Mensahe sa Visiting Teaching
Ang Balaan nga Misyon ni Jesukristo: Mesiyas
Tun-i sa mainampuong paagi kini nga materyal ug tinguhaa nga masayran kon unsa ang ipakigbahin. Sa unsang paagi ang pagsabut sa kinabuhi ug tahas sa Manluluwas makadugang sa inyong hugot nga pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang mga kasulatan nagtudlo nga kita makapuyo sa presensya sa Dios “pinaagi sa mga maayo nga buhat, kalooy, ug grasya sa Balaang Mesiyas” (2 Nephi 2:8). Ang Mesiyas “usa ka Aramaic ug Hebreohanon nga pulong nga nagpasabut ‘ang dinihogan.’ … Sa Bag-ong Tugon si Jesus gitawag nga Kristo, nga mao ang Gresyanhon nga pulong para sa Mesiyas. Kini nagpasabut nga dinihogan nga Propeta, Pari, Hari, ug Tigluwas.”1
Si Elder Jeffrey R. Holland sa Korum sa Napulog Duha ka mga Apostoles mipamatuod: “Ako nasayud nga [si Jesukristo] mao ang Usa nga Balaan sa Israel, ang Mesiyas kinsa usa ka adlaw moanhi pag-usab sa katapusang himaya, aron mohari sa yuta isip Ginoo sa mga ginoo ug Hari sa mga hari. Ako nasayud nga walay lain nga ngalan nga gihatag ubos sa langit diin ang tawo maluwas.”2
“[Si Jesukristo] mao ang Manluluwas ug Manunubos sa kalibutan,” miingon si Presidente Dieter F. Uchtdorf, Ikaduhang Magtatambag sa Unang Kapangulohan. “Siya ang gisaad nga Mesiyas. Siya mipuyo og usa ka hingpit nga kinabuhi ug miula alang sa atong mga sala. Siya kanunay anaa gayud sa atong kiliran. Siya ang makig-away sa atong mga gubat. Siya mao ang atong paglaum; Siya mao ang atong kaluwasan; Siya mao ang dalan.”3
Dugang nga mga Kasulatan
Gikan sa mga Kasulatan
Ang mga babaye nga disipulo ni Kristo mga saksi sa Iyang tahas isip Mesiyas. Si Maria Magdalena usa ka disipulo ni Jesukristo. Siya mao ang unang nakakita nga “ang bato nakuha na gikan sa lubnganan” sa buntag sa Pagkabanhaw ni Kristo. Siya “nagtindog nga naghilak” human sa pagdiskobre nga ang Iyang lawas wala na sa lubnganan.
Dayon siya “[milingi] ug nakita niya si Jesus nga nagtindog, apan wala siya mahibalo nga kadto mao si Jesus.
“Si Jesus miingon kaniya, Babaye, nganong nagahilak ikaw? Kinsa may imong gipangita? Sa pagdahum niya nga kadto mao ang magbalantay sa tanaman, siya miingon kaniya, Senyor, kon ikaw man ang nagkuha kaniya, tug-ani ako diin mo siya ibutang, ug ako siyang kuhaon.
“Si Jesus miingon kaniya, Maria. Siya milingi ug miingon kaniya sa pinulongan nga Hebreohanon, Raboni; nga sa ato pa, Magtutudlo.” Si Maria nakamatikod nga Siya dili mao ang hardenero apan si Jesukristo, ang Mesiyas. (Tan-awa sa Juan 20:1–17.)