ʻOku Ou ʻIlo ʻOkú Ne Moʻui

Fai ʻe ʻEletā Melvin J. Ballard (1873–1939)

ʻO e Kōlomu ʻo e Kau ʻAposetolo ʻe Toko Hongofulu Mā Uá

Te u foaki ʻa ia kotoa pē ʻoku ʻaʻakú, mo e meʻa kotoa pē naʻá ku ʻamanaki ki aí, ke u ongoʻi ʻa e meʻa ko ia naʻá ku ongoʻí!

ʻĪmisi

Frontal head and shoulders portrait of Jesus Christ. Christ is depicted wearing a pale red robe with a white and blue shawl over one shoulder. Light emanates from His face.

Ko e ʻĪmisi ʻo Kalaisí, tā ʻe Heinrich Hofmann, ʻi he angalelei ʻa e C. Harrison Conroy Co.

ʻOku ou manako ke fakakaukau ki he mahuʻinga ki heʻetau Tamai ʻi Hēvaní ke ʻomi kiate kitautolu ʻa e meʻaʻofa ʻo Hono ʻAlo ʻOfaʻangá, ʻa e ʻAlo moʻui taau ko ia ʻo ʻetau Tamaí, ʻa ia naʻá Ne ʻofa pehē ki he māmaní naʻá Ne tuku hifo ai ʻEne moʻuí ke huhuʻi ʻa e māmaní, ke fakahaofi kitautolu, pea ke fafanga fakalaumālie kitautolu lolotonga ʻetau ʻaʻeva ʻi he moʻui ní, pea teuteuʻi kitautolu ke tau ō ʻo nofo mo Ia ʻi he maama taʻengatá. …

ʻOku ou manatuʻi ha meʻa naʻá ku aʻusia … , ʻokú ne fakamoʻoniʻi ki hoku laumālié ʻa hono moʻoni ʻo e pekia [ʻa e Fakamoʻuí], ʻa Hono Tutukí, mo ʻEne Toetuʻú, ʻa ia ʻe ʻikai ngalo ʻiate au. …

… Ne u mohe misi ʻi ha efiafi ʻe taha ʻi he ngaahi misi ʻo e pō ko iá ʻi he fale toputapu ʻo e temipalé. Hili ha vahaʻataimi ʻo e lotú mo e fiefiá naʻe fakahā mai ʻoku totonu ke u maʻu e faingamālie ke hū ai ki ha taha ʻo e ngaahi loki ko iá, ke feʻiloaki mo ha tokotaha nāunauʻia, pea, ʻi heʻeku hū atu he matapaá, naʻá ku mamata, naʻe tangutu ʻi ha nofoʻanga māʻolunga ʻa e tokotaha nāunauʻia taha ʻa ia kuó u mamata aí, pe kuo ʻi he ngaahi maama taʻengatá.

ʻI heʻeku ofi atu ke fakafeʻiloaki ange aú, naʻá Ne tuʻu hake pea lue mai kiate au ʻo mafao mai Hono nimá, pea naʻá Ne malimali ʻi Heʻene ui leʻo siʻi ʻa hoku hingoá. Kapau te u moʻui ʻo aʻu ki ha taʻu ʻe miliona, he ʻikai teitei ngalo ʻiate au e malimali ko iá. Naʻá Ne puke au ki Hono umá mo ʻuma kiate au, puke au ki Hono fatafatá, mo tāpuakiʻi au, kae ʻoua kuo hangē ka mole atu ʻa e uho ʻo hoku ngaahi huí! ʻI Heʻene ʻosí, ne u tō ʻi Hono lalo vaʻé, pea ʻi heʻeku fufulu ia ʻaki hoku loʻimatá mo ʻuma ki aí, naʻá ku mamata ki he matakafo ʻo e faʻó ʻi he vaʻe ʻo e Huhuʻi ʻo e māmaní. Ko e ongo ne u maʻu ʻi Hono ʻaó ʻa ia ʻokú Ne maʻu ʻa e ngaahi meʻa kotoa pē ʻi Hono toʻukupú, ke maʻu ʻEne ʻofá, ʻEne tokangá, mo ʻEne tāpuakí ko ha ongo ia ʻo kapau te u lava ʻo tomuʻa maʻu ha konga ʻo e meʻa ne u ongoʻí, te u foaki ʻa ia kotoa pē ʻoku ʻaʻakú, mo e meʻa kotoa pē naʻá ku ʻamanaki ki aí, ke u ongoʻi ʻa e meʻa ko ia naʻá ku ongoʻí!

… ʻOku ʻikai ke u mamata kia Sīsū he taimí ni ʻi he funga kolosí. Ne ʻikai ke u mamata ki he monuka Hono langí ʻi hono fakatui ai ʻa e ngaahi ʻakau talatalá pe ko e kafo Hono ongo nimá ʻi he faʻó, ka ʻoku ou mamata kiate Ia ʻoku malimali, pea mafao mai Hono toʻukupú kiate kitautolu kotoa pē, ʻo pehē mai: “Haʻu kiate au!”