Atong mga Panimalay, Atong mga Pamilya
Kami Nasayud Kon Asa Siya
Ang tagsulat nagpuyo sa Colombia.
Ang among focus isip mahangturong pamilya kanunay nakasentro sa Dios.
Paghulagway pinaagi ni Michael T. Malm
Sa dihang ang mga nawong sa duha ka batan-ong lalaki makita sa ibabaw nga bahin sa pultahan sa among panimalay sa Colombia, abi namo nga nagpatong sila sa usa ka butang aron makita lahus sa pultahan. Wala diay; mga tag-as lang gyud sila! Among tres anyos nga anak nga lalaki, si Pablo Ezequiel, natingalang nagtan-aw nila. Sulod lang sa pipila ka adlaw sila nahimo niyang suod nga higala.
Ang among pamilya—si Ludy, ang akong asawa; sila Erika; Yesica; ug gamay nga Ezequiel—nangita sa Ginoo. Nagsunod na mi sa pipila ka mga baruganan sa ebanghelyo: kami mag-ampo inig pangaon, mag-ampo isip pamilya, ug kami adunay mga kalihokan sa pamilya. Ang among kinabuhi nakabase sa panaghiusa sa pamilya. Ang pakig-ilaila niadtong duha ka “dagkong mga anghel,” nga gitawag ni Ezequiel og mga elder, nagmatuod sa among mga binuhatan sa pagpalig-on sa pamilya ug pag-focus sa Dios.
Naggamit sa kasulatan isip ilang giya, sila si Elder Fa ug Fields mitudlo namo sa ebanghelyo. Kami nangamuyo sa Ginoo kon asa mi mosimba. Ang Basahon ni Mormon ug ang gipahiuli nga ebanghelyo nakatubag sa among mga pangutana sulod sa daghang tuig sa among mga diskusyon sa pamilya. Ang mga tubag hingpit nga mihaum, ug sa wala madugay namiyembro mi sa Simbahan. Usa ka tuig ang milabay kami mihimo og mga pakigsaad ug nabugkos isip mahangturon nga pamilya sa Bogotá Colombia Temple.
Nalipay kaayo mi sa pagkasayud nga among gipasugod among mga anak diha sa dalan sa ebanghelyo. Ang Espiritu anaa sa among kinabuhi ug panimalay, ug si Ezequiel, nga kwatro anyos pa kaniadto, nag-ampo nga dili gayud namo makalimtan. Siya miingon, “Pinalanggang Langitnong Amahan, nagpasalamat mi Kanimo niining buotan nga batang lalaki nga ako mismo, amen.” Kaming tanan miingon og amen ug naggakus nga nagpahiyom. Kadtong batang lalaki mao ang among kalipay.
Sa mosunod nga mga tuig, gihimo namong batasan ang pag-adto sa templo kanunay ug kami makaadto sa templo mga duha o tulo ka higayon kada tuig. Kami nagpuyo og 420 km (260 ka milya) gikan sa templo, apan kini ingon og dili kaayo layo para namo. Ang pagpangandam sa pag-adto sa templo kanunay makalingaw namo. Ang buhat sa family history usa ka prayoridad sa among mga anak, ug ganahan kaayo silang mopahigayon og mga bunyag alang sa patay. Kanunay adunay balaang pagpangandam ug dayon langitnong mga kasinatian diha sa balay sa Ginoo.
Si Ezequiel mitubo diha sa espiritu ug sa hugot nga pagtuo. Ang iyang inahan mao ang iyang pinakamahalon nga bahandi. Siya kanunay adunay espesyal nga pagdayeg alang kaniya. Usa ka adlaw siya misulti sa iyang inahan, “Mama, gihigugma ko ikaw labaw pa kay sa mga bukog sa dinosaur!” Kaming tanan nangatawa kay ang pagpangita og mga bukog sa dinosaur mao ang iyang paborito nga kalihokan.
Ang among bililhon nga anak nga si Ezequiel mipakigbahin og 14 ka tuig sa iyang kinabuhi uban kanamo diha sa ebanghelyo nga naghiusa kanamo. Siya dali nga mosunod kanunay. Ang iyang gugma misanag sa among panimalay. Ang iyang mga igsoong babaye ug mga Santos diha sa kasulatan mao ang iyang mga modelo. Siya aktibo kaayo ug puno sa kalihokan. Wala gayud siyay palta sa klase sa seminary. Iyang gipuno ang among panimalay og kalipay. Siya may balaan nga pagtahud kon siya nagpaambit sa sakrament. Apan ang among kinabuhi nausab sa dihang si Ezequiel mitaliwan padulong sa panimalay sa atong Langitnong Amahan. Gimingaw kaayo mi niya labaw pa sa among mahulagway.
Usa ka dili sagad nga impeksyon mikuha niya kanamo. Bisan pa sa grabe nga kasakit sa iyang pagtaliwan, kami sigurado nga makauban namo siya pag-usab. Among gihimo kining saad sa among pagbugkos diha sa templo. Ang kahaw-ang sa iyang pagtaliwan gipuno sa kahibalo nga siya gitawag sa Ginoo aron moserbisyo og misyon sa laing dapit. Ang lubong ni Ezequiel espesyal kaayo nga daghang mga tawo ang nadasig nga masayud kabahin sa Simbahan. Kanunay kong nanghinaut nga siya mag-misyon, ug karon iya kining gibuhat. Tungod sa plano sa kaluwasan, kami nasayud asa si Ezequiel ug kinsa iyang kauban.
Ang among focus naa gihapon sa among pamilya ug sa Dios. Kini among pagpamatuod nga ang Dios buhi ug adunay plano alang sa atong kinabuhi. Kita kinahanglan nga magpadayon sa hugot nga pagtuo. Ang pagtaliwan sa usa ka minahal nagpahinumdom kanato sa balaanong plano.
Pipila sa labing makapahupay nga mga pulong nga among nakaplagan nagagikan ni Propeta Joseph Smith. Sa among kasingkasing among giila ang katinuod niini: “Daghan ang gikuha sa Ginoo, bisan pa gani sa pagkamasuso, aron sila makaikyas sa pagkamasinahon sa tawo, ug sa mga kagul-anan ug mga kadautan niining kalibutan karon; hilabihan ra kaayo sila ka putli, hilabihan ka matahum, aron mopuyo sa yuta; busa, kon hunahunaon sa husto, imbis nga magbangutan aduna kita’y katarungan sa pagmaya kay gilikay sila gikan sa dautan, ug ato ra sila nga maangkon pag-usab” (Mga Pagtulun-an sa mga Presidente sa Simbahan: Joseph Smith [2007], 209).
Ang paglaum nga makita pag-usab si Ezequiel sa buntag sa Pagkabanhaw naghatag og kaisug sa among kalag ug nakatabang namo sa paglahutay sa malisud nga mga adlaw.