Mga Higala sa Tibuok Kalibutan
Ako si Kaloni gikan sa Tonga
Mālō e lelei!*
Himamata si Kaloni gikan sa Gingharian sa Tonga. Ang iyang isla nailhan isip Friendly Islands.
Nagpiknik na ba kamo isip pamilya didto sa gawas sa Adlaw sa Pasko? Ang pamilya ni Kaloni ganahan nga magpiknik didto sa baybayon panahon sa Pasko. Tungod kay panahon kini sa summer sa Disyembre sa habagatang hemisphere, ang mga pagpiknik panahon sa Pasko walay problema! Ang dies anyos nga si Kaloni ganahang mogahin og daghang makalingaw nga mga holiday uban sa mga iyang iyaan, mga uyoan, ug mga ig-agaw.
Ganahan kong moadto sa baybayon uban sa akong pamilya ug magdula sa balas ug sa dagat.
Ganahan ko nga mosayaw, magdula og sports ug mag-painting. Mitabang ko sa paghimo og mural mahitungod sa plano sa kaluwasan alang sa seminary building.
Sa mga adlaw sa semana magsul-ob ko sa uniporme sa eskwelahan. Dayon ang akong pamilya magdungan sa paglakaw paingon sa eskwelahan. Ang akong papa nagtrabaho sa high school, ug ang akong mama magtutudlo sa seminary. Ako dunay usa ka magulang nga babaye nga ginganlan og Dorothy ug usa ka magulang nga lalaki nga ginganlan og Nelson.
Ang akong mama ug ang akong tiya nakahukom nga magsugod og usa ka proyekto sa pamilya aron makakwarta alang namong tanan nga mga ig-agaw nga magmisyon sa umaabut. Naghimo mi og chicken kabobs ug ‘otai ug ibaligya kini sa merkado sa mag-uuma matag Sabado.
Gusto kong moeskwela sa kolehiyo ug mahimong magtutudlo sa seminary sama sa akong mama. Gusto usab ako nga magmisyon ug maminyo sa templo. Apan sa pagkakaron, maglingaw-lingaw lang sa ko sa matahum nga isla nga paraiso.