Molaetsa wa Boporesidente jwa Ntlha, Phalane 2014
Thapelo ya Tumelo
Thapelo e feta mafoko a re a buang go Modimo. Ke puisano ya tsela tse pedi magareng ga Modimo le bana ba Gagwe.
Fa thapelo e dira jaaka e tshwanetse, re supa maikutlo a dipelo tsa rona ka mafoko a motlhofo. Rara wa Legodimo ka metlha o araba ka go tsenya dikakanyo mo ditlhaloganyong tsa rona di na le maikutlo. O utlwa thapelo ya tlhwaafalo ka metlha e re e fang fa re rapela ka maikaelelo a go mo obamela, gore a karabo ya Gagwe ke eng le gore e tla leng.
Morena o dira tsholofetso e go botlhe bao ba balang le go rapela ka Buka ya ga Momone:
“Mme fa o amogela dilo tse, Ke tlaa go rotloetsa gore o botse Modimo, Rara wa Bosakhutleng, mo leineng la ga Keresete, fa dilo tse di se boammaaruri; mme fa o botsa ka pelo ya tlhwaafalo, ka maikaelelo, o nale tumelo mo go Keresete, o tlaa go supegetsa boammaaruri jwa yone, ka thata ya Moya o o Boitshepo.
“Mme ka thata ya Moya o o Boitshepo o ka itse boammaaruri jwa dilo tsotlhe(Moroni 10:4–5).
Tsholofetso eo e netefetse. Di dikadike tsa batho ba lekile le go supa tsholofetso e e gakgamatsang ka thapelo ka go amogela tshegofatso eo e tladitseng matshelo a bone ka boitumelo le boipelo jo bosafeleng. Tsholofetso eo e akaretsa dithapelo tsa rona rotlhe go itse tlhaloganyo le thato ya Modimo ka rona. Re ka e diragatsa fa re amogela kgakololo gotswa go motlhanka wa Modimo yoo a nang le taolo go re neela kaelo. Ka sekai, re ka ikaega ka yone fa re reetsa semone mo khonforenseng ya kakaretso. Re ka e diragatsa fa re rutwa ke baanamisa efangele ba ba boikokobetso ba ba biditsweng ke Modimo ka moporofiti yoo tshelang. E akaretsa gape kgakololo e re e amogelang gotswa go bishopo wa rona kgotsa moporesidente wa lekala.
Gore thapelo e dire mo matshelo a rona, melawana e motlhofo. Re tshwanetse go botsa go itse se se boammaaruri ka go rapela go Rara mo leineng la ga Jeso Keresete. Re tshwanetse go botsa ka pelo e e tlhwaafetseng, mo go rayang gore re tshwanetse go nna le maikaelelo a a boikanyego go sengwe le sengwe se karabo ya Modimo e se tlhokang. Mme maikaelelo a rona a boammaaruri a tshwanetse go runya go tswa mo tumelong ya rona ya ga Jeso Keresete.
Mosekaseki yoo a balang Buka ya ga Momone pele fa a kolobediwa le go tlhomamisiwa o ka amogela yotlhe nnete gore buka e e boammaruri le bosupi jwa gore Joseph Smith o e ranotse ka thata ya Modimo. Morago ga go tlhomamisiwa go nna leloko la Kereke, re ka nna le Moya o o Boitshepo jaaka mopati go rurifatsa boammaruri jo bongwe. Jalo, fa fela re rapela ka tumelo, re ka solofela gore Moya o o Boitshepo o ka paka go rona gore Jeso ke Keresete, gore Modimo Rara wa tshela, le gore Ba a re rata le botlhe bana ba Rara wa Legodimo.
Seo ke lone lebaka le le lengwe leo go nang le tsholofetso mo Bukeng ya ga Momone gore re tlaa nna le bopelonomi mo pelong jaaka fa Moya o o Boitshepo o fa bosupi go rona gore Jeso ke Keresete: “Fa motho a le bonolo le boikokobetso mo pelong, le go bolela ka thata ya Moya o o Boitshepo gore Jeso ke Keresete, o tlhokana le go nna le bopelonomi” (Moroni 7:44).
Go nale tshono e kgolo go gola semoya Sontaga mongwe le mongwe fa go ikitswa dijo. Sontaga sa go itima dijo se ka re thusa go atumalana le maitemogelo a ga Alema le barwa Mosaeya, bao ba rapetseng le go ikitsa dijo go itse boammaruri jwa bosakhutleng gore ba kgone go ruta Balamanaetse ka thata, taolo, le lorato (bona Alma 17:3, 9).
Mo Sontageng sa go itima dijo re tlhakanya go ikitsa dijo le thapelo. Go tshegofatso ya bahumanegi, re neela moneelo wa go itima dijo ka bopelontle go Bishopo kgotsa moporesidente wa lekala mo go lekanang ka tlhwatlhwa le dijo tse gabedi re sa dijang. Dikakanyo tsa rona le dithapelo tsa rona di fetogela go Mmoloki le go bao A batlang re ba direla ka go sekegela matlhoko a bone a semoya le a tsa senama.
Dithapelo tsa rona le dikeletso jalo di tle go atumalana go nna jaaka dithapelo le dikeletso tsa Mmoloki jaaka fa re ikitsa dijo go nna bonolo, le go rutega, le lorato. Le jaaka A dirile, re rapela go itse thato ya ga Rara ka rona le go e dira.
© 2014 by Intellectual Reserve, Inc. All rights reserved. E gatisitswe mo USA. Tetla ya Sekgoa: 6/14. Tetla ya Thanolo: 6/14. Thanolo ya bo First Presidency Message, October 2014. Setswana. 10870 763
Go ruta go tswa Molaetseng o
Moporesidente Eyring o ruta gore thapelo le go ikitsa dijo go ka re thusa “go itse boammaaruri jwa bosakhutleng.” Akanyetsa ka moo mapaki a bao o ba etelang a ka tlhokang go nonotshwa ka teng mme o baakanyetse thuto mo setlhogong seo. Ka sekai, fa motho yoo o mo etelang a latlhegetswe ke tsala tota kgotsa leloko la lelwapa, akanyetsa go buisana ka malwapa a bosakhutleng le botshelo morago ga loso. O ka ithaopa go ikitsa dijo le bao o ba etelang e le thulaganyo ya go ba thusa go amogela bopaki jwa molawana yoo.