Mga Kamatuoran nga Bililhong Masayran
Gikan sa usa ka debosyonal nga pakigpulong sa Brigham Young University nga gihatag niadtong Nobyembre 6, 2011. Alang sa kompleto nga teksto sa Iningles, bisitaha ang speeches.byu.edu.
Kon kamo nadagma o nahisalaag sa usa ka higayon, kamo makapadayon sa unahan uban sa hugot nga pagtuo ug dili na maglatagaw ngadto ug nganhi sa kalibutan.
Ang pagkolekta o pagtan-aw og pornograpiya susama sa pagbutang og bitin sa inyong backpack.
PAGHULAGWAY SA LITRATO PINAAGI SA PeteSherrard/iStock/Thinkstock UG NI Brenda A. Carson/iStock/Thinkstock
Pipila ka batan-on adunay mga pangutana ug nangita og direksyon. Ang uban naglibug kon sa unsang paagi sila mitipas sa dalan sa ebanghelyo ug unsaon nila sa pagbalik. Samtang ako mamulong ngadto sa tanan, ako labing mainitong mamulong ngadto ninyo nga nagtinguha.
Ang Inyong Espirituhanong Account
Kitang tanan nagpuyo nga espirituhanong nangutang [credit]. Sa usa o laing paagi, ang utang nagdako. Kon bayran ninyo kini dayon, dili kaayo mo mabalaka. Sa dili madugay kamo makat-on og disiplina ug masayud nga moabut ang adlaw sa pagpaningil. Pagkat-on nga regular nga mobayad sa inyong espirituhanong account kay sa pagtugot niini nga mangolekta og interes ug mga silot.
Tungod kay kamo gisulayan, gipaabut nga kamo masayop. Nagtuo ko nga kamo nakabuhat og mga butang sa inyong kinabuhi nga inyong gibasulan, mga butang nga dili gani kamo makapangayo og pasaylo, ni makakoriher; busa, kamo nagdala og alantuson. Tingali, kamo, mobati sa hunahuna ug pisikal nga dili makahimo o nabug-atan sa espirituhanong account nga gimarkahan og “past due.” Kon makaamgo kamo sa kamatuoran sa inyong kaugalingon sa hilum nga mga pagpamalandong (nga gilikayan sa kadaghanan nato), aduna bay wala masulbad nga mga butang nga naghasol ninyo? Aduna bay nakahasol sa inyong konsensya? Kamo ba adunay sala gamay man o dako?
Kanunay kaming makadawat og mga sulat gikan niadtong nakahimo og dakong sayop ug nabug-atan. Sila nanghangyo: “Mapasaylo pa kaha ko? Mausab pa kaha ko?” Ang tubag oo! (Tan-awa sa 1 Mga Taga-Corinto 10:13.)
Ang Paghinulsol Makahupay
Ang ebanghelyo nagtudlo nato nga ang kahupayan gikan sa kasakit ug kahasol sa konsensya makab-ot pinaagi sa paghinulsol. Gawas lang sa pipila—kadtong diyutay ra kaayo—kinsa misunod sa kapildihan human makahibalo sa kahingpitan, walay kinaiya, walay pagkaadik, walay rebelyon, walay kalapasan, walay sala nga gamay o dako nga dili labut sa saad sa hingpit nga kapasayloan. Bisan unsa ang nahitabo sa inyong kinabuhi, ang Ginoo miandam og paagi alang sa inyong pagbalik kon mopatalinghug mo sa mga aghat sa Espiritu Santo.
Ang uban napuno sa kusganong paghulgo, usa ka tintasyon nga nagbalik-balik sa hunahuna, tingali mahimong kinaiya, dayon sa pagkaadik. Kita hilig sa ubang mga kalapasan ug sala ug usab mangatarungan nga kita walay sala tungod kay ingon ana kita nga gipakatawo. Nalit-ag kita, ug tungod niini moabut ang kasakit ug mga kasakit nga ang Manluluwas lamang ang makaayo. Kamo adunay gahum sa paghunong ug matubos.
Usa ka Bitin nga Ginganlan og Pornograpiya
Si Presidente Marion G. Romney (1897–1988), Unang Magtatambag sa Unang Kapangulohan, miingon nako sa makausa, “Ayaw lamang sila sultihi aron sila makasabut, sultihi sila aron dili nila malain sa pagsabut.”
Busa paminaw! Mamulong ako sa yano isip gitawag ug dunay obligasyon sa paghimo niini.
Kamo nagpuyo sa panahon nga ang tunglo sa pornograpiya mikuyanap sa tibuok kalibutan. Lisud nga makalingkawas niini. Ang pornograpiya nag-focus niana nga bahin sa inyong kinaiyanhon diin kamo dunay gahum sa pagmugna og kinabuhi.
Ang pag-apil sa pornograpiya mosangpot sa mga kalisdanan, diborsyo, sakit, ug mga kasamok nga daghan kaayo. Walay bahin niini nga inosente. Sa pagkolekta niini, pagtan-aw niini, o pagdala niini sa bisan unsa nga matang sama ra sa pagbutang og bitin sa inyong backpack. Nabantang kamo sa dili kapugngan nga sama sa espirituhanong katumbas sa pag-ataki sa bitin gamit ang makamatay nga hilo. Sayon kining masabtan, sa kalibutan nga ingon niini, nga kamo inosenting mabantang ngadto niini, sa pagbasa niini, o sa pagtan-aw niini nga wala maghunahuna sa grabe nga mga sangputanan. Kon kana mao kamo, ako mopasidaan ninyo sa paghunong niini. Hunonga kini karon!
Ang Basahon ni Mormon nagtudlo nga ang tanang tawo “gitudloan sa igo nga sila masayud sa maayo gikan sa dautan” (2 Nephi 2:5). Kana naglakip kaninyo. Kamo nasayud unsa ang husto ug unsa ang sayop. Pagmatngon nga dili molabang niana nga linya.
Bisan og kadaghanan sa mga sayop mahimong ikumpisal sa tago ngadto sa Ginoo, adunay pipila ka mga kalapasan nga nagkinahanglan og labaw pa niana aron mapasaylo. Kon ang inyong mga sayop grabe, pakigkita sa inyong bishop. Kondili, ordinaryo nga pagkumpisal, hilom ug personal, mahimo. Apan hinumdumi, kanang buntag sa pagpasaylo dili moabut diha-diha dayon. Kon sa una kamo nasayop, ayaw pag-undang. Ang pagbuntog sa pagkawalay kadasig kabahin sa pagsulay. Ayaw pag-undang. Sama sa akong gitambag sa una, kon nakumpisal ug nabiyaan na ninyo ang mga sala, ayaw na paglingi.
Ang Ginoo anaa kanunay. Andam siyang mag-antus ug mobayad sa silot kon kamo andam sa pagdawat Kaniya isip inyong Manunubos.
Ang Pag-antus sa Manluluwas alang sa Atong mga Sala
Isip mga mortal, kita mahimong wala—dili gayud—makasabut sa hingpit kon sa unsang paagi gituman ni Jesukristo ang Iyang maulaon nga sakripisyo. Apan sa pagkakaron ang giunsa dili ingon ka importante sa ngano sa Iyang pag-antus. Nganong gihimo Niya kini alang kaninyo, alang kanako, alang sa tanang katawhan? Gihimo niya kini tungod sa Iyang gugma sa Dios nga Amahan ug sa tanang katawhan. “Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala” (Juan 15:13).
Didto sa Getsemani, si Kristo milakaw palayo sa Iyang mga Apostoles aron mag-ampo. Ang bisan unsay nahitabo dili nato matugkad! Apan kita nasayud nga Iyang natuman ang Pag-ula. Andam Siyang midala sa iyang Kaugalingon sa mga sayop, sa mga sala ug kasaypanan, sa pagduha-duha ug mga kahadlok sa tibuok kalibutan. Nag-antus Siya alang nato aron kita dili mag-antus.
Ang Kompleto nga Kapasayloan Posible
Kon kamo nadagma o nahisalaag, kon inyong gibati nga ang kaaway karon nag-ulipon kaninyo, makapadayon kamo uban sa hugot nga pagtuo ug dili na mahisalaag pa ngadto ug nganhi sa kalibutan. Adunay mga tawo kinsa andam nga mogiya kaninyo balik ngadto sa kalinaw ug kasiguroan. Ang grasya sa Dios, sama sa gisaad sa mga kasulatan, moabut “human sa tanan nga atong mabuhat” (2 Nephi 25: 23). Ang posibilidad niini, ngari kanako, mao ang kamatuoran nga bililhong mahibaloan.
Mosaad ko nga moabut ang maanindot nga kabuntagon sa kapasayloan. Dayon ang “kalinaw sa Dios, nga lapaw sa tanang pagpanabut” (Taga-Filipos 4:7) moabut nganha sa inyong kinabuhi pag-usab, sama sa usa ka pagsubang sa adlaw, ug kamo ug Siya “dili na gayud hinumdoman ang [inyong] mga sala” (Jeremias 31:34). Unsaon ninyo pagkahibalo nga kamo napasaylo? Makahibalo kamo! Tan-awa sa Mosiah 4:1–3.
Mao nga mianhi Ako aron sa pagtudlo kaninyo nga anaa sa kasamok. Siya manginlabut ug mosulbad sa problema nga dili ninyo masulbad, apan kamo kinahanglang mobayad sa bili. Dili kini moabut nga dili mobuhat niana. Siya buotan kaayo nga magmamando sa pagsabut nga Siya mobayad kanunay sa kantidad nga gikinahanglan, apan gusto Niya nga inyong buhaton unsay kinahanglan ninyong buhaton, bisan og kini masakit.
Gihigugma nako ang Ginoo, ug ang Amahan nga mipadala Kaniya. Ang atong mga palas-anon sa kasagmuyo, sala, ug kasaypanan mahimong ihikyad sa Iyang atubangan, ug sa Iyang kalooy, ang matag usa ka utang mahimong markahan “nabayran sa hingpit.” (Tan-awa sa Isaias 1:18–19.)
Pagpuyo nga Matinud-anon ug Pabilin nga Takus
Mosaad ko nga moabut ang maanindot nga kabuntagon sa kapasayloan.
Ang mga kasulatan “pagkat-on og kaalam diha sa imong kabatan-onan; oo, pagkat-on sa imong kabatan-on sa paghupot sa mga sugo sa Dios” (Alma 37: 35) usa ka pagdapit nga inubanan sa saad sa kalinaw ug panalipod gikan sa kaaway. (Tan-awa usab 1 Timoteo 4:12.)
Ayaw pagdahum nga ang tanan maayo ra sa inyong tibuok kinabuhi. Bisan kadtong nagpuyo nga matarung, usahay ang sukwahi maoy mahitabo. Atubanga ang mga hagit sa kinabuhi uban ang paglaum ug kasiguroan, ug kamo makabaton sa kalinaw ug hugot nga pagtuo nga magpaluyo kaninyo karon ug sa umaabut.
Alang niadtong kinsa wala pa makadawat sa tanang mga panalangin nga sa inyong paminaw inyong gusto ug gikinahanglan, ako nagtuo gayud nga walay kasinatian o oportunidad nga mahinungdanon alang sa katubsanan ug kaluwasan ang ihikaw kaninyo kinsa nagpuyo nga matinud-anon. Pabilin nga takus; pagmalaumon, pagmapailubon, ug pagmainampoon. Duna ray paagi nga kini mahitabo. Ang gasa sa Espiritu Santo mogiya kaninyo ug mogiya sa inyong mga lihok.
Ako nakaila ninyo isip kabatan-onan sa Simbahan, ug ako nakasabut nga kamo dili hingpit, apan kamo nagsubay niana nga dalan. Pagbaton og kaisug. Hibaloi nga si bisan kinsa nga tawo nga adunay lawas adunay gahum ibabaw sa usa ka tawo nga walay lawas.1 Si Satanas wala hatagi og lawas; mao nga kon mag-atubang kamo og mga tintasyon, hibaloi nga inyong mabuntog kadtong tanang mga tintasyon kon inyong gamiton ang kabubut-on nga gihatag ngadto ni Adan ug Eva sa tanaman ug gihatag ngadto niini gayud nga kaliwatan.