Ngano Ang Kaminyoon Talagsaon!
Ang mga tagsulat nagpuyo sa Utah, USA.
Kami ganahan nga naminyo, ug ania kon ngano.
Human sa among unang pag-date, kaming duha nasayud nga kami gusto nga mag-date pag-usab. Si Ben gusto nga makig-date pag-usab tungod kay si Rachel mahigalaon ug makalingaw nga ikaistorya. Si Rachel gusto nga makig-date pag-usab tungod kay si Ben usa ka gentleman ug nagpahiyum pa gihapon human sa tanang kapakyasan sa iyang plano. Human sa ikaduhang date, ug daghan pang mga pakig-date ug pag-ampo human niana, kami nagkahigugmaay ug nakahukom nga magminyo sa Sacramento California Temple.
Ang adlaw sa kasal nindot gyud kaayo, ug kami ganahan nga naminyo sukad niadto. Ang kalibutan mahimong lahi ang pagtan-aw sa kaminyoon, apan kami nasayud nga “walay laing relasyon sa bisan unsa nga matang ang makahatag og hingpit nga kalipay, makahimo og mas maayo o makamugna og ingon ka personal nga pagkalunsay.”1 Ang kaminyoon talagsaon, ug ania kon ngano.
Gikan ni Ben: Ang Teammate
Atol sa akong misyon sa Brazil, naganahan ko sa football. Usa ka butang nga akong ganahan kaayo niini nga sport mao ang mga teammate ug pagkat-on unsaon sa pagtambayayong uban sa akong team. Si Rachel usa ka talagsaong teammate. Siya nagtabang nako nga makab-ot ang akong mga tumong, miapil nako sa paghimo og importanting mga desisyon, ug anaa alang nako kon ako dunay problema.
Sa dihang kami nabugkos sa templo, kami nagsinaaray sa “pagtabang sa usag usa isip katugbang nga magkapares.”2 Si Rachel ug ako maningkamot sa pagsuporta sa usag usa ingon nga managkauban, ug nindot kaayo nga masayud nga kanunay ko nga dunay usa ka kasaligan nga teammate.
Gikan ni Rachel: Pagpahayag sa Gugma
Dawaton na lang nato kini, mga babaye (ug mga lalaki), nindot nga masayud nga dunay nahigugma nimo. Ug kon kamo maminyo na, kamo dunay kahigayunan sa pagpakigbahin ug pagdawat og gugma sa matag adlaw! Sa dihang nakig-istorya ko sa akong mga ginikanan mahitungod sa posibilidad sa pakigminyo ni Ben, ang akong papa miingon, “Bisan kinsa ang imong pilion nga minyoan, gusto ko nga siya kanunay ug sinserong mopadayag sa iyang gugma alang nimo sama sa gibuhat ni Elder Richard G. Scott alang sa iyang asawa.”3 Naminaw ko ni Papa.
Mihukom ko nga minyoan si Ben, ug siya kanunay naningkamot sa pagpahayag sa iyang gugma nako sa gagmay ug dagko nga mga paagi. Atol sa akong senior nga tuig sa kolehiyo, naningkamot ko sa daghang mga bulan sa pag-andam, pag-apply, ug pag-interbyu alang sa usa ka inila nga internship. Ug sa katapusan nga nadungog nako nga nadawat ko sa trabaho, mipauli ko ug nakita ang usa ka plorera nga puno sa bulak gikan sa akong bana. Nasayud siya unsa ang akong paningkamot ug unsa ka importante ang internship ngari nako. Sa laing mga higayon, iyang tagoan ang akong paborito nga ilimnon ug usa ka sulat sa gugma nga ibutang diha sa refrigerator sa dili pa siya moadto sa Scout camp. Ug matag adlaw, siya ang manghugas sa plato ug mopakatawa nako. Mopadayag gyud si Ben sa iyang gugma kanako, ug kana nakahatag og dakong kalipay namong duha.
Gikan ni Ben: Labaw nga Kalipay
Ang pagpakig-date ni Rachel makalingaw kaayo. Sa pagkatinuod, among gisiguro nga mag-date gihapon mi kanunay isip magtiayon. Human sa among unang panagkita, among nasayran nga malingaw mi og daghang sama nga mga kalihokan: maglakaw-lakaw sa parke, motan-aw og mga drama, motan-aw og mga sports, mokaon og bag-o ug lain-laing pagkaon, maminaw sa musika, ug daghan pa. Ganahan ko niining mga butanga sa wala pa nako makaila si Rachel, apan mas makalingaw karon nga kaming duha ang maghimo niini. Kon ikaw maminyo, ikaw dunay kauban sa pagtagamtam sa kinabuhi—ug mao kanay nakapanindot sa kinabuhi.
Gikan ni Rachel: Usa Ka Mahangturong Misyonaryo nga Kompanyon
Sa wala pa nako mahimamat si Ben, hapit na ko moabut sa edad nga magmisyon ug seryosong naghunahuna og full-time nga misyon. Apan dayon miabut si Ben sa akong kinabuhi, ug ako nasayud nga ang Langitnong Amahan dunay laing mga plano alang nako.
Sa dihang si Ben ug ako kaslunon, ang mga paryente nga nasayud sa akong mga hunahuna sa pagserbisyo og misyon nangutana nako mahitungod sa akong mga pagpili, ug ako misulti nila, “Ako nakahukom nga ako mopili sa akong misyonaryo nga kompanyon—ug magpabilin uban kaniya sa kahangturan.”
Kon ikaw maminyo, ikaw ug ang imong kapikas dunay kahigayunan sa pag-apil sa buhat sa kaluwasan. Si Ben ug ako nakakaplag og dakong kalipay sa pagtukod og usa ka panimalay nga nakasentro kang Kristo, pagtuon ug pagsunod sa ebanghelyo, pag-alagad sa Simbahan, ug pagdapit sa uban sa pagduol ngadto kang Kristo. Samtang kami magtinabangay sa pagtukod sa gingharian sa Dios, nagkasuod kami, nalig-on ang among gugma, ug ang kinabuhi mas malipayon.
Tuo sa Among Gisulti
Bisan unsa ang isulti sa kalibutan, ang kaminyoon nindot ug bililhon nga maoy himoong prayoridad. Kon ikaw minyo, ikaw dunay usa ka teammate, ikaw mohatag ug modawat og gugma, mas matagamtaman nimo ang kinabuhi, ug ikaw dunay kauban sa pagtukod sa gingharian sa Dios. Kining tanan nakahatag namo og kalipay, ug tungod kay kami nabugkos didto sa templo, kami makabaton niini nga kalipay sa kahangturan! Kon kami motuman sa among mga pakigsaad, kami magkauban sa kahangturan ug makadawat sa labing mahinungdanon nga mga panalangin sa priesthood. Among “nakita ang kaminyoon nga labing bililhon nga katumanan sa tawhanong kinabuhi.”4