Messaġġ tal-Għalliema taż-Żjajjar, Settembru 2015
Il-Kwalitajiet Divini ta’ Ġesù Kristu: Mimli Qawwa u Glorja
Bl-għajnuna tat-talb studja dan il-materjal u fittex sabiex tkun taf x’ għandek taqsam ma’ ħutek. Kif jista’ l-għarfien tiegħek tal-kwalitajiet divini tas-Salvatur ikabbar il-fidi tiegħek fih u jbierek lil dawk li int responsabbli minnhom permezz tat-tagħlim taż-żjajjar? Għal aktar informazzjoni, żuru reliefsociety.lds.org.
Fidi, Familja, Għajnuna
L-iskrittura tgħallimna li Ġesù Kristu “irċieva l-qawwa kollha, kemm fis-sema kif ukoll fl-art, u l-glorja tal-Missier kienet miegħu” (D&C 93:17). Il-Presbiteru M. Russell Ballard tal-Kworum tat-Tnax-il Appostlu qal li permezz ta’ din il-qawwa s-Salvatur tagħna ħoloq is-smewwiet u l-art, wettaq il-mirakli u kkumbatta l-uġigħ tal-Ġetsemani u l-Kalvarju.1 Hekk kif aħna nibdew nifhmu dan, il-fidi tagħna fi Kristu tikber u aħna nissaħħu.
Hekk kif aħna nagħmlu u nżommu l-patti tat-tempju, il-Mulej iberikna bil-qawwa Tiegħu. Linda K. Burton, il-president ġenerali tas-Soċjetà tal-Għajnuna, qalet: “Iż-żamma tal-patti ssaħħaħna, tqawwina u tipproteġina. … M’ilux iltqajt ma’ ħabiba ġdida u għażiża tiegħi. Hija qasmet miegħi ix-xhieda tagħha li wara li hi rċeviet l-għotja mqaddsa tagħha tat-tempju, hija ħassitha titqawwa bil-qawwa li tirreżisti t-tentazzjoni.”2
Nefi jaqsam magħna t-testimonjanza tiegħu dwar il-qawwa tal-patti “Jiena, Nefi, rajt il-qawwa tal-Ħaruf ta’ Alla, li niżlet … fuq il-poplu tal-patt tal-Mulej, … u huma ġew armati permezz tas-sewwa u permezz tal-qawwa ta’ Alla fl-ogħla glorja.”(1 Nephi 14:14).
Skrittura Addizzjonali
Mill-Iskrittura
Mimli kompassjoni għal Marta u Marija, Ġesù Kristu qajjem lil ħuhom Lazzru mill-mewt bil-qawwa ta’ Alla li Huwa kien jippossedi.
Ġesù wasal fid-dar ta’ Marta u Marija wara li Lazzru kien diġà ilu erbat ijiem midfun. Huma marru ħdejn il-qabar ta’ Lazzru, u Ġesù talab biex titneħħa l-blata li kienet qed tagħlaq il-qabar. Ġesù qal lil Marta: “Ma għedtlikx li jekk inti temmen, tara l-glorja ta’ Alla?” Imbagħad Huwa talab lil Alla l-Missier u “għajjat b’ leħen għoli, Lazzru, oħroġ!
“U dak li kien mejjet ħareġ, b’idejh u riġlejh infaxxati.” (Ara Ġwanni 11:1-45.) Is-Salvatur uża l-qawwa Tiegħu biex jifdina u jimlina bil-qawwa. Il-fidi tagħna fih tikber hekk kif aħna niftakru li Hu mimli qawwa u glorja.
© 2015 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/15. Approvazzjoni tat-traduzzjoni: 6/15. Traduzzjoni ta’ Visiting Teaching Message, September 2015. Maltese. 12589 159
Ikkunsidraw Dan
Il-qawwa ta’ Alla kif tista’ tarmana bil-qawwa u l-glorja?