Nasayud Ko nga ang Dios Mohatag
Abethemia Trujillo, Albay, Philippines
Mga paghulagway pinaagi ni Bradley Clark
Sa wala pa ko mamiyembro sa Simbahan, ang akong bana nagkasakit pag-ayo. Nag-ampo ko og maayo, nangamuyo sa Dios nga buhion akong bana para sa kaayuhan sa among lima ka anak ug sa bata nga anaa pa sa akong tiyan. Apan nakawang ang akong mga pag-ampo.
Sa dihang namatay ang akong bana, ang akong gugma sa Dios ug ang akong pagtuo ug pagsalig Kaniya namatay usab. Napuno ko karon sa mga responsibilidad nga akong giabaga. Maayo gani, anaa ang akong mga ginikanan aron motabang.
Usa ka adlaw paglabay sa pipila ka tuig, adunay nanuktok sa among pultahan. Duha ka langyaw nagbarug didto nga mahigalaong mipahiyom ug nagkupot og usa ka basahon. Ilang gipaila-ila ang ilang kaugalingon isip mga misyonaryo sa Ang Simbahan ni Jesukristo sa mga Santos sa Ulahing mga Adlaw. Wala pa ko kadungog sa ilang simbahan. Mibiya sila sa dihang giingnan nako sila nga busy ko, apan nagpadayon ko sa paghunahuna kabahin nila.
Pagkasunod adlaw nakit-an nako sila nga nagpakita sa ilang basahon ngadto sa usa ka silingan. Nakuryoso, miduol ko. Ang mga misyonaryo nakamatikod nako ug nangutana pag-usab kon mahimo ba silang mobisita nako. Natingala ko sa akong tubag: “Oo, bisan kanus-a!”
Samtang naminaw ko sa mga leksyon sa misyonaryo ug nagtuon sa Basahon ni Mormon, nakaamgo ko sa mga sayop nga akong nahimo sa kinabuhi, naghinulsol sa akong mga sala, ug nagpaduol ngadto sa Dios. Sa dihang nahibaloan sa akong mga ginikanan nga gitudloan ko sa mga elder, nasuko sila. Mihulga sila nga ako ug ang akong mga anak ilang isalikway. Gidapit ko sa mga misyonaryo nga magpabunyag, apan mibalibad ko tungod kay dili mi mabuhi kon wala ang tabang sa akong mga ginikanan.
Sa wala pa mobiya ang mga elder, ila kong gihangyo nga basahon ang 3 Nephi 13:31–34. Sa dihang akong gibasa “pangita una kamo sa gingharian sa Dios ug sa iyang pagkamatarung, ug kining tanan nga mga butang idugang nganha kaninyo” (bersikulo 33), nasayud ko nga ang Langitnong Amahan mohatag kon ako Siyang unahon ug sundon ang Iyang mga sugo. Sa dihang mibalik ang mga misyonaryo, among gi-eskedyul ang akong bunyag.
Sa adlaw sa akong bunyag, akong nahinumduman ang suko nga tingog sa akong inahan. Gikulbaan ko, apan mituslob ko sa tubig ug gibunyagan. Pagkahuman nalipay ko og maayo, ug sa dihang nakumpirmahan ko nga miyembro sa Simbahan ug gihatagan sa gasa sa Espiritu Santo, mibati ko nga ang akong palas-anon migaan.
Sa dihang nahibaloan sa akong mga ginikanan nga nagpamiyembro ko sa Simbahan, ila kong gisalikway. Apan nagbalik ang among maayong buot paglabay sa usa ka tuig, human niini ang akong duha ka igsoong babaye nabunyagan nga may pagtugot sa among ginikanan.
Sa katapusan tulo sa akong mga anak miserbisyo og full-time nga misyon, ug sa dili madugay akong isaulog ang 40 ka tuig isip miyembro sa Simbahan. Dako kaayong panalangin ang akong naangkon—kining tanan salamat niadtong duha ka misyonaryo kinsa nanuktok sa akong pultahan, mipaila-ila kanako sa Basahon ni Mormon, ug mitabang nga mabalik ang akong gugma sa Dios ug ang akong hugot nga pagtuo ug pagsalig Kaniya.