Atong Luna

Mga Sumbanan ug mga Higala

Sukad ako nag-eskwela, duna koy mga higala kinsa wala makasabut sa moral nga mga sumbanan sa atong relihiyon. Sa sinugdanan lisud, apan sa kadugayan sila naanad na sa ideya sa akong moral nga kalimpyo. Mihimo ko og tumong sa akong kinabuhi nga mahimong limpyo ug putli, ug kini misangpot og maayo kanako ug niadtong misaway nako kaniadto. Paglabay sa panahon, pagtahud, kalinaw ug hingpit nga kalipay nahimong kabahin sa among mahigugmaong sirkulo sa mga higala.

Vitória M., Brazil

Pagpasaylo sa Akong mga Higala

Isip mao ang bugtong miyembro sa simbahan sa akong kaedad, nakasinati ko og pipila ka mga higayon sa dihang ang akong mga higala nakasilo nako. Usahay sila mosaway sa akong relihiyon. Gibati nako nga nag-inusara, apan mapasalamaton ako nga ako nasayud sa mga sumbanan sa Simbahan.

Kon ang akong mga higala makapasakit nako, ako maningkamot sa pagpaubos sa akong kaugalingon ug maglikay nga makiglalis, kay ako nasayud nga ang panaglalis dautan. Kon magsugod sila sa paghisgot sa pipila ka mga butang kabahin sa Simbahan, ako mopamatuod lamang sa akong pagtuo sa ebanghelyo.

Ako kanunay nga mopasaylo sa akong mga higala mangayo man sila og pasaylo o dili. Ang pagpasaylo dili lang kabahin sa pag-ingon, “Gidawat ang pagpangayo og pasaylo” o “OK ra,” tungod kay ang pagpasaylo adunay lawom nga kahulugan: Si Jesukristo mitubos sa atong mga sala aron nga ang Langitnong Amahan mopasaylo kanato.

Bisan og ang akong mga higala wala makasabut sa akong hugot nga pagtuo karon, ako nasayud nga ako mahimong instrumento sa Dios aron sa pagtudlo kanila sa ebanghelyo. Nagtabang ko kanila, ug sa samang higayon nagtabang ko sa akong kaugalingon nga motubo sa espirituhanong paagi ug nag-andam sa pagserbisyo og misyon.

Josue V., Philippines

Usa sa Akong Paborito nga mga Kasulatan

Ang atong Langitnong Amahan mogamit sa “gagmay ug yano nga mga butang” (Alma 37:6) sa pagpadayon sa Iyang buhat. Si Joseph Smith ordinaryo nga tawo sa mga mata sa kalibutan, apan ang Dios migamit kaniya sa pagpahiuli sa Simbahan. Ug kini yano kaayo nga butang nga misangpot sa Pagpahiuli: usa ka pag-ampo. Ayaw paghunahuna nga kamo gamay ra kaayo nga motrabaho diha sa ubasan sa Ginoo. Ang pagpakita og maayong ehemplo makatabang sa inyong silingan nga mahimong miyembro sa Simbahan. Ang Dios wala magkinahanglan og mga bantugan, mga tawo nga matinud-anon ug masulundon lamang.

Ronick R., Haiti