Ko ʻEku Meʻaʻofa Kilisimasí
ʻOku nofo ʻa e tokotaha naʻá ne faʻú ʻi ʻIutā, USA.
Ko e hā te u foaki ki he Fakamoʻuí he taʻu ko ʻení?
Tā valivali ʻa Ben Simonsen
Ko hoku nofoʻanga angamaheni ʻi he seminelí naʻe ʻi he ʻotu muí, ʻa ia naʻá ku lava ai ke talanoa mo fakakata mo hoku kaungāmeʻá. Naʻá ku toki lēsisita pē ki he seminelí koeʻuhí he naʻe ʻatā ʻeku taimi tēpilé. Naʻe fakahoko ʻa e seminelí lolotonga ʻa e ʻaho akó ʻi he feituʻu naʻá ku nofo aí, pea naʻe fokotuʻu mai ʻe ha faifaleʻi ʻi he akó ke u toʻo koeʻuhí ko ha mēmipa au ʻo e Siasí. Naʻá ku ʻiloʻi e hingoa ʻo e faiakó, ka ko e meʻa pē ia kuó u ako mei he kalasí.
ʻI he ʻaho ʻe taha, ne liʻaki ai hoku kaungāmeʻá, ko ia naʻá ku fepaki leva mo ha palopalema: ne ʻikai toe ʻi ai ha taha ke ma fefakakataʻaki. ʻI heʻeku loto-hohaʻá, naʻá ku fakahoko leva e fili ʻe taha—ne u fakafanongo. Ko e fuofua taimi ʻeni naʻá ku tokanga ai ki he faiakó.
ʻI heʻeku toe manatu ki aí, ʻoku ʻikai ke u manatuʻi ha foʻi lea ʻe taha naʻá ne lea ʻaki ʻi he ʻaho ko iá, ka ʻoku ou manatuʻi hono maʻu ʻeku tokangá. Naʻe foki mai hoku kaungāmeʻá ʻi he ʻaho hono hokó, ka naʻe ʻikai ke ma fefakakataʻaki, naʻá ku fakafanongo pea ne toe maʻu ʻeku tokangá.
Ne iku pē peá u hiki mei he tafaʻaki kimui ʻo e lokí ʻo tangutu ʻi he ʻotu muʻá, ke u tokanga lelei ange. Ne ʻikai ha kalasi ʻe ʻosi te u taʻe ongoʻi mahuʻingaʻia ai ʻi he lēsoní pe ʻi he kau ako ko ia ne vahevahe ʻenau fakamoʻoní.
Naʻá ku fiefia ʻaupito ʻi he seminelí, ko ia naʻá ku toe lēsisita ki ai he taʻu hono hokó. Naʻá ku papitaiso ʻi hoku taʻu valú ka kuo teʻeki ai ke u faʻa ʻalu ki he lotú. Ka naʻe ʻi ai ha liliu ʻi ha ʻaho ʻe taha ʻi Tīsema kimuʻa pea hoko mai e mālōlō Kilisimasí. Naʻe fakaafeʻi kimautolu ʻe he faiakó ke mau ō kimuʻa ʻi he lokí ʻo fakahā pe ko e hā e meʻaʻofa te mau foaki kia Kalaisi ʻi he taʻu ko iá.
Ne u fakakaukau, “He ʻikai fai ʻeni ia ʻe ha taha.” Ka naʻá ku ʻohovale, ʻi he lue tahataha hake e kau akó kimuʻa ʻi he kalasí. Ne tangi ʻa loʻimata ha niʻihi, vahevahe ʻe he niʻihi e ngaahi taumuʻa ne nau fokotuʻú, pea fai ʻe ha niʻihi ha ngaahi talanoa. Ne ʻikai ke u tui ki he meʻa ne hokó!
Naʻe vave ʻalu ʻa e taimí. Ko au toko taha pē naʻe teʻeki ai ke ʻalú. Kimuʻa peá u ʻiloʻi iá, ne u lue atu. Naʻe ʻikai haʻaku ʻilo ki he meʻa ke u lea ʻakí. Hili iá, naʻá ku lea leva ʻi ha leʻo tetetete ʻo pehē, “Ki he ʻaho fāʻeleʻi ʻo Kalaisi ʻi he taʻu ní, te u kamata ʻalu leva ki he lotú.”
Talu mei he ʻaho ko iá, ne kamata ke u ʻalu ki he lotú ko ʻeku meʻaʻofa ki he Fakamoʻuí. Ko e meʻa ne makehé he ko au ia naʻá ku maʻu e meʻaʻofá. Naʻe liliu ʻeku moʻuí ʻi heʻeku foki ki he lotú, pea naʻe kamata kotoa ia ʻi he ʻaho ko ia ne taʻofi ai ʻeku talanoá pea lōloa feʻunga ke u lava ʻo fakaʻatā e Laumālié ke ne ueʻi hoku lotó.
ʻOku kei lea mai pē ʻa e Laumālié kiate au. Ko e meʻa pē ke u faí ko e tuʻu ʻo fakafanongo—pea muimui leva.