Mensahe sa Visiting Teaching, Oktubre 2014
Ang Langitnon nga Misyon ni Jesucristo: Tinapay nga Nagahatag sang Kabuhi
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, mag-log on sa reliefsociety.lds.org.
Pagtuo, Pamilya, Bulig
Si Jesus nagsiling, “Ako ang buhi nga tinapay nga nagkari gikan sa langit: kon bisan sin-o ang magkaon sining tinapay, magakabuhi sia sing dayon” (Juan 6:51). “Si Jesus nagatudlo sa aton, nga Iya mga sumulunod, nga dapat kita magdangup sa Dios sa tagsa ka adlaw para sa tinapay,— ang bulig kag pagkaon— nga kinahanglanon naton sa sina nga adlaw,” siling ni Elder D. Todd Christofferson sang Korum sang Napulo’g Duha ka mga Apostoles. “Ang pangagda sang Ginuo… nagapakita sang isa ka mapinalanggaon nga Dios, nga nakahibalo bisan sang pinakagamay, nga pang-adlaw-adlaw nga panginahanglan sang Iya kabataan kag handa sa pagbulig sa ila, sing kada isa. Nagasiling Sia nga mahimo kita magpangayo nga may pagtuo sa Iya ‘nga nagahatag sing maalwan sa tanan nga tawo kag wala nagabasul, kag hatagan sia sini’ (Santiago 1:5).”1 Sa aton paghibalo nga si Jesucristo magahatag sang aton mga panginahanglan, magadangup kita sa Iya para sa aton espirituhanon nga kalan-on.
Si Elder Jeffrey R.Holland sang Napulo’g Duha ka mga Apostoles nagaagda sa aton nga “mag-upod sa makakulunyag nga eksperiyensya sang pinakauna nga mga disipulo ni Cristo nga naghandum man sang tinapay nga nagahatag sang kabuhi— yadtong mga wala na nagpauli kundi nagkari sa Iya, nagpabilin upod sa Iya, kag nagkilala nga para sa kahilwayan kag kaluwasan wala na sila sang iban pa nga madangpan.”2
Dugang nga Balaan nga mga Kasulatan
Gikan sa Balaan nga mga Kasulatan
Si Jesucristo nagtudlo sang panong sang masobra 4,000 ka mga tawo. Pagligad sang tatlo ka adlaw, nagsiling Sia sa Iya mga disipulo: “Nalooy ako sa kadam-an, kay wala gid sila … sang kaunon:
“Kag kon akon sila papaulion sa ila mga balay nga ginagutum, punawon sila sa dalanon. …
“Kag ang iya mga gintoton-an nagsabat sa iya, Paano bala ang pagkasarang ta sa pagbusug sining mga tawo sing tinapay diri sa desierto?
“Kag si [Jesus] namangkot sa ila, Pila bala ka bilog ang tinapay ninyo? Nagsabat sila, Pito.”
Dayon si Cristo “ginkuha niya ang pito ka tinapay, kag sang nakapasalamat, gintipiktipik niya kag ginhatag ini sa iya mga gintoton-an nga ibutang sa atubangan sang katawohan; …
“Kag may pila sila ka isda nga magamay: Kag sang napakamaayo niya ini, nagsugo sia nga ibutang man ini sa atubangan nila.
“Kag nagkaon sila, kag nabusog: Kag gintipon nila ang mga tinipik nga nabilin, pito ka alat nga puno.” (tan-awa sa Marcos 8:1–9.)
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas.Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang Visiting Teaching Message, October 2014. Hiligaynon. 10870 861
Binagbinaga Ini
Kon magkari kita kay Cristo, paano Niya kita ginapakaon?