សារលិខិតគណៈប្រធានទីមួយ ខែ កញ្ញា ឆ្នាំ ២០១៥

ក្រុមគ្រួសារ និង ការអធិស្ឋាន

ដោយ ប្រធាន ហិនរី ប៊ី អាវរិង

ទីប្រឹក្សាទីមួយក្នុងគណៈប្រធានទីមួយ

មានយប់មួយ ពេលដែលខ្ញុំបានអង្គុយនៅក្បែរគ្រែឪពុករបស់ខ្ញុំ គាត់បាននិយាយពីកុមារភាពរបស់គាត់ ។ គាត់បាននិយាយពី សេចក្តីស្រឡាញ់របស់ឪពុកម្តាយគាត់នៅក្នុងគ្រាលំបាកៗ និង សេចក្តីស្រឡាញ់របស់ព្រះវរបិតាសួគ៌ទ្រង់ និង ព្រះអង្គសង្គ្រោះ ។ ខ្ញុំបានដឹងថា គាត់នឹងស្លាប់ដោយសារជំងឺមហារីក ដូច្នេះខ្ញុំពុំភ្ញាក់ផ្អើលទេ នៅពេលដែលអារម្មណ៍របស់គាត់ច្របូកច្របល់ចំពោះព្រះវរបិតាសួគ៌ ជាមួយនឹងសេចក្តីស្រឡាញ់ និង សេចក្តីសប្បុរសរបស់ឪពុកលើផែនដីរបស់គាត់ ។ ឪពុកខ្ញុំតែងថ្លែងជាញឹកញាប់ថា នៅពេលគាត់បានអធិស្ឋាន នោះ គាត់បានគិតក្នុងចិត្តថា គាត់អាចឃើញព្រះវរបិតាសួគ៌ញញឹមដាក់គាត់ ។

ឪពុកម្ដាយរបស់គាត់បានបង្រៀនគាត់តាមរយៈគំរូឲ្យអធិស្ឋាន ហាក់បីដូចជាគាត់បាននិយាយទៅកាន់ព្រះ ហើយថាព្រះនឹងឆ្លើយតបដល់គាត់ដោយសេចក្តីស្រឡាញ់ ។ គាត់ត្រូវការគំរូនោះ រហូតដល់ទីបំផុតនៃជីវិត ។ នៅពេលក្តីឈឺចាប់កាន់តែខ្លាំងឡើង នោះយើងបានឃើញគាត់លុតជង្គង់ចុះនៅពេលព្រឹកក្បែរគ្រែ ។ សុខភាពគាត់ទ្រុឌទ្រោមណាស់ហើយស្ទើរតែក្រោកឡើងលើគ្រែវិញមិនរួច ។ គាត់បានប្រាប់ពួកយើងថា គាត់បានអធិស្ឋានសួរព្រះវរបិតាសួគ៌ពីមូលហេតុដែលគាត់ត្រូវរងការឈឺចាប់យ៉ាងខ្លាំង នៅពេលគាត់ព្យាយាមធ្វើល្អជានិច្ចនោះ ។ គាត់បានមានប្រសាសន៍ថា ចម្លើយដ៏ទន់ភ្លន់មួយបានមកថា « ព្រះត្រូវការកូនប្រុសដែលក្លាហាន » ។

ដូច្នេះហើយគាត់បានស៊ូទ្រាំរហូតដល់អស់ជីវិត ដោយទុកចិត្តថា ព្រះស្រឡាញ់គាត់ ស្តាប់គាត់ ហើយនឹងលើកគាត់ឡើង ។ គាត់បានទទួលពរ ដែលបានស្គាល់ទ្រង់តាំងពីក្មេង ហើយមិនដែលភ្លេចថា ព្រះដែលពេញដោយក្តីស្រឡាញ់នឹងគង់នៅជិតនៅពេលអធិស្ឋាននោះឡើយ ។

នេះជាហេតុដែលព្រះអម្ចាស់បានបង្រៀនឪពុកម្តាយថា « ហើយពួកគេក៏ត្រូវបង្រៀនកូនចៅរបស់ខ្លួន ឲ្យអធិស្ឋាន និង ឲ្យដើរដោយទៀងត្រង់នៅចំពោះព្រះអម្ចាស់ » (គ និង ស ៦៨:២៨) ។

ដំណឹងល្អរបស់ព្រះយេស៊ូវគ្រីស្ទបានស្តារឡើងវិញ — ជាមួយនឹងព្រះគម្ពីរមរមន និង កូនសោបព្វជិតភាពទាំងអស់ដែលចងភ្ជាប់ក្រុមគ្រួសារ — ដោយសារយ៉ូសែប ស្ម៊ីធ បានអធិស្ឋានដោយសេចក្តីជំនឿ កាលពីលោកនៅក្មេង ។ លោកបានទទួលសេចក្តីជំនឿនោះ នៅក្នុងគ្រួសារដែលពេញដោយសេចក្តីស្រឡាញ់ និង ស្មោះត្រង់ ។

កាលពីម្ភៃឆ្នាំមុន ព្រះអម្ចាស់បានផ្តល់ឱវាទនេះដល់ក្រុមគ្រួសារនៅក្នុង « ក្រុមគ្រួសារ ការប្រកាសដល់ពិភពលោក » មកពីគណៈប្រធានទីមួយ និង សាវកដប់ពីរនាក់ ៖« គ្រួសារ និង អាពាហ៍ពិពាហ៍ដែលមាន ជោគជ័យ សុភមង្គល គឺ បានស្ថាបនា និង រក្សាដោយគោលការណ៍នៃសេចក្តីជំនឿ ការអធិស្ឋាន ការប្រែចិត្ត ការអភ័យទោស ការគោរពគ្នា ស្រឡាញ់គ្នា សេចក្តីមេត្តាករុណា ការងារ និង កម្មវិធីកម្សាន្តល្អៗទំាងឡាយ » ។^១

យើងជំពាក់បំណុលនៃការដឹងគុណជាច្រើនចំពោះគ្រួសាររបស់ព្យាការី យ៉ូសែប ស៊្មីធ សម្រាប់របៀបដែលពួកគាត់បានចិញ្ចឹមលោក ។ គ្រួសាររបស់លោកផ្តល់ជាគំរូមិនត្រឹមតែលើសេចក្តីជំនឿ និងការអធិស្ឋានទេ ប៉ុន្តែព្រមទាំង ការប្រែចិត្ត ការអភ័យទោស សេចក្តីគោរព សេចក្តីស្រឡាញ់ សេចក្តីមេត្តាករុណា ការងារ ហើយនិងកម្មវិធីកម្សាន្តល្អៗទំាងឡាយផងដែរ » ។

កូនចៅជំនាន់ក្រោយៗរបស់អ្នកអាចរាប់ថាអ្នកមានពរសម្រាប់គំរូរបស់អ្នកអំពី ការអធិស្ឋាននៅក្នុងគ្រួសារខ្លួន ។ អ្នកប្រហែលជាមិនបានចិញ្ចឹមបីបាច់អ្នកបម្រើដ៏ល្អម្នាក់របស់ព្រះឡើយ ប៉ុន្តែអ្នកអាចធ្វើការណ៍នេះបានតាមរយៈការអធិស្ឋាន និងគំរូនៃភាពស្មោះត្រង់របស់អ្នក ដើម្បីជួយព្រះយេស៊ូវគ្រីស្ទ ចិញ្ចឹមបីបាច់កូនសិស្សដ៏ល្អ និង ជាទីស្រឡាញ់ ។

លើសពីនោះ អ្នកអាចជ្រើសរើសធ្វើការណ៍នានាដើម្បីជួយព្រះអម្ចាស់ ហើយការអធិស្ឋាននឹងក្លាយជាគ្រឹះដ៏សំខាន់ចំពោះការណ៍នេះ ។ មានមនុស្សសាមញ្ញដែលបំផុសគំនិតមនុស្សដទៃឲ្យបើកភ្នែករបស់ខ្លួនមើលថាអ្នកណានៅទីនោះ នៅពេលដែលពួកគេអធិស្ឋាន ។ អ្នកអាចក្លាយជាមនុស្សបែបនោះបាន ។

ចូរគិតពីអ្វីដែលអាចមានន័យចំពោះអ្នកដែលលុតជង្គង់ជាមួយអ្នកនៅក្នុងការអធិស្ឋានជាគ្រួសារ ។ នៅពេលពួកគេទទួលអារម្មណ៍ថា អ្នកអំពាវនាវទៅកាន់ព្រះដោយសេចក្តីជំនឿ នោះសេចក្តីជំនឿរបស់ពួកគេនឹងពង្រីកការអំពាវនាវទៅកាន់ព្រះផងដែរ ។ នៅពេលអ្នកអធិស្ឋានថ្លែងអំណរគុណដល់ព្រះសម្រាប់ពរជ័យដែលពួកគេដឹងថាបានប្រទានមក នោះជំនឿពួកគេនឹងរីកលូតលាស់ថាព្រះស្រឡាញ់ពួកគេ ហើយថាទ្រង់ឆ្លើយតបការអធិស្ឋានអ្នក ក៏នឹងឆ្លើយចំពោះការអធិស្ឋានរបស់ពួកគេផងដែរ ។ ការណ៍នោះអាចកើតឡើងតែនៅក្នុងការអធិស្ឋានជាគ្រួសារប៉ុណ្ណោះ នៅពេលអ្នកបានមានបទពិសោធន៍នោះក្នុងការអធិស្ឋានផ្ទាល់ខ្លួនជាច្រើនដង ។

ខ្ញុំនៅតែមានពរដោយឪពុក និង ម្តាយម្នាក់ដែលបាននិយាយជាមួយព្រះ ។ គំរូរបស់ពួកគាត់អំពីអំណាចនៃការអធិស្ឋានក្នុងក្រុមគ្រួសារគឺនៅតែផ្តល់ពរជ័យដល់ជំនាន់ក្រោយៗជាច្រើន ។

កូនៗ និង ចៅៗរបស់ខ្ញុំមានពរជារៀងរាល់ថ្ងៃតាមរយៈគំរូរបស់ឪពុកម្តាយខ្ញុំ ។ សេចក្តីជំនឿដែលថាព្រះដែលពោរពេញដោយសេចក្តីស្រឡាញ់ស្តាប់ និង ឆ្លើយតបការអធិស្ឋាន ត្រូវបានបញ្ជូនបន្តដល់ពួកគេ ។ អ្នកអាចបង្កើតមរតកដ៏ល្អបែបនេះបាននៅក្នុងគ្រួសាររបស់អ្នក ។ ខ្ញុំសូមអធិស្ឋានថាអ្នកនឹងអាចធ្វើបែបនេះបាន ។

© ឆ្នាំ 2015 ដោយ Intellectual Reserve, Inc ។ រក្សាសិទ្ធិគ្រប់យ៉ាង ។ បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ ៦/១៤ ។ អនុមតិឲ្យបកប្រែ ៖ ៦/១៤ ។ ការបកប្រែនៃ First Presidency Message, September 2015 ។ Cambodian ។ 12589 258

ប្រារព្ធខួបលើកទី ២០ នៃ សេចក្ដីប្រកាសស្ដីអំពីក្រុមគ្រួសារ

« ក្រុមគ្រួសារ ៖ ការប្រកាសដល់ពិភពលោក » បង្រៀនពីគោលការណ៍នានាដែលវាក៏អនុវត្តបាននៅពេលបច្ចុប្បន្ននេះ កាលសេចក្តីប្រកាសនេះបានចេញជាលើកដំបូងនៅថ្ងៃទី ២៣ ខែ កញ្ញា ឆ្នាំ ១៩៩៥ ។ សូមពិចារណាពីការអញ្ជើញបុគ្គលម្នាក់ៗ ឬ ក្រុមគ្រួសារដែលអ្នកបង្រៀនឲ្យប្រារព្ធខួបលើកទី ២០ ឆ្នាំនៃសេចក្តីប្រកាសនេះដោយ ៖

ធ្វើបញ្ជីនៃគោលការណ៍ដែលមាននៅក្នុងសេចក្តីប្រកាសនោះ ដែលមានសារៈសំខាន់ពិសេសចំពោះពួកគេ ។ ( សូមមើលពី របៀបដែលប្រធាន អាវរិង ធ្វើជាមួយការអធិស្ឋាននៅក្នុងសារលិខិតខាងលើនេះ ) ។
ពិភាក្សាពីរបៀបដែលគោលការណ៍និមួយៗអាចប្រទានពរដល់ពួកគេនាពេលឥឡូវនេះ និងនាពេលអនាគត ។
ដាក់គោលដៅជាក់លាក់ដើម្បីរួមបញ្ចូលគោលការណ៍ទាំងនោះទៅក្នុងជីវិតរបស់ពួកគេ និង ចែកចាយគោលការណ៍នោះជាមួយមនុស្សដទៃទៀត ។