Mensahe sang Unang Panguluhan, Oktubre 2014
Ang Pangamuyo sang Pagtuo
Ang pangamuyo masobra pa sangsa mga tinaga nga ginahambal naton sa Dios. Isa ini ka pagbaslanay sang sugilanon sa tunga sang Dios kag sang Iya mga kabataan.
Kon ang pangamuyo ginagamit subong sa nagakadapat, ginapabutyag naton ang aton mga balatyagon sa simple nga mga tinaga. Ang Amay nga Langitnon sa masami nagasabat paagi sa pagbutang sang mga huna-huna sa aton mga pamensaron nga ginaupdan sang mga balatyagon. Pirme Niya ginapamatian ang hugot nga pangamuyo nga aton ginasambit kon nagapangamuyo kita nga desidido sa pagtuman sa Iya, bisan ano man ang Iya sabat kag bisan kon san-o man ini mag-abot.
Ang Ginuo nagapromisa sini sa tanan nga nagabasa kag nagapangamuyo parte sa Libro ni Mormon.
“Kag kon inyo mabaton ining mga butang, ginalaygayan ko kamo nga mamangkot kamo sa Dios, ang Wala’y Katapusan nga Amay, sa ngalan ni Cristo, kon ining mga butang indi matuod; kag kon kamo mamangkot sa isa ka bunayag nga tagipusuon, sa matuod-tuod nga tinutuyo, nga may pagtuo kay Cristo, ipakita niya ang kamatuoran sini sa inyo, paagi sa gahum sang Balaan nga Espiritu.”
“Kag paagi sa gahum sang Balaan nga Espiritu mahimo ninyo nga mahibal-an ang kamatuoran sang tanan nga mga butang.”Moroni 10:4–5).
Inang promisa pat-od gid. Minilyon nga katawhan ang nagtilaw kag nakapamatuod sinang manami nga promisa parte sa pangamuyo sa pagbaton nila sang mga bugay nga nagpuno sang ila mga kabuhi sang kasadya kag wala’y untat nga kalipayan. Inang promisa nagakaigo man para sa tanan naton nga mga pangamuyo agud mahibaloan ang luyag kag pagbuot sang Dios para sa aton. Madapat naton ini sa tagsa ka tion nga makabaton kita sang laygay gikan sa isa ka alagad sang Dios nga awtorisado sa paghatag sa aton sang direksyon. Halimbawa, makasalig kita sini kon nakapamati kita sa isa ka sermon sa general conference. Madapat naton ini kon ginatudloan kita sang mapainubuson nga mga misyonero nga gintawag sang Dios paagi sa buhi nga propeta. Nagakaigo man ini nahanungod sa laygay nga mabaton naton gikan sa aton bishop ukon branch president.
Agud ang pangamuyo mangin epektibo sa aton mga kabuhi, ang mga pagsulundan simple lang. Kinahanglan naton magpamangkot agud mahibaloan ang kamatuoran paagi sa pagpangamuyo sa Amay sa ngalan ni Jesucristo. Kinahanglan naton magpamangkot nga may bunayag nga tagipusuon, nga nagakahulugan nga kinahanglan may ara kita sang matuod-tuod nga tinutuyo sa paghimo sang kon ano man ang ginapangayo sa aton sa sabat sang Dios. Kag ang aton matuod-tuod nga tinutuyo dapat maggikan sa aton pagtuo kay Jesucristo.
Ang investigator nga nagabasa sang Libro ni Mormon antes mabunyagan kag makumpirmahan mahimo magbaton alangay sang pasalig nga ang libro matuod kag sang panaksihon nga ginbadbad (translate) ini ni Joseph Smith paagi sa gahum sang Dios. Pagkatapos makumpirmahan nga isa ka miyembro sang Simbahan, sarang naton maangkon ang Balaan nga Espiritu nga mangin aton kaupod agud magsaksi sa iban pa nga mga kamatuoran. Dayon, sa tagsa nga nagapangamuyo kita nga may pagtuo, sarang kita makapaabot nga ang Balaan nga Espiritu magapamatuod sa aton nga si Jesus amo ang Cristo, nga ang Dios nga Amay buhi, kag nga Sila nagapalangga sa aton kag sa tanan nga mga anak sang Amay nga Langitnon.
Amo ina ang isa ka rason nga may promisa sa Libro ni Mormon nga makaangkon kita sang putli nga gugma ni Cristo sa aton mga tagipusuon samtang ang Balaan nga Espiritu nagapamatuod sa aton nga si Jesus amo ang Cristo: “Kon ang isa ka tawo malulo kag kubos sa tagipusuon, kag nagatuad paagi sa gahum sang Balaan nga Espiritu nga si Jesus amo ang Cristo, kinahanglan gid sia nga may putli nga pagmahal” (Moroni 7:44).
May daku nga kahigayunan sa pagtubo sing espirituhanon tagsa ka Domingo sang puasa. Ang Domingo sang puasa makabulig sa aton nga mabatyagan ang naeksperiyensyahan ni Alma kag sang mga anak ni Mosias, nga nagpangamuyo kag nagpuasa agud mahibaloan ang wala’y katapusan nga kamatuoran para makatudlo sila sa mga Lamanhon nga may gahum, awtoridad, kag pagpalangga. (tan-awa sa Alma 17:3, 9).
Sa Domingo sang puasa ginaupod naton ang pagpangamuyo kag pagpuasa. Agud mabugayan ang imol, nagahatag kita sang maalwan nga tanyag-puasa sa bishop ukon sa branch president nga katumbas sang bili sang duha ka kalan-an nga aton ginapaiway. Ang aton mga huna-huna kag aton mga pangamuyo natuon sa Manluluwas kag sa mga gusto Niya nga alagaran naton paagi sa pag-atipan sang ila espirituhanon kag temporal nga mga panginahanglan.
Sa sina ang aton mga pangamuyo kag mga luyag mas nagalapit sa mga pangamuyo kag mga luyag sang Manluluwas sa aton pagpuasa agud mangin mas malulo, mahapos tudloan, kag mapinalanggaon. Kag subong sa Iya ginhimo, nagapangamuyo kita agud mahibaloan ang pagbuot sang Amay para sa aton kag agud tumanon ini.
© 2014 iya lang sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, October 2014. Hiligaynon. 10870 861
Pagtudlo gikan sa Sining Mensahe
Si Pangulong Eyring nagatudlo nga ang pangamuyo kag pagpuasa makabulig sa aton nga “mahibaloan ang wala’y katapusan nga kamatuoran.” Binagbinaga kon sa ano nga aspeto ang mga panaksihon sang inyo mga ginabisitahan mahimo nagakinahanglan sang pagpabakod kag maghanda sang isa ka leksyon sa sina nga topiko. Halimbawa, kon ang isa ka tawo nga inyo ginabisita napatyan sang isa ka suod nga abyan ukon miyembro sang pamilya, binagbinaga ang paghambal parte sa wala’y katubtuban nga mga pamilya kag kabuhi sa pagkatapos sang kamatayon. Mahimo kamo magtanyag nga magpuasa upod sa inyo ginabisita agud mabuligan sila nga makaangkon sang panaksihon parte sina nga prinsipyo.