Mensahe iti Visiting Teaching, Oktubre 2014
Ti Nadiosan a Mision ni Jesucristo: Tinapay ti Biag
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati • Pamilia • Tulong
Kinuna ni Jesus, “Siak ti tinapay a sibibiag a bimmaba manipud langit: no adda mangan itoy a tinapay, Agbiagto nga agnanayon” (Juan 6:51). “Isuro ni Jesus kadatayo, dagiti disipulona, a nasken a kumitatayo iti Dios iti inaldaw para iti tinapay—ti tulong ken pannakataraon—a kasapulantayo iti dayta a naisalsalumina nga aldaw,” kinuna ni Elder D. Todd Christofferson ti Korum dagiti Sangapulo-ket-dua nga Apostol. Ti awis ti Apo… ibagana maipapan iti managayat a Dios, ammona uray ti bassit, inaldaw a kasapulan dagiti annakna ken aggagar a mangtulong kadakuada, a saggaysa. Kunkunana a mabalintayo ti agkiddaw a sipapammati maipapan iti dayta a Tao ‘a mangted a sikakaasi kadagiti isu amin, ket saan a mangpabain; ket maitedto kenkuana’ (Santiago 1:5).”1 Bayat ti pannakaawattayo nga ipaayto ni Jesucristo dagiti kasapulantayo, umasidegtayto Kenkuana para iti naespirituan a pannakataraontayo.
Awisennatayo ni Elder Jeffrey R. Holland ti Korum dagiti Sangapulo-ket-dua nga Apostol “a kumappengtayo iti pannakigasanggasat dagiti kaunaan a disipulo ni Cristo a naggagar met iti tinapay ti biag—dagiti tao a saan a nagsubli ngem napanda Kenkuana, nagbatida Kenkuana, ken nangbigbig a para iti talged ken pannakaisalakan awan ti sabali pay a tao a mabalinda a papanan.”2
Dagiti Mainayon a Nasantuan a Kasuratan
Manipud kadagiti Nasantuan a Kasuratan
Isursuro ni Jesucristo ti dakkel nga ummong ti nasurok a 4,000 a tattao. Kalpasan ti tallo nga aldaw, kinunana kadagiti disipulona: “Maasiannak kadagitoy adu unay a tattao, … nga awan ti makanda:
“Ket no pagawidek ida kadagiti balbalayda a dida pay nangan, agkapuydanto iti dalan. …
“Ket dagiti adalanna simmungbatda kenkuana, Asino ti mabalin a mangbussog kadakuada iti tinapay ditoy maysa a let-ang?
“Ket [ni Jesus] inimtuudna kadakuada, Mano dagiti tinapay nga adda kadakayo? Ket kinunada, Pito.”
Kalpasanna ni Cristo “innalana dagiti pito a tinapay, ket idi a nakapagyaman, pinisipisina, ket intedna kadagiti adalanna tapno isangona kadakauada; …
“Ket adda met sumagmamano nga ikanda a babassit: ket idi a binendisionanna ida, imbilinna nga ikabilda met dagitoy iti sanguananda.
“Nanganda ngarud, ket nabsogda: ket innalada dagiti pisipisi a natda pito nga alat a napno.” (Kitaen iti Marcos 8:1–9).
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, October 2014. Ilokano. 10870 864
Panunotenyo Daytoy
No umasidegtayo ken ni Cristo, kasano a mataraonannatayo?