Mga Panalangin sa Priesthood nga Gihatag ug Gibawsan
Julie Keyes, British Columbia, Canada
Mga paghulagway pinaagi ni Bradley Clark
Pipila ka tuig ang milabay samtang ang among pamilya nanihapon uban sa lain nga magtiayon sa among ward, nakadawat kami og tawag sa telepono gikan sa departamento sa emerhensya sa among lokal nga ospital. Usa ka opisyal nangutana sa akong bana, kinsa nagserbisyo isip presidente sa stake nianang panahona, kon adunay tawo sa atong Simbahan makabisita sa 17 anyos nga batan-on kinsa nakaangkon og seryusong pagkaangol sa ulo.
Sa pag-abut, nahibaloan sa akong bana nga ang batan-ong lalaki nahulog gikan sa usa ka balkonahe ngadto sa sementado nga daplin sa karsada 30 ka pye (9 ka metros) ang gitas-on. Nawad-an siya og panimout ug wala gituohan nga mabuhi.
Ang akong bana ug ang brother nga among kauban sa pagpanihapon mipanalangin sa batan-ong lalaki. Ang iyang pamilya, kinsa nagpuyo usa ka libo ka milya (1,610 km) ang gilay-on, nakontak ug gipahibalo sa iyang kahimtang.
Milagro kaayo, human sa pipila ka adlaw sa intensive care, mibalik ang panimuot ug misugod nga naayo ang batan-ong lalaki. Sulod sa upat ka semana ang iyang mga ginikanan mibisita kaniya kada adlaw diha sa ospital. Dayon siya ilang gisakay sa eroplano pauli ngadto sa Arizona, USA, aron hingpit siya nga maayo.
Pagkatalagsaon nga makasaksi sa makapaayo nga gahum sa priesthood nga miepekto sa paagi nga nakahatag niining batan-ong lalaki og ikaduha nga higayon nga maayo og panglawas sa umaabut. Ug dako akong pasalamat para sa akong bana ug ubang mga miyembro sa ward kinsa andam sa pagpahigayon og serbisyo sa priesthood ug molihok uban sa balaan nga awtoridad.
Naluoy kaayo ko sa mga ginikanan niining batan-ong lalaki, kinsa layo kaayo sa ilang anak sa panahon sa iyang krisis. Apan, nalipay ko sa pagkasayud nga sila mibati og kahupayan sa dihang ilang nasayran nga ang ilang anak nakadawat og panalangin sa priesthod ug ang mga miyembro sa Simbahan nalipay nga motabang.
Midako akong pagsabut sa pagbati niining mga ginikanan paglabay sa pipila ka tuig sa dihang gitawagan ko gamit ang telepono nga ang akong anak nga lalaki, nagpuyo og 2,000 ka milya (3,220 km) ang gilay-on, nabanggaan sa sakyanan samtang nagsakay sa iyang bisikleta padulong sa unibersidad diin siya nagtrabaho ug nag-eskwela. Bisan tuod mibati ko nga walay mahimo sa pagtabang niya, mapasalamaton ug nahupay ko sa pagkasayud nga ang full-time nga mga misyonaryo gitawag aron sa paghatag kaniya og panalangin sa priesthood ug usa ka ward sa St. Paul, Minnesota, USA, mitubag sa mga panginahanglan sa iyang pamilya. Ang mga miyembro sa ward midala og pagkaon sa iyang panimalay ug mitabang sa iyang asawa, kinsa nanganak niana lang adlawa sa wala pa ang aksidente, nag-atiman sa ilang ubang tulo ka anak.
Hunahunaa ang akong dakong pasalamat sa dihang nasayran nako nga ang misyonaryo nga mipanalangin sa akong anak mao ang batan-ong lalaki kinsa gipanalanginan sa akong bana lima ka tuig ang milabay. Nahingangha ko nga ang serbisyo nga gihatag gibawsan sa hingpit!
Ang akong hugot nga pagtuo ug pag-ampo sa pasalamat sa akong mahigugmaong Langitnong Amahan nagpadayon sa pagtubo samtang namalandong ko nga Siya nakaila kanatong tanan ug unsay atong gikinahanglan. Nagtuo ko nga kining batan-ong misyonaryo anaa didto aron among maila ang pagkahibalo sa Dios sa umaabut sa personal kaayo nga paagi.