“Rua na Siga Lagilagi ni iTukutuku Vakauqeti”

“Eda sa sotava mai e rua na siga lagilagi ni itukutuku vakauqeti,” E kaya o Peresitedi Thomas S. Monson ni mai cava na ika 184 ni Koniferedi Raraba Vakayabaki ena Sigatabu, 5 ni Okotova, 2014.

Ena veitukutuku oqori e okati kina na bibi ni kena tarai cake e dua na ivakadinadina ka na rawa kina vei keda me da vorata na ituvaki ni bula kecega; muria na nona sala na iVakabula ka yaco me tisaipeli yalodina; muri ira ka tokoni ira na parofita; vakayagataka vakayalomatua na galala ni digidigi; ka cakava na itikotiko me vanua ni loloma, veitaqomaki, ivakaraitaki, kei na vulici ni kosipeli.

Ena nona vosa idola ena Vakarauwai, e tukuna kina o Peresitedi Monson ni sa toso tikoga na tubu ni Lotu. “Ena gauna oqo sa 15 na milioni na keda kaukauwa ka tubu tikoga na keda iwiliwili,” e kaya o Peresitedi Monson. “Sa toso tikoga ki liu ka sega ni vakataotaki na noda sasaga ni kaulotu. E sivia na 88,000 na noda daukaulotu era veiqaravi, era wasea tiko na kosipeli e vuravura taucoko.”

Ena soqoni ni yakavi ni Vakarauwai, erau a vagalalataki ka soli vei rau na itutu vakaemeritesi o Elder Carlos H. Amado kei Elder William R. Walker mai na iMatai ni Kuoramu ni Vitusagavulu. Erau vagalalataki na Vitusagavulu ni iWasewase o Elder Arayik V. Minasyan kei Elder Gvido Senkans.

Ena imatai ni gauna ena koniferedi raraba, era vosa kina ena nodra dui vosa ga eso ka sega ni nodra vosa taumada na vosa Vakavalagi. O Elder Chi Hong (Sam) Wong ena vosa vaka-Canton, Elder Eduardo Gavarret kei Elder Hugo E. Martinez ena vosa vaka-Sipeni, kei Elder Carlos A. Godoy ena vosa vaka-Potukali.

Era vakasinata na Vale ni Koniferedi 21,000 na kena idabedabe kei na veivanua tale eso ena Lomanibai ni Valetabu e Salt Lake City, Utah e Amerika, ena veisoqoni yadua ni koniferedi, ka a vakadewataki ena sivia ni 90 na vosa ka kaburaki ki na sivia na 170 na matanitu kei na yasayasa. Kena ikuri, a vakarautaki talega ena retioyaloyalo, retio, biaulivaliva ni setilaiti, kei na Initaneti oka kina na iyaya veikauyaki. E vakatakilakilataki ena koniferedi oqo na ika 90 ni yabaki ni kakaburaki ena retio kei na ika 65 ni yabaki ni kena kaburaki ena retioyaloyalo na koniferedi.

A vosa o Peresitedi Thomas S. Monson ena soqoni ni yakavi ni Vakarauwai ni koniferedi raraba.