Ngaahi Fakakaukaú
Ko ha Mana ʻo e Kilisimasí
ʻOku nofo ʻa e taha naʻá ne faʻú ʻi Kalolaine Noate, USA.
ʻOku kei tā pē hono mafú. ʻOku ʻikai ke tā lelei ʻo hangē ko ʻene tā kimuʻa pea mahaki mafú. Ka ʻoku kei tā pē.
Tā fakatātā ʻa Julie Rogers
ʻOku ongoʻi māfana hoku lotó he pooni. Ko hono moʻoní ʻoku mamahi, lavea, mo kafo. Ka ʻoku fakaofo ʻene māfaná. ʻOku ou ongoʻi mātuʻaki houngaʻia—houngaʻia fau lahi ʻo kakato ʻo hangē kuó ne fakaava hoku laumālié, ke ʻi ai ha faingamālie, ha meʻa ʻokú ne kātoi mo fakafoʻituitui ʻoku ʻikai ke ne toe taʻofi hoku loʻimatá ʻene tafe hifo ʻi hoku kouʻahé. ʻOku mānava hoku husepānití. ʻOku ou lava ʻo fanongo ki heʻene mānava faingataʻaʻia mo vaivaí.
ʻI he ongo houa kuo maliu atú, ne u kaka hake ai ki hono mohenga ʻi he falemahakí, tukunoaʻi pē ʻa e ʻaka vaivai mei heʻema pēpē ʻoku ʻamanaki fāʻeleʻi maí, pea maʻu ha kiʻi ʻatā ʻi he ngaahi uaea ʻoku huka ki hono fatafatá ke u lava ʻo ʻolunga ki ai. Ko ʻeku fanongo ko ia ki he tā hono mafú, ko ha aʻusia ia te u manatuʻi lelei ʻo taʻengata.
ʻOku kei tā pē hono mafú. ʻOku ʻikai ke tā lelei ʻo hangē ko ʻene tā kimuʻa pea mahaki mafú. Ka ʻoku kei tā pē.
Naʻá ku ongoʻi ha nonga he pooni ʻi ha ngaahi founga kehekehe, mei he ulo ʻo e maama Kilisimasi ne tautau ʻi he lokí. ʻOku fakatupu ʻe heʻenau uló ha ʻātakai fakafiemālie, ka ʻoku maʻu ʻa e nonga moʻoní mei he ʻiloʻi ko ia naʻe loto fiemālie ha ngaahi kaungāmeʻa moʻoni ke siʻaki ʻenau ngaahi palani ki he Efiafi Kimuʻa he Kilisimasí ke teuteuʻi e lokí he taimi naʻe hiki mai ai ʻa Palaieni mei he loki vakaiʻí. ʻOku tuʻu ʻa e fuʻu ʻakau Kilisimasi fute tolú (1 m) ʻi he veʻe luvá ko ha fakaʻilonga ʻo ʻenau ʻofá.
Te u fakamālō fēfē nai ki homa ngaahi kaungāmeʻá? Te nau ʻilo nai hono lahi ʻeku fie maʻu kinautolú mo ʻeku loto houngaʻiá? Lolotonga e tukutaha ʻeku fakakaukaú ki hoku husepānití, naʻa nau ʻofaʻi ʻeku fānaú, fakamaʻa hoku falé, fakafonu ʻeku ʻaisí, fai ʻeku foó, kofu ʻemau ngaahi meʻaʻofa Kilisimasí mo ʻomi e ʻofá kiate au ʻo fakafou ʻi he ngaahi fāʻofuá, maʻu meʻatokoni efiafí, kaati meʻaʻofá, paʻangá, telefoní, text ʻi he telefoní, ʻīmeilí, ngaahi pōpoakí, kato kouni sinamoní, mo ha katoleta fonu ʻi he ngaahi meʻa teuteú. Naʻa mau fetāngihi mo lotu pea ʻaukai fakataha. Pea ʻi hono fai kotoa ʻení, naʻa nau foaki mai kiate au ʻa e meʻaʻofa mahuʻinga taha naʻa nau lava ʻo foakí: ʻa ia ko honau taimí. ʻOku ou ʻofa lahi ʻiate kinautolu hono kotoa!
ʻOku ou tui te u mohe lelei he pooni, he ʻoku ʻākilotoa au ʻe he ongoʻi houngaʻia taʻe hano ngataʻanga kiate kinautolu kātoa.
Ka ʻoku mahulu ange ʻeku ongoʻi loto houngaʻia ki he ʻEikí koeʻuhí ko e moʻui ʻa hoku husepānití—ʻa ʻene mānavá, ʻa e pamu toto hono mafú, ʻi hono sino mo e laumālie moʻuí. Ko ʻene moʻuí, ʻa ʻeku mana ʻi he Kilisimasí.