Ko e Misiona Fakalangi ʻo Sīsū Kalaisí: Ko e Pilinisi ʻo e Melinó

Ako ʻi he faʻa lotu ʻa e fakamatala ko ʻení pea feinga ke ʻilo e meʻa ke vahevahé. ʻE fakatupulaki fēfē hoʻo tui ki he Fakamoʻuí ʻe he mahino ʻokú ke maʻu kau ki Heʻene moʻuí mo Hono ngaahi ngafá mo faitāpuekina ʻa kinautolu ʻokú ke tokangaʻi ʻi he faiako ʻaʻahí ? Ke maʻu ha fakamatala lahi ange, ʻalu ki he reliefsociety.lds.org.

ʻĪmisi

Mary is holding the baby Jesus while Joseph sits beside her with an arm around a lamb. A dove is watching and their is a hen with her chicks in the background.

Naʻe pehē ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá “Ko e Fakamoʻuí ʻa e maʻuʻanga ʻo e nonga moʻoní.” “ʻE lava ke fakapaleʻi ʻa kinautolu moʻui anga māʻoniʻoní ʻaki ha nonga fakatāutaha tuʻunga ʻi he Fakalelei ʻa e Fakamoʻuí mo ʻEne ʻaloʻofá, neongo ʻa e ngaahi faingataʻa ʻo e moʻuí.”¹ ʻE lava ke tokoniʻi kitautolu ʻe he mahino ko ia ko Sīsū Kalaisi ʻa e Pilinisi ʻo e Melinó ke maʻu ha loto nonga mo fakatupulaki ʻetau tui kiate Iá.

Naʻe folofola ʻa Sīsū Kalaisi, “Kuó u tala ʻa e ngaahi meʻá ni kiate kimoutolu, koeʻuhí ke mou maʻu ʻa e fiemālie ʻiate au. Te mou maʻu ʻa e mamahí ʻi māmani; ka mou loto toʻa; kuó u ikuʻi ʻa māmani” (Sione 16:33). Naʻe pehē ʻe Linitā S. Livi, tokoni ua ʻi he kau palesitenisī lahi ʻo e Fineʻofá ʻi he fakamoʻoni ki he moʻoni ko iá: “Naʻe ʻaloʻofa mai e ʻEikí kiate au pea tokoni ke fakamaʻamaʻa ʻeku kavengá. Kuó Ne tokoniʻi au ke u ongoʻi e nonga makehe.”²

Naʻe akoʻi ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e feituʻu lelei taha moʻó e melinó … ʻoku ʻi loto ʻi he ngaahi holisi hotau ʻapí, ʻa ia kuo tau fai ai e meʻa kotoa te tau lavá ke fakatefito ʻetau moʻuí ʻi he ʻEiki ko Sīsū Kalaisí.”³

Ngaahi Potufolofola Kehé

ʻIsaia 9:6; Luke 2:14; Sione 14:27; 1 Nīfai 13:37; Tokāteline mo e Ngaahi Fuakava 59:23

Mei he Folofolá

Naʻe kikiteʻi ʻe ʻIsaia ʻa e ʻaloʻi ʻo Sīsū Kalaisi, ko e Pilinisi ʻo e Melinó (vakai, ʻIsaia 9:6). Naʻe fakahā ʻe Samuela ko e tangata Leimaná ʻa e ngaahi fakaʻilonga ko ia ʻe hoko fakataha mo hono ʻaloʻi ʻo Kalaisí ʻi ha taʻu ʻe nima kimui ange, ʻi he ongo ʻAmeliká (vakai, Hilamani 14:3, 5). ʻI he ofi mai ʻa e ʻaho ne kikiteʻí, naʻe fakamanamana e kau taʻetuí te nau fakapoongi e kau Kalisitiané kapau ʻe ʻikai hoko e ngaahi fakaʻilonga ko ʻení. Naʻe “tangi fakamātoato ki he ʻEikí ʻi he ʻaho kotoa ko ia ʻa e palōfita ko Nīfaí; pea vakai, naʻe ongo mai kiate ia ʻa e leʻo ʻo e ʻEikí, ʻo pehē: … ʻI he ʻapongipongí te u haʻu ki māmani” (3 Nīfai 1:12–13). Naʻe hā mai ʻa e ngaahi fakaʻilongá, pea mo e ʻaloʻi ʻo Kalaisí, “naʻe toe kamata ke maʻu ʻe he kakaí ʻa e melinó ʻi he fonuá” (veesi 23).

Naʻe “fāʻeleʻi [ʻe Mele] ʻa e tama ko hono olopoʻou, peá ne takatakai ʻaki ia ʻa e kofú, ʻo fakatokoto ia ʻi he ʻaiʻangakai ʻo e manú,” ʻi Pētelihema (Luke 2:7).