Noda Veiqaravi Yadua

Mai vei Elder Hugo E. Martinez

Ena Vitusagavulu

Sa dodonu me noda idusidusi na loloma i Jisu Karisito kevaka eda via kila na nodra leqa o ira e rawa ni da veivuke kina.

Ena Lotu i Jisu Karisito ni Yalododonu Edaidai, e soli vei keda na madigi kei na veivakalougatataki yadua me da veiqaravi. Ena gauna taucoko au lewenilotu tu kina, au dau veiqaravi ena vuqa na sala. Me vaka e dau tukuna o Baraca Udine Falabella, na tamai Elder Enrique R. Falabella, “O koya e veiqaravi ena dua na ka; ena vinaka ena dua na ka; o koya e sega ni dua na ka e veiqaravi kina ena sega ni vinaka ena dua na ka.” Oqo na veimalanivosa eda gadreva me maroroi tu ena noda vakasama kei na yaloda.

Ni vakasaqarai na veituberi ena noqu veiqaravi, au kunea na vakacegu ena noqu nanuma ni dau vakanamata na iVakabula ki na tamata yadua kei na matavuvale. Na Nona loloma kei na veikauwaitaki ki na tamata yadua sa vakavulica vei au ni vakadinadinataka tu o Koya na kedra yaga cecere na luvena yadua na Tamada Vakalomalagi ni yaga vei keda me da raica ni ra qaravi ka vaqaqacotaki ena kosipeli i Jisu Karisito.

Eda wilika ena ivolanikalou:

“Raica sa ka talei ena mata ni Kalou na tamata kecega. …

“Ia kevaka drau sa vunau tiko ena nomudrau bula taucoko ka sa saumaki mai kina e dua na tamata, sa na vuabale sara na nomudrau marau ena matanitu i Tamaqu!”¹

Na yalo yadua sa ka talei sara ena mata ni Kalou, ni da sa Luvena ka rawa ni da yaco me vakataki Koya.²

Sa dodonu me noda idusidusi na loloma i Jisu Karisito kevaka eda via kila na nodra leqa o ira e rawa ni da veivuke kina. E vakaraitaka vei keda na sala na ivakavuvuli ni Turaga, o Jisu Karisito. Sai koya oqori na ivakarau e tekivu kina na noda dui veiqaravi yadua: kilai na leqa, ka qaravi sara. Me vaka e tukuna o Sisita Linda K. Burton, na peresitedi raraba ni iSoqosoqo ni Veivukei, “Taumada na vakararai, qai veiqaravi.”³

E dua na ivakaraitaki cecere ni ivakavuvuli oqo o Peresitedi Thomas S. Monson. Ena Janueri ni 2005, a vakatulewa tiko ena dua na koniferedi ni veiliutaki ena matabete mai Puerto Rico ena nona vakaraitaka na ivakarau era dau veiqaravi kina na iVakabula kei na Nona italai ena veiqaravi yadua. Ni tini na soqoni vakasakiti oya, sa tekivu me sotavi ira na veiliutaki ni matabete era tiko rawa o Peresitedi Monson. Vakasauri, nona raica ni dua vei ira e sarasara taudua tu ga mai vakayawa.

E lako tani yani mai vei ira na ilawalawa oya o Peresitedi Monson, vua na turaga oya, ka laki vosa vua. Ena yaloluluvu e tukuna vua o José R. Zayas ni cakacaka mana na nona lako yani vua ka isau ni masu erau a cabora kei na watina, o Yolanda, ni se bera na soqoni oya. E tukuna vei Peresitedi Monson ni tauvimate bibi sara tu o luvena yalewa ka tiko vua e dua na ivola nei watina e vinakata me soli vei Peresitedi Monson. A kaya vei watina o Baraca Zayas ni na sega ni rawa me vaka ni na rui osooso sara o Peresitedi Monson. A rogoca o Peresitedi Monson na italanoa ka kerea na ivola, ka wilika galugalu. Qai biuta ena taga ni nona sutu ka tukuna vei Baraca Zayas ni na vakayacora na kerekere.

Ena sala oqo, a tara kina na matavuvale oya na Turaga, o Jisu Karisito, mai vua na Nona italai. Au vakabauta ni baleti keda na nona vosa na iVakabula ena italanoa vakaibalebale ni Kai Samaria dauloloma: “Mo lako ko iko ka kitaka vakakina.”⁴

Ena 21 ni Sepiteba, 1998, a labati Puerto Rico na Cagilaba o Georges, ka vakacaca sara vakalevu. Keitou a bula mai na cava levu oya kei na kena cagilaba o Sisita Martínez, lima na luvei keirau, kei au ena neitou tikoga ena loma ni neitou vale. Ia, a rua na macawa na kena sega tu na wai kei na livaliva.

Ni sa maca na meitou wai, sa dredre na kena kau tale mai eso. Au na sega ni guilecavi ira rawa na turaga era qaravi keitou ena nodra vakarautaka na wai talei oya, au na sega talega ni guilecava na ivakarau ni loloma era qaravi keitou talega kina na marama.

A kauta mai vale o Germán Colón e dua na koniteina palasitika levu ni wai ena dua na lori. E tukuna vei keitou ni cakava baleta, ena nona vosa, “Au kila ni ra tu na gonelalai vei kemudou era gadreva na wai.” Ena vica na siga i muri, erau vakavodoka o Baraca Noel Muñoz kei Herminio Gómez e tolu na taqe lelevu ni wai ena dua na lori dolaimuri. Eratou basika mai vakasauri i vale ka vakasinaita na tavaya kecega ni wai e tu ena wai ni gunu, ka ra sureti talega na tiko voleka me ra tawana na nodra.

A saumi na neitou masu ena nodrau veiqaravi yadua. E serau mai matadratou na tolu na turaga oya na loloma nei Jisu Karisito vei keda, kei na nodratou veiqaravi—ena dua tale na kena vosa, na nodratou veiqaravi yadua—e kauta mai ki na neitou bula e levu cake na ka, ka sega ni wai walega. Vei kemuni yadua na luvena tagane kei na yalewa na Kalou, e yaga me da kila ni ra dau kauwaitaka ka qarauna tiko na tamata na nodra tiko vinaka.

Au vakadinadinataka vei kemuni ni rau kilai keda yadua na Tamada Vakalomalagi kei na noda Turaga o Jisu Karisito. Ena vuku ni ka oqori. Erau vakarautaka kina na veika eda gadreva me rawa kina vei keda na madigi me da yacova na noda iyacoyaco vakalou. Ena tolo ni gaunisala, e Rau sa biuta tu kina na tamata era na vukei keda. Ia, ni da sa yaco me iyaya ni cakacaka e Ligadrau, sa rawa vei keda me da veiqaravi ka vukei ira e Rau vakaraitaka vei keda ena ivakatakila.

Ena sala oqori, ena yacovi ira kece kina na luvena na Tamada Vakalomalagi o Jisu Karisito. Ena vakasoqoni ira kece na nona sipi na iVakatawa Vinaka. Ena vakayacora vakakina yadua ena dua na gauna ni ra vakayagataka vakavinaka na nodra galala ni digidigi—ni ra sa rogoca oti na domodra na Nona italai ka ciqoma na nodra veiqaravi. Era na qai kila na Domona, ka ra na muri Koya. Na veiqaravi yadua vakaoqori sa tiki bibi ni noda rokova na noda veiyalayalati ni papitaiso.

E vakakina, ni da ivakaraitaki vinaka ni tisaipeli i Jisu Karisito sa noda ivola vakamacala taumada vinaka duadua vei ira e rawa ni da wasea kina na Nona kosipeli. Ni da dolava na gusuda ka wasea na kosipeli vakalesui mai i Jisu Karisito, sa yaco me da “Nona ivukevuke ni ivakatawa ni sipi, ka nodra itavi na nodra maroroi na sipi ni Nona lomanibai kei na lami ni Nona qelenisipi”⁵; eda sa yaco me “ko ira sa malumalumu kei ira na tamata wale”⁶ “na gonedau ni tamata.”⁷

Na noda veiqaravi yadua e sega ni baleti ira walega na bula tiko ena vuravura oqo. E rawa talega ni da cakava na cakacaka me baleti ira na mate—me baleti ira era bula tu ena vuravura ni yalo kei ira, ena nodra gauna ni bula oqo, era a sega ni donumaka na madigi me ra ciqoma na veicakacaka vakalotu ni veivakabulai ni kosipeli i Jisu Karisito. E rawa talega ni da maroroya e dua na ivolaniveisiga ka vola na ituvatuva ni kawa me vagoleya na yalodra na bula vei ira na bula—ka vakakina na yalodra na bula vei ira na tubudra. E ka ga ni kena semati na noda matavuvale, na itabatamata ki na itabatamata, ena ivau tawamudu. Ni da vakayacora vakakina, eda sa yaco me “ivakabula… ena ulunivanua ko Saioni.”⁸

E noda na madigi digitaki me da iyaya ni cakacaka ena Ligana. E rawa ni da vakakina ena noda bula vakawati, ena noda matavuvale, kei ira na noda itokani, kei ira na kainoda. Oqori na noda veiqaravi yadua vakatisaipeli dina i Jisu Karisito.

“Ena qai soqoni vata e matana na lewe ni veivanua kecega: ena qai tawasei ira rua ko koya, me vaka na ivakatawa ni sipi sa tawasei ira na sipi mai vei ira na me:

“Ia ena vakatikori ira na sipi ena ligana imatau, kei ira na me ena ligana imawi.

“Ena qai kaya na Tui vei ira ena ligana imatau, Ni lako mai koi kemuni sa vakalougatataki vei Tamaqu, mo ni rawata na matanitu sa vakarautaki me nomuni mai na ivakatekivu kei vuravura:

“Ni kau a viakana, ka ni a solia mai vei au na kakana: au a viagunu, ka ni a vagunuvi au: au a vulagi ka ni a kauti au ki vale:

“Luvaiwale, ka ni a vakasulumi au: au a tauvimate, ka ni a mai raici au: au a tiko ena valeniveivesu ka ni a lako mai vei au.

“Ena qai vosa vua ko ira na yalododonu ka kaya, Na Turaga, keimami a raici kemuni mada ninaica ni kemuni a viakana ka vakani kemuni? Se viagunu, ka vagunuvi kemuni?

“Se keimami a raici kemuni ninaica ni kemuni a vulagi, ka kauti kemuni ki vale? Se luvawale, ka vakasulumi kemuni?

“Se keimami a raici kemuni ninaica ni kemuni a tauvimate, se tiko e valeniveivesu, ka lako vei kemuni?

“Ena qai vosa na Tui ka kaya vei ira, au sa kaya vakaidina vei kemuni, Ni kemuni a cakava vua e dua sa lailai vei ira oqo, ni a cakava vei au.”⁹

Me da cakava vakakina sa noqu masu ena yacai Jisu Karisito, emeni.