Na Vu ni Noda iNuinui

Mai vei Peresitedi Boyd K. Packer

Peresitedi ni Kuoramu ni iApositolo Le Tinikarua

Na ivakadinadina ni inuinui ni veivueti e dua na ka e sega ni rawa ni vakarautaki se wiliki. O Jisu Karisito na ivurevure ni inuinui ko ya.

Ena vica vata na yabaki sa oti keirau a lako kei Sisita Packer ki na Univesiti mai Okosivote. Keirau a vaqara tiko na ivolatukutuku kei tukaqu vakavitu. A yalovinaka vei keirau na iliuliu ni Christ College e Okosivote, o Vuniwai Poppelwell, ka kauta mai na daumaroroi itukutuku ena koliji na ivolatukutuku eso. Keirau raica kina ena yabaki 1583 na yacai tubuqu, o John Packer.

Ena yabaki ka tarava keirau lesu tale ki Okosivote me keirau laki solia e dua na ivolayavu ni cakacaka totoka ki na valenivola e Christ’s College. A sega soti beka ni logavinaka vei Vuniwai Poppelwell. Rairai e nanuma beka ni da sega ni vakabauta dina Vakarisito. A mani kaciva na italatala ni koronivuli me ciqoma na ivola.

Ni bera ni soli yani na ivolanikalou vua na italatala, au dolava na Topical Guide ka vakaraitaka vua e dua na ulutaga: e 18 na draunipepa, volai vakamatailalai, dua ga na laini kena veiyawaki, tuvai kina na idusidusi ki na ulutaga “Jisu Karisito.” Oqo e dua na vakasokumuni vata ni idusidusi vakaivolanikalou ena ulutaga ni iVakabula se qai bau biuvata ena itukutuku ni vuravura—na ivakadinadina mai na Veiyalayalati Makawa kei na ka Vou, na iVola i Momani, kei na Vunau kei na Veiyalayalati, kei na Mataniciva Talei.

“Se vakacava ga na ivakarau o vakamuria kina na idusidusi oqo,” au tukuna vua, “mai na dua na yasana ki na dua tale, lako cake lako sobu, mai na dua na ivola ki na dua tale, dua na ulutaga kina dua tale—o na raica ni ra ivakadinadina tudei ka duavata ni kena vakalou na nona cakacaka na Turaga o Jisu Karisito—Nona sucu, Nona bula, Nona ivakavuvuli, Nona rube ena kauveilatai, Nona Vakaturi tale, kei na Nona Veisorovaki.”

Ni oti noqu wasea vua na italatala eso na nona ivakavuvuli na iVakabula, sa veisau na draki ni veimaliwai, ka vakasarasarataki keirau wavoki e koronivuli, oka kina e dua na vakadidike e lomaniqele ka kunei kina eso na ivakatakarakara ka se caka ena gauna vaka-Roma.

Ena maliwa ni idusidusi ena Topical Guide e koto kina na kena oqo mai na iVola i Momani: E Dua Tale na iVakadinadina kei Jisu Karisito: “Eda sa vunautaki Karisito ka parofisaitaki Karisito, ia eda sa vola na ka sa vakatakilai vei keda, me ra kila kina na noda kawa na sala me bokoci kina na noda ivalavala ca” (2 Nifai 25:26).

Sa tukuna na iVakabula ena Nona vosa, “Oi au na sala, kei na vu ni dina, kei na vu ni bula: sa sega ni torovi Tamaqu walega e dua na tamata, ena vukuqu ga” (Joni 14:6).

Mai na iVola i Momani, e tukuna kina o Koya: “Raica sai au ga sa vakarautaki tu mai na ivakatekivu kei vuravura meu vakabulai ira na noqu tamata. Raica sai au ko Jisu Karisito. … Sai au na nodra rarama na tamata kecega sa vakabauta na yacaqu ka tawamudu; ia era na yaco me luvequ tagane kei na luvequ yalewa” (Ica 3:14).

E vuqa, vakavuqa tale na veidusidusi ena ivolayavu kece ni cakacaka e tukuna na itavi vakalou nei Jisu Karisito me vaka ni nodra iVakabula kece o ira era sa bula oti kei ira era se bera ni sucu mai ki na bula oqo.

Mai na Veisorovaki nei Jisu Karisito eda sa vueti kece kina mai na Lutu ni tamata, ka yaco ena nodrau kania o Atama kei Ivi na vuanikau vakatabui ena Were ko Iteni, me vaka e tukuni ena 1 Korinica: “Ni sa qai mate kecega ena vukui Atama, ena vakabulai kece talega ena vukui Karisito” (1 Korinica 15:22).

E vakavuvulitaka na iVola i Momani, “Raica sa kilikili me vakacabori e dua na ilutua ka iotioti ni isoro … , kevaka e sega era na rusa vakaidina na tamata kecega; raica eda sa tamata ivalavala ca kecega; eda sa muduki tani ka lako sese, ka na rusa vakaidina, ia eda na bula ena vuku ni isoro sa vakacabori … raica ena vakacabori ga e dua na isoro sa vakalou” (Alama 34:9–10).

Eda na sega beka ni bulataka na bula uasivi sara, ka tu na itotogi ni noda cala, ia ni se bera ni da lako mai ki vuravura, eda sa vakadonuya me da na vakarorogo ki na Nona lawa ka ciqoma na itotogi ni kena voroki na lawa oqori.

“Ni sa ivalavala ca ko ira kecega na tamata, ka sega ni yacova na ka e vakarokorokotaki kina na Kalou;

“A ra sa vakadonui walega ena loloma ni sa volia na bula ko Jisu Karisito” (Roma 3:23–24).

A vakarautaka na Veisorovaki na iVakabula, ka sa vakarautaki kina e dua na sala vei keda me da yaco me savasava. Sai Jisu Karisito na Karisito sa vakaturi cake mai na mate. Eda qaravi Koya ka vakadinadinataki Koya ena mosi a sotava ena vukuda kece kei na mosi a vosota o Koya ena vukuda yadua, mai na Were e Kecisemani kei na kauveilatai. A sotava kece oqori ena yalomalumalumu kei na veiciqomi tawamudu ena vuku ni nona itavi kei na inaki vakalou.

O ira era na veivutuni ka biuta na ivalavala ca era na kunea ni se dodo tu ga na Ligana dauloloma. O ira era vakarorogo kina ka muria na Nona vosa kei na nodra vosa na Nona italai digitaki era na kunea na vakacegu kei na kila deivaki ena loma sara mada ga ni mosiniyalo kei na yaluma levu. Na vua ni Nona isoro me sereki keda mai na revurevu ni ivalavala ca, me rawa kina vei keda kece me bokoci laivi noda vakilai yaloda ka vakila na inuinui.

Kevaka me a sega Nona Veisorovaki, ena sega na veivueti. Ena dua na vuravura dredre sara me da bula kina kevaka eda na sega sara ni vosoti ena noda cala, kevaka eda sega ni rawa ni vakasavasavataki keda ka toso.

Na loloma cecere kei na loloma soliwale nei Jisu Karisito e sega ni baleti ira walega era ivalavala ca, se ivalavala ca ni cakava na ca se sega ni cakava na vinaka, ia era kovuta na yalayala ni vakacegu tawayalani vei ira kece era na ciqomi Koya ka muria na Nona ivakavuvuli. Na Nona loloma cecere sai koya na dauveivakabulai qaqa, vei ira sara mada ga era mavoa ni sega ni nodra cala.

Au ciqoma ena dua na gauna lekaleka sa oti e dua na ivola mai vua e dua na marama ka tukuna ni levu sara na rarawa e sotava ena nona bula. E dua na cala levu a sega ni vakamacalataka ka tukuna toka ga, a vakayacori vua. E vakadinadinataka ni a vosota dredre na yaloca. Ena nona cudru, dau kailavaka ena nona vakasama, “Me dua e sauma na cala levu oqo.” Ena gauna bibi ni yaluma kei na vakatataro oqo, e vola ni qai yaco mai e yalona na kena isau: “E dua sa sauma oti.”

Kevaka eda sega ni raica rawa na veika e rawa ni cakava ena vukuda na nona isoro na iVakabula, e rawa ni da kauta voli ena noda bula na veivutuni ni da a cakava e dua na ka cala se vakacudruya e dua. Na kilai yalona e dau salavata kei na cala e rawa ni savati laivi. Kevaka eda segata me da kila deivaki na Nona Veisorovaki, ena yaco me da dau rokova vakatitobu na Turaga o Jisu Karisito, na Nona veiqaravi e vuravura, kei na Nona itavi vakalou me noda iVakabula.

A vakalesui mai na Lotu i Jisu Karisito ni Yalododonu Edaidai me tosoya e vuravura taucoko na kena kilai na bula kei na ivakavuvuli ni iVakabula. Na koniferedi oqo e kaburaki ena setilaiti ena 94 na vosa ki na 102 na matanitu ia sa tu talega ena Initaneti ki na veimatanitu kece sa tu kina na Lotu. Sa sivia na 3,000 na noda iteki. Sa sivia na 88,000 na noda daukaulotu tudei, ka sa sivia na 15 na milioni na lewenilotu. Na iwiliwili oqo sa ivakadinadina ni “vatu sa kavida mai na ulunivanua ka sa sega ni ta ena liga” sa qiqi tikoga yani, ka na yaco na gauna ena “roboti vuravura taucoko” (V&V 65:2).

Ia veitalia na levu ni Lotu se vicavata na milioni na lewenilotu era curu mai, veitalia na levu ni matanitu kei na vanua lelevu era curuma na noda daukaulotu se vica vata na vosa eda na vosataka, na qaqa dina ni kosipeli i Jisu Karisito ena vakaraitaki ena nodra kaukauwa vakayalo na lewena yadua. Eda gadreva na igu ni yalodina ka dau kunei e yalodra na tisaipeli yalodina i Karisito.

Na ivakadinadina ni inuinui ni veivueti e dua na ka e sega ni rawa ni vakarautaki se wiliki. O Jisu Karisito na vurevure ni inuinui.

Eda segata me da vaqaqacotaka na nodra ivakadinadina na qase kei na gone, na vakawati kei na sega. E gadrevi me da vakavuvulitaka na kosipeli i Jisu Karisito vei ira na tagane, yalewa, kei ira na gone, o ira na veimatatamata kei na duikaikai, na vutuniyau kei na dravudravua. Eda gadrevi ira na saumaki mai kei ira vei keda era vu mai vei ira na painia. Eda gadreva me da vakasaqarai ira era sa lakosese ka vukei ira me ra lesu mai ki na bai. Eda gadreva na nodra yalomatua rai titobu kei na igu vakayalo na tamata kecega. Na lewe ni Lotu yadua oqo, vakatamata yadua sa dua na tiki bibi ni dago ni Lotu oqo.

“Me vaka sa duabau ga na yago, ka sa vuqa na kena tikina, ia na tiki ni yago kecega, sa vuqa ga, ka sa duabau ga na yago: sa vakatalega kina na Karisito.

“Ni da sa papitaisotaki kecega ki na yago e duabau ga ena Yalo Tabu e duabau ga. …

“Ni sa sega ni dua walega na tikina ena yago, sa vuqa ga” (1 Korinica 12:12–14).

Na lewenilotu yadua e ivakadinadina ni bula kei na ivakavuvuli nei Jisu Karisito. Eda vala tiko kei ira na mataivalu ni meca, ka na gadrevi o keda yadua kevaka me da qaqa ena cakacaka e nuitaka na iVakabula vei keda me da cakava.

O na nanuma beka, “Na cava au rawa ni cakava? O au e dua ga na tamata.”

Sa dina sara e dau galili sara ena so na gauna o Josefa Simici. A tubu me cecere sara, ia a tekivu ni dua na gonetagane yabaki 14 ka lomatarotaro voli: “O cei vei ira taucoko na matalotu meu curu kina?” (raica na iTukutuku i Josefa Simici 1:10). A tubu na vakabauta kei na ivakadinadina nei Josefa ena vukuna na iVakabula ena ivakarau e dodonu me tubu vakakina na noda, “na vosa ena vosa, na vunau ena vunau, vakalailai eke ka vakalailai e kea” (2 Nifai 28:30; raica talega V&V 128:21). A tekiduru ena masu o Josefa, ka vakasakiti na veika a yaco mai ena vuku ni masu ko ya kei na iMatai ni Raivotu.

Niu dua na Le Tinikarua na iApositolo, au vakadinadinataka na Turaga o Jisu Karisito. E bula tiko. O Koya na noda Dauveivueti ka noda iVakabula. “Ena vakabulai na tamata kecega ena isoro nei Karisito” (Yavu ni Vakabauta 1:3). E vakatulewa tiko ena Lotu oqo o Koya. E sega ni vulagi o Koya vei ira na Nona italai. Ni da toro yani ki na veisiga ni mataka ena yalodei malumu, ena tiko vata kei keda na Yalona. E sega ni yalani na Nona kaukauwa me vakalougatataka ka dusimaka na nodra bula o ira era vakasaqara na dina kei na buladodonu. Au vakadinadinataki Koya ena yaca i Jisu Karisito, emeni.