ຂ່າວສານການຢ້ຽມສອນ, ເດືອນຕຸລາ 2015
ຄຸນສົມບັດແຫ່ງສະຫວັນຂອງພຣະເຢຊູຄຣິດ: ເຕັມໄປດ້ວຍຄວາມໃຈບຸນ ແລະ ຄວາມຮັກ
ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈຄຸນສົມບັດແຫ່ງສະຫວັນຂອງພຣະຜູ້ຊ່ອຍໃຫ້ລອດ ເພີ່ມສັດທາຂອງທ່ານໃນພຣະອົງ ແລະ ເປັນພອນໃຫ້ແກ່ຄົນທີ່ທ່ານດູແລ ຜ່ານການຢ້ຽມສອນໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.
ສັດທາ • ຄອບຄົວ • ສົງເຄາະ
The Guide to the Scriptures ອະທິບາຍກ່ຽວກັບຄວາມໃຈບຸນ ວ່າເປັນ “ຄວາມຮັກທີ່ສູງສຸດ, ມີກຽດທີ່ສຸດ, ແລະ ໜຽວແໜ້ນທີ່ສຸດ” (“Charity”). ມັນເປັນຄວາມຮັກທີ່ບໍລິສຸດຂອງພຣະເຢຊູຄຣິດ. ເມື່ອເຮົາຮຽນຮູ້ກ່ຽວກັບພຣະເຢຊູຄຣິດ ແລະ ພະຍາຍາມກາຍເປັນເໝືອນດັ່ງພຣະອົງ, ເຮົາຈະເລີ່ມຕົ້ນຮູ້ສຶກເຖິງຄວາມຮັກອັນບໍລິສຸດຂອງພຣະອົງໃນຊີວິດຂອງເຮົາ ແລະ ຈະຖືກກະຕຸ້ນໃຫ້ຮັກ ແລະ ຮັບໃຊ້ຄົນອື່ນ ດັ່ງທີ່ພຣະອົງຈະກະທຳ. “ຄວາມໃຈບຸນ ຄືການມີຄວາມອົດທົນນຳບາງຄົນທີ່ເຄີຍເຮັດໃຫ້ເຮົາຜິດຫວັງ,” ປະທານທອມມັສ ແອັສ ມອນສັນ ໄດ້ກ່າວ. “ມັນຄືການຕ້ານທານກັບຄວາມຮູ້ສຶກທີ່ຄຽດງ່າຍ. ມັນຄືການຮັບຄວາມອ່ອນແອ ແລະ ຄວາມບົກພ່ອງ. ມັນຄືການຮັບຜູ້ຄົນ ຕາມທີ່ເຂົາເຈົ້າເປັນ. ຄືການບໍ່ສົນໃຈກັບລັກສະນະຮູບຮ່າງພາຍນອກ, ແຕ່ສົນໃຈກັບຄຸນສົມບັດ ທີ່ຈະບໍ່ດັບໄປຕາມການເວລາ. “ມັນຄືການຕ້ານທານກັບຄວາມຮູ້ສຶກ ທີ່ຈັດລະດັບຄົນອື່ນ.”1
ໃນພຣະຄຳພີມໍມອນ, ເຮົາຮຽນຮູ້ເຖິງຄວາມຈິງທີ່ສຳຄັນ ທີ່ວ່າເຮົາ “ອະທິຖານຫາພຣະບິດາດ້ວຍສຸດພະລັງແຫ່ງໃຈ, ເພື່ອ [ເຮົາ] ຈະເຕັມໄປດ້ວຍຄວາມຮັກນີ້, ຊຶ່ງພຣະອົງປະທານໃຫ້ທຸກຄົນທີ່ເປັນຜູ້ຕິດຕາມທີ່ແທ້ຈິງຂອງພຣະເຢຊູຄຣິດ, ພຣະບຸດຂອງພຣະອົງ; ເພື່ອ [ເຮົາ] ຈະໄດ້ກາຍມາເປັນບຸດ [ແລະ ທິດາ] ຂອງພຣະເຈົ້າ; ເມື່ອພຣະອົງສະເດັດມາ ເຮົາຈະເປັນເໝືອນດັ່ງພຣະອົງ, ເພາະວ່າເຮົາຈະເຫັນພຣະອົງຢ່າງທີ່ພຣະອົງເປັນຢູ່ນັ້ນ, ເພື່ອເຮົາຈະມີຄວາມຫວັງນີ້; ຄືເຮົາຈະຖືກເຮັດໃຫ້ບໍລິສຸດຄືກັນກັບພຣະອົງທີ່ບໍລິສຸດ” (ໂມໂຣໄນ 7:48).
ຂໍ້ພຣະຄຳພີເພີ່ມເຕີມ
ໂຢຮັນ 13:34–35; 1 ໂກຣິນໂທ 13:1–13; 1 ນີໄຟ 11:21–23; ອີເທີ 12:33–34
ຈາກປະຫວັດສາດຂອງເຮົາ
“ເອື້ອຍນ້ອງຄົນໜຶ່ງ ຜູ້ໄດ້ກາຍເປັນແມ່ໝ້າຍເມື່ອບໍ່ດົນມານີ້ ໄດ້ຂອບພຣະໄທສຳລັບຜູ້ຢ້ຽມສອນ ທີ່ໄດ້ເປັນທຸກກັບນາງ ແລະ ໄດ້ປອບໂຍນນາງ. ນາງໄດ້ຂຽນວ່າ: ‘ຂ້າພະເຈົ້າຕ້ອງການບາງຄົນຫລາຍແທ້ໆ ທີ່ຂ້າພະເຈົ້າສາມາດເອື້ອມອອກໄປຫາ; ບາງຄົນທີ່ຈະຮັບຟັງຂ້າພະເຈົ້າ. … ແລະ ເຂົາເຈົ້າໄດ້ຮັບຟັງ. ເຂົາເຈົ້າໄດ້ປອບໂຍນຂ້າພະເຈົ້າ. ເຂົາເຈົ້າໄດ້ຮ້ອງໄຫ້ກັບຂ້າພະເຈົ້າ. ແລະ ເຂົາເຈົ້າໄດ້ໂອບກອດຂ້າພະເຈົ້າ … ແລະ ໄດ້ຊ່ອຍເຫລືອຂ້າພະເຈົ້າອອກມາຈາກຄວາມສິ້ນຫວັງ ແລະ ຄວາມເສົ້າໃຈ ໃນໄລຍະໜຶ່ງເດືອນທຳອິດ ແຫ່ງຄວາມເປົ່າປ່ຽວດຽວດາຍ.’
“ຜູ້ຍິງອີກຄົນໜຶ່ງ ໄດ້ສະຫລຸບຄວາມຮູ້ສຶກຂອງນາງ ຕອນນາງໄດ້ເປັນຜູ້ຮັບຄວາມໃຈບຸນທີ່ແທ້ຈິງ ຈາກຜູ້ຢ້ຽມສອນ ວ່າ: ‘ຂ້າພະເຈົ້າໄດ້ຮູ້ວ່າ ຂ້າພະເຈົ້າມີຄວາມໝາຍຫລາຍກວ່າ ໂຕເລກຢູ່ໃນປຶ້ມບັນທຶກ ເພື່ອໃຫ້ນາງມາຢ້ຽມຢາມ. ຂ້າພະເຈົ້າໄດ້ຮູ້ວ່າ ນາງເປັນຫ່ວງເປັນໃຍ ຂ້າພະເຈົ້າ.’”2
ເຊັ່ນດຽວກັບເອື້ອຍນ້ອງເຫລົ່ານີ້, ໄພ່ພົນຍຸກສຸດທ້າຍ ຕະຫລອດທົ່ວໂລກ ສາມາດເປັນພະຍານເຖິງຄວາມຈິງໃນບົດຄວາມນີ້ ຊຶ່ງກ່າວໂດຍ ປະທານບອຍ ເຄ ແພ໊ກເກີ (1924-2015), ປະທານຂອງກຸ່ມອັກຄະສາວົກສິບສອງ ທີ່ວ່າ: “ຊ່າງເປັນສິ່ງປອບໃຈແທ້ໆ ທີ່ຮູ້ວ່າ ບໍ່ວ່າ [ຄອບຄົວຈະ] ໄປໃສ, ຄອບຄົວຂອງສາດສະໜາຈັກ ຈະລໍຖ້າເຂົາເຈົ້າຢູ່. ຈາກວັນທີ່ເຂົາເຈົ້າມາເຖິງ, ຜູ້ເປັນຜົວຈະຖືກຮ່ວມເຂົ້າກັບກຸ່ມຖານະປະໂລຫິດ ແລະ ຜູ້ເປັນເມຍຈະຖືກຮ່ວມເຂົ້າກັບສະມາຄົມສະຕີສົງເຄາະ.”3
© 2015 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ Visiting Teaching Message, October 2015. Laotian. 12590 331
ໃຫ້ພິຈາລະນາສິ່ງນີ້
ພຣະຄຣິດເປັນແບບຢ່າງທີ່ດີພ້ອມ ຂອງເຮົາເຖິງຄວາມຮັກ ແລະ ຄວາມໃຈບຸນ ແນວໃດ?