Mensahe ti Umuna a Panguluen, Oktubre 2014
Ti Kararag ti Pammati
Ti kararag ket ad-adda pay ngem kadagiti balikas nga isasaotayo iti Dios. Daytoy ket dua a wagas a komunikasion iti nagbaetan ti Dios ken dagiti annakna.
No agtrabaho ti kararag a kas iti nasken, yebkastayo ti rikna ti puspusotayo kadagiti simple a balikas. Gagangay a sumungbat ti Nailangitan nga Ama babaen ti panangikabilna iti panunot iti isiptayo a buyogan dagiti riknatayo. Kanayon a denggenna ti napudno a kararag nga iruknoytayo no agkararagtayo nga addaan iti panagkumit nga agtungpal Kenkuana, ania man ti sungbatna ken no oras nga umay daytoy.
Aramiden ti Apo daytoy a kari iti amin nga agbasa ken agkararag maipapan iti Libro ni Mormon:
“Ket inton awatenyo dagitoy a banag, igunamgunamko a dawatenyo iti Dios, ti Agnanayon nga Ama, iti nagan ni Cristo, no saan a pudno dagitoy a banag; ket no naimpusuan ti idadawatyo, ken addaan iti pudno a panggep, ken addaan iti pammati ken ni Cristo, iparangarangna ti kinapudnona kadakayo, babaen ti pannakabalin ti Espiritu Santo.
“Ket babaen ti pannakabalin ti Espiritu Santo maammuanyo ti kinapudno ti amin a banag”(Moroni 10:4–5).
Awan duadua a matungpal dayta a kari. Sinubok ken napaneknekanen ti minilmilion a tattao dayta napintas a kari maipapan iti kararag babaen ti panangawat iti bendision a nangpunno iti biagda iti rag-o ken manayon a ragsak. Mayaplikar dayta a kari iti amin a kararagtayo tapno maammuan ti panunot ket pagayatan ti Dios para kadatayo. Mayaplikartayo daytoy iti kanito nga awatentayo ti balakad manipud iti maysa a katulongan ti Dios a napusgan a mangted kadatayo iti pangiturong. Kas pagarigan, makapagpannuraytayo iti daytoy no dimngngegtayon iti maysa a mensahe iti sapasap a komperensia. Mayaplikartayo daytoy no nasuruandatayo dagiti napakumbaba a misionario nga inawagan ti Dios babaen ti sibibiag a propeta. Mayaplikar met daytoy iti balakad nga awatentayo manipud iti bishop wenno branch presidenttayo.
Tapno mayaplikar ti kararag iti panagbiagtayo, simple dagiti annuroten. Nasken nga idawattayo nga ammuen no ania ti pudno babaen ti panagkararag iti Ama iti nagan ni Jesucristo. Nasken nga agkararagtayo nga addaan iti napudno a puso, a kayatna a sawen nasken a maaddaantayo iti napudno a panggep a mangaramid iti no ania ti sungbat ti Apo nga idawatna kadatayo. Ken nasken nga agtaud ti pudno a panggeptayo manipud iti pammatitayo ken ni Jesucristo.
Ti investigator a mangbasa iti Libro ni Mormon sakbay ti pannakabuniag ken pannakakumpirmana ket mabalinna ti umawat iti pammatalged a pudno ti libro ken iti pammaneknek nga impatarus daytoy ni Joseph Smith babaen ti bileg ti Dios. Kalpasan ti pannakakompirmatayo a miembro ti Simbaan, maaddaantayo iti Espiritu Santo kas kadkaduatayo a mangipatalged iti dadduma pay a kinapudno. Kalpasanna, no agkararagtayo a sipapammati, manamnamatayo nga ipaneknekto ti Espiritu Santo kadatayo a ni Jesus isu ti Cristo, a sibibiag ti Dios Ama, ken ay-ayatendatayo ken ti amin nga annak ti Nailangitan nga Ama.
Dayta ti maysa a gapu nga adda kari iti Libro ni Mormon nga addaantayonto iti asi iti puspusotayo kas iti panagpaneknek ti Espiritu Santo kadatayo a ni Jesus isu ti Cristo: “No nadayaw ti tao ken napakumbaba ti pusona ket ipudnona babaen ti pannakabalin ti Espiritu Santo a ni Jesus ti Cristo, masapul nga adda kenkuana ti asi” (Moroni 7:44).
Adda dakkel a gundaway tapno dumur-as a iti kinaaespirituan iti tunggal Domingo a panagayuno. Makatulong ti Domingo a Panagayuno a mangyasideg kadatayo kadagiti padas ni Alma ken dagiti annak a lallaki ni Mosiah, a nagkararag ken nagayunoda tapno maammuanda ti agnanayon a kinapudno tapno makaisuroda kadagiti Lamanite nga addaan iti bileg, turay, ken ayat (kitaen iti Alma 17:3, 9).
Iti Domingo a panagayuno paggiddanentayo ti panagkararag ken panagayuno. Para iti pannakaparabur dagiti marigrigat wenno napanglaw, mangtedtayo iti nawadwad a daton iti panagayuno iti bishop wenno iti branch president a kapada ti gatad ti dua a pannangan a ditayo kinnan. Maiturong dagiti panunot ken kararagtayo iti Mangisalakan ken kadagiti indawatna a pagserbiantayo babaen ti panangipaaytayo kadagiti naespirituan ken temporal a kasapulanda.
Iti kasta agbalin dagiti kararag ken tarigagaytayo nga ad-adda a kas iti kararag ken tarigagay ti Mangisalakan no agayunotayo tapno agbalin nga ad-adda a napakumbabatayo, nalaka a masuruan, ken managayattayo. Ken kas iti inaramidna, agkararagtayo tapno maammuan ti pagayatan ti Ama para kadatayo ken tapno maaramidtayo daytoy.
© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti First Presidency Message, October 2014. Ilokano. 10870 864
Panangisuro manipud iti Daytoy a Mensahe
Isuro ni Presidente Eyring a makatulong kadatayo ti panagkararag ken panagayuno tapno “maammuan ti agnanayon a kinapudno.” Panunoten no sadino ti paakapapigsaan ti pammaneknek dagiti sarungkaranyo ket mangisaganakayo iti leksion maipapan ti dayta a topiko. Kas pagarigan, no ti maysa a tao a sarungkaram ket napukawan iti maysa a nasinged a gayyem wenno miembro ti pamiliana, panunotem a pagsasaritaan maipapan kadagiti agnanayon a pamilia ken ti biag kalpasan ti ipapatay. Mabalinmo nga idawat a makipagayunoka iti tao a sarsarungkaram tapno matulongam ida a makagun-od iti pammaneknek maipapan iti dayta a prinsipio.