Na iVola
Mai vei Elder Allan F. Packer
Ena Vitusagavulu
Na tuvakawa kei na cakacaka ni valetabu sa dodonu me tiki tudei ni noda sokalou yadua.
Niu se yabaki 12 ka tiko ena sikauti, a soli vei au e dua na iloloma ka ikuri taleitaki sara ni noqu iyaya ni sikauti. E dua na imatau lailai kei na waqana leca bibi! Ena neimami kaba ulunivanua bogidua ka tarava, keimami lesu mai ki na keba ni sa karobo, ena suasua kei na batabata mai na vavaku ni ucacevata e sala. Na ka ga au rawa ni vakasamataka meu vakawaqaca e dua na matadravu bukawaqa levu. Au sa maqusa sara ka laki kolata e dua na vunikau levu sa bale tu ena noqu imatau vou. Niu kolabuka tiko, au rarawa baleta ni sega ni kana vinaka tiko. Ena rarawa, au mani cakacaka vakaukauwa cake kina. Ena cudru au lesu tale yani ki na keba ka vica ga na tikinibuka. Ena rarama ni nona buka e dua tale, au qai raica rawa na vunileqa. Au se bera ni luvata na waqa ni matau. Ia, au rawa ni tukuna, ni sa tatalaki vakamatailalai na waqana leca. Na lesoni: niu sa rui vakanamata ena kolabuka, kau vagolei tani kina ena veika eso.
Ni da sasaga yani ki na bula vakacerecerei, sa dodonu me da cakacakataka na veika kece sara e gadrevi ka sega ni vagolei tani ena noda vakanamata toka ga ena dua se rua na veika gadrevi se na veika tale eso ka sega ni salavata. Na vakasaqarai ni matanitu ni Kalou e kauta mai na reki kei na marau.1 Kevaka e gadrevi, sa dodonu me da tuvakarau tu me da veisau. Na veivakadodonutaki lalai e veigauna e sega soti ni mosimosi ka veivakacacani me vaka na veivakadodonutaki lelevu ni noda bula.
Ena dua na gauna lekaleka sa oti, keirau a lako kei Sisita Packer ki na vicavata na matanitu tani. Keirau vakarautaka na neirau pasipote kei na itukutuku tale eso. Keirau cula, raici vakavuniwai, taura na visa, kei na sitaba kece sara. Ni keirau yaco yani, a dikevi na neirau ivolatukutuku, ni sa sotavi na veika kece sara e gadrevi, sa vakatarai me keirau curu.
Na noda rawata na bula vakacerecerei e vaka na vakavakarau me da curu yani ki na dua tale na matanitu. Sa dodonu me da dui rawata na noda pasipote vakayalo. Eda sega ni virikotora na veika e gadrevi, ia, sa dodonu vei keda yadua me da rawata kece sara. Na ituvatuva ni veivakabulai e lewena na ivunau, lawa, ivakaro, kei na cakacaka vakalotu kece sara e gadrevi me rawa kina vei keda kece me da vakadonui ki na bula vakacerecerei.2 Ia, “ena nona Veisorovaki o [Jisu] Karisito, na tamata kece ena vakabulai.”3 E veivuke na Lotu ia ena sega ni rawa ni cakava vei keda. Sa yaco kina me sasaga ni bula taucoko na vakadonui ki na bula vakacerecerei.
A tauyavutaka na Nona Lotu me vukei keda. Sa kaciva o Koya e 15 na turaga eda tokoni ira me parofita, daurairai, ka daunivakatakila me ra liutaka ka vakavulica na tamata. O ira na Mataveiliutaki Taumada4 kei na Kuoramu ni iApositolo Le Tinikarua5 e tautauvata na nodra kaukauwa kei na dodonu,6 ka lesi o koya na iApositolo dede duadua me Peresitedi ni Lotu. Era kacivi na Vitusagavulu me ra veivuke.7 Era a sega ni virikotora na iliuliu na veika e gadrevi me baleta na vakadonui ki na bula vakacerecerei. Ia na Kalou! Era kacivi na iliuliu eso oqo me ra veivakavulici, vakamacalataka, veivakauqeti, ka veivakaroti sara mada ga me da mua donu tiko.8
Me vaka e vakamacalataki ena ivoladusidusi: “Me vakataucokotaka na kena inaki me vukea na matavuvale kei na tamata yadua me vakadonui ki na bula vakacerecei, sa vakanamata kina na Lotu ki na itavi lesi vakalou. Oqo e okati kina na nodra vukei na lewenilotu me ra bulataka na kosipeli i Jisu Karisito, vakasoqoni vata o Isireli ena cakacaka ni kaulotu, nodra kauwaitaki na dravudravua kei na vakaleqai, ka rawati na nodra vakabulai na mate ena kena tara na valetabu ka caka na veicakacaka vakalotu vakaveisosomitaki.”9 O iratou na va na ka bibi oqo kei na veilawa kece tale, na ivakaro, kei na cakacaka vakalotu era gadrevi ka sega ni ka me digitaki. Mai na Veisorovaki nei Jisu Karisito kei na noda cakava na veika oqo, eda sa vakuria tiko na sitaba e gadrevi ki na noda pasipote vakayalo.
Ena koniferedi oqo eda sa vakavulici kina na veisau ka na vukei keda me da vakarau vakavinaka cake.
Na matavuvale e itakele ni ituvatuva ni veivakabulai ka rairai sai koya talega na vuna e vakatokai kina me “ituvatuva cecere ni marau.”10 E kaya o Peresitedi Boyd K. Packer, “Na icavacava cecere ni itaviqaravi taucoko ni Lotu o ya vei tagane kei watina kei na luvedrau mera bula marau tiko e vale.”11
E kaya o Peresitedi Spencer W. Kimball, “Na noda qaqa, vakatamata yadua vakakina ena Lotu, ena vakatau vakalevu mai na noda yalodinataka na kena bulataki na kosipeli e vale.”12 Na cakacaka ni Valetabu kei na tuvakawa e tiki ni bulataki ni kosipeli e vale. E dodonu me itaviqaravi ni matavuvale vakalevu cake mai na kena itaviqaravi ni Lotu.
Sa vakavoui na kena vakabibitaki na tuvakawa kei na cakacaka ni valetabu mai vei iratou na Mataveiliutaki Taumada kei na Kuoramu ni iApositolo Le Tinikarua.13 Na nomu cakacakataka na kena vakabibitaki oqo ena vakalevutaka na nomuni reki kei na marau yadua kei na matavuvale.
Eda wilika mai na Vunau kei na Veiyalayalati: “Raica sa voleka ni yaco mai na siga sa levu ni Turaga. … Ia me da ia koi keda kecega na tamata eda sa isoqosoqo lewe ni lotu, me da vakacabora vua na Turaga na imadrali sa dodonu; ia me da vakacabora ki na nona vale tabu, … na kedra ivolatukutuku na wekada era sa mate, io me dodonu vinaka me vakadonui kina.”14
Ena vakarautaki na “ivola” oqo ena kena vakayagataki na kato ni itukutuku ena Church’s FamilyTree.
Au sa dikeva ka vakuria tiko na itukutuku ena kato ni itukutuku oqo baleta niu vinakata me tiko ena ivola na yacadra kece o ira au lomana. Vakaivei o iko?
E kaya na Vunau kei na Veiyalayalati wase 128, “Raica e sega ni rawa me da vakavinakataki sara ke sega ko ira [na tubuda]; io ena sega ni rawa me ra vakavinakataki sara ko ira ke sega koi keda.”15
Na tuvakawa e ka levu sara mai na volakawa, lawa, yaca, tikinisiga, kei na vanua. E levu cake sara mai na vakanamata ga ki na veigauna sa oti. Na tuvakawa e okati kina na gauna oqo ni da bulia na keda itukutuku makawa. E okati talega kina na veisiga ni mataka ni da taracake na itukutuku makawa ni veisiga ni mataka mai vei ira na noda kawa. E dua na tina gone, me kena ivakaraitaki, ni wasea na italanoa ni nona matavuvale kei na iyaloyalo vei ira na luvena sa cakava tiko na cakacaka ni tuvakawa.
Me vaka ga na vakaivotavota ena sakaramede, lakova na veisoqoni, wilika na ivolanikalou, kei na masu yadua, na qaravi ni tuvakawa kei na cakacaka ni valetabu sa dodonu me tiki tudei ni noda sokalou yadua. Sa veivakauqeti na nodra rogoca na noda itabagone kei ira tale eso na veisureti vakaparofita e veivakauqeti ka vakadinadinataka ni rawa ka dodonu me caka na cakacaka oqo mai vei ira kece na lewenilotu ena veitabayabaki kecega.
Me vaka sa vakamacalataka o Elder Quentin L. Cook, “Sa tu vei keda ena gauna oqo na ivunau, na valetabu, kei na kila vakamisini.”16 Na caka ni cakacaka oqo sa rawarawa vakalevu sara ka yalani walega vei ira na iwiliwili ni lewenilotu era vakaliuca. E se gadrevi tikoga ena cakacaka na gauna kei na solibula, ia e rawa ni da cakava kece, ka rawarawa ni da veidutaitaka kina vica ga na yabaki sa oti.
Me vukei ira na lewenilotu, sa vakasokumuna na Lotu na ivolatukutuku ka vakarautaka na iyaya me rawa ni caka ena noda veivale se ena valenilotu ni tabanalevu kei na valetabu. E vuqa na itatao sa kau laivi. Se cava ga eda dau kila tu e liu, sa duatani ena gauna oqo!
Ia, e dua na itatao e sega ni rawa ni kauta laivi na Lotu. Sai koya na nona lokuyarataka e dua me cakava na cakacaka. Na ka ga e gadrevi kina na vakatulewa kei na dua na igu lailai. E sega ni gadrevi e dua na gauna levu. E dua ga na gauna lailai e veigauna ena vakabasikata na reki ni cakacaka. Vakatulewataka mo cavuta na ikalawa, mo vuli ka kerei ira tale eso me ra vukei iko. Ena vakakina. Na yaca o kunea ka kauta ki na valetabu era na yaco me ivolatukutuku “ena ivola.”17
Na kena tubucake vakalevu na nodra vakaitavi na lewenilotu, sa kunei ni lewevica wale na lewe ni Lotu era dau vakaitavi e veigauna ena kena kunei ka caka na cakacaka vakalotu ni valetabu me baleta na nodra matavuvale.18 Sa gadrevi kina na veisau ena veika eda vakaliuca. Kakua ni vorata na veisau, ciqoma! Na veisau e tiki ni ituvatuva cecere ni marau.
E gadrevi me caka na cakacaka oqo, sega ni baleta me yaga ena Lotu ia me baleti ira na noda era sa mate kei keda. O keda kei ira na tubuda eda gadreva na sitaba ena noda pasipote vakayalo.
Na “isema tudei”19 ni noda matavuvale ena veitabatamata ena rawa ni yaco ga ena veivaletabu mai na cakacaka vakalotu ni veivauci. E rawarawa na kena icakacaka: raica ga e dua na yaca ka kauta ki na valetabu. Ni toso na gauna sa na rawa mo vukei ira tale eso me ra vakayacora talega.
Vakavo ga e vica na ka lalai, o keda kece—o keda kece—eda rawa ni cakava oqo!
Era tu eso na veivakalougatataki e matanavotu ka salamuria na cakacaka oqo. E vuqa na itubutubu kei na iliuliu era leqataka tu na ituvaki ni vuravura ena gauna oqo kei na kena revurevu ki na matavuvale kei ira na itabagone.
Sa yalataka o David A. Bednar: “Au sureti ira na itabagone ena Lotu me ra vulica ka vakila na Yaloi Ilaija. … Au yalataka [ni] ko ni na taqomaki mai na veivakauqeti kaukauwa cake tikoga ni meca. Ni ko ni vakaitavi ka taleitaka na cakacaka tabu oqo, o ni na taqomaki ena nomuni gauna ni itabagone kei na nomuni bula taucoko.”20
Kemuni na taciqu kei na ganequ, sa kena gauna me da cereka tani na waqa ni noda imatau ka laki cakacaka. Me da kakua ni solia tani na noda bula vakacerecerei se na nodra na noda matavuvale me baleta na veika sega na betena.
Oqo na cakacaka ni Kalou, me ra cakava na lewenilotu kei ira na sega ni lewenilotu vakatautauvata, gone kei na qase, tagane kei na yalewa.
Au tinia ena noqu cavuta na sere ni lotu 196, ka veisautaka e dua na vosa:
O Jisu Karisito na Tui! Au vakadinadinataki Koya ena yaca i Jisu Karisito, emeni.