawo, mao usab kana ang iyang pagaanihon.
“Kay ang magapugas alang sa iyang kaugalingong unod gikan sa unod magaani siyag pagkadunot; apan ang magapugas alang sa Espiritu gikan sa Espiritu magaani siyag kinabuhing dayon.
“Ug kinahanglan dili kita managkataka sa pagbuhat og maayo: kay sa nahaigo nga panahon kita magaani, kon kita dili magakaluya” (Mga Taga-Galacia 6:7–9).
Karong panahona, ang Ginoo mihatag kanato og dugang kaalam ug panabut niining dili mausab nga balaod:
“Adunay usa ka balaod, nga dili mausab nga sugo didto sa langit sa wala pa ang mga katukuran niini nga kalibutan, nga diha ang tanan nga mga panalangin gipasikad—
“Ug kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad” (D&P 130:20–21).
Unsa ang atong gipugas, mao ang atong anihon.
Dili matugkad sa hunahuna ang kamahimayaon sa ani sa Dios. Niadtong nagpasidungog Kaniya, ang kadagayaon sa Iyang mga panalangin moabut “nga pinaugdo, dinasok, ug tinantan, ug magaawas. … Kay ang takus nga inyong igahatag mao usab unya ang takus nga inyong pagadawaton” (Lucas 6:38).
Sama sa liso sa yuta nga nagkinahanglan og paningkamot ug pailub, mao usab ang daghang panalangin sa langit. Dili mahimo nga ibutang ang atong relihiyon sa estante ug maglaum og espirituhanong mga panalangin. Apan kon kita magsunod ug magpadayon sa pagtuman sa mga sumbanan sa ebanghelyo sa inadlaw-adlaw nga kinabuhi sa atong pamilya, adunay taas nga kalagmitan nga ang atong mga anak magtubo nga makamugna og espirituhanong bunga nga may dakong bili para kanila ug sa ilang umaabut nga henerasyon.
Ang tubag sa Dios sa atong mga pag-ampo dili kanunay moabut diha-diha dayon—usahay mora og dili kini moabut—apan ang Dios nasayud unsa ang labing ikaayo sa Iyang mga anak. Sigurado, moabut ang adlaw diin kita mas klarong makakita; ug nianang adlawa atong maila ang kamaayo ug kamahinatagon sa langit.
Sa pagkakaron, ang atong tumong ug kalipay mao ang pagsunod sa mga lakang sa atong Agalon ug Manluluwas ug sa pagkinabuhi nga matarung ug lunsay nga kinabuhi aron ang gisaad ug talagsaong pag-ani sa bililhong mga panalangin sa Dios atong maangkon.
Unsa ang atong gipugas, mao ang atong anihon.
Kana ang balaod sa langit.
Kana ang balaod sa ani sa Dios.