Unsay Akong Kantahon?
David M. Flitton, Utah, USA
Mga paghulagway pinaagi ni Bradley Clark
Panahon sa akong pagserbisyo isip full-time nga misyonaryo dul-an sa 40 ka tuig ang milabay diha sa lungsod sa Levin, New Zealand, ako ang mopatugtog sa piano kada Martes para sa mga bata sa Primary. Nahinumduman nako ang akong nindot nga pagbati para niining mga bata samtang manganta mi sa puno sa ebanghelyo nga mga kanta sa Primary.
Niadtong Pebrero 2013, mibalik ko sa New Zealand para magbakasyon. Tungod kay hilig nako mag-hike, nagpareserba ko og upat ka adlaw nga hiking excursion sa inila nga Milford Track sa Fiordland National Park sa South Island.
Kauban nako ang tulo ka Amerikano ug 37 ka uban pang mga hiker gikan sa tibuok kalibutan, naglakip sa Australia, Brazil, England, Finland, Germany, Israel, ug Uruguay. Panahon sa among pag-hiking, kami mipakigbahin sa among mga hunahuna, kasinatian, ug opinyon kutob sa among mahimo bisan pa nga lainlain mi og pinulongan. Wala ra magdugay nga ang among mga kalainan sa kultura ug mapihigong opinyon nawala tungod sa nagkaanam nga kasuod.
Sa katapusan sa among ikatulo nga adlaw nga pag-hiking, usa sa mga hiker gustong palig-unon pa ang among panaghigalaay ug mibarug dayon, nagpahibalo nga kami mohimo og pasundayag sa talento. Siya miingon nga iyang sugdan ang pasundayag. Mipili siya nga ipakita iyang talento sa pagsaysay og istorya, diin iyang napraktisan sa iyang opisina sa Caesarea, Israel. Iyang istorya maayo ra, busa mipahibalo siya nga mosaysay siya og usa pa. Apan sa dihang nagsaysay siya og binastos, nakaamgo ko nga kining gabhiuna mahimong dili na kaayo makapabayaw.
Atol sa iyang pagsaysay, mibati ko og kusog nga impresyon nga mokanta para sa grupo. Apan unsay akong kantahon para sa akong bag-ong mga higala gikan sa tibuok kalibutan? Ang tubag mapugsanong miabut: “Ako Anak sa Dios” (Mga Himno ug mga Awit sa mga Bata, nu. 58).
Nabalaka ko apan nahunahunaon nako ang mga panumduman ug gugma sa mga bata sa Primary sa New Zealand. Mibarug ko ug mipasabut nga mokanta ko og espesyal nga kanta nga ako nang kanta dul-an sa 40 ka tuig ang milabay uban sa mga bata sa New Zealand. Gipasabut nako nga ako nahimong usa ka misyonaryo, mitudlo niining mga bata, ug mihigugma kanila. Dayon nag-ampo ko sa hilom, nangayo og tabang nga makakanta sa paagi nga makapanalangin sa grupo.
Maayo ang akong pagkanta, ug human niana akong nabati ang Espiritu. Mipahiyom ang akong bag-ong mga higala, ug ingon og ang kanta mitandog sa ilang kasingkasing. Sa wala madugay ang uban mibarug ug mipakita sa ilang mga talento sa musika. Usa ka grupo sa upat ka babaye, sa sinugdanan nagduha-duha sa pag-apil, nanganta og mga pinili nga kanta gikan sa ilang choir sa simbahan. Laing hiker mitudlo namo og usa ka folk song sa Judeo.
Sa pagtapos sa pasundayag sa talento, usa ka matahum nga batan-ong babaye gikan sa Australia mikanta og tulo ka mga kanta sa Maori, iyang lumad nga pinulongan. Sa tinuoray ang Espiritu sa atong Langitnong Amahan among nabati ug nakatabang sa pag-amgo namo nga kami mga anak sa Dios, dili na mga “langyaw ug mga dumuloong” (Mga Taga-Efeso 2:19) gikan sa lain-laing mga yuta.
Mapasalamaton ko niadong mga bata sa Primary sa gamay nga lungsod sa Levin kinsa mitabang nga masilsil ngari nako ang kamatuoran nga kitang tanan mga anak sa atong Langitnong Amahan. Nalipay usab ko niadtong mga panumduman nga nakahatag nako og kaisug nga mopakigbahin niadtong pagpamatuod pinaagi sa kanta.