ຊາວໜຸ່ມ
ເຕີມເຊື້ອໄຟໃສ່ກະບອງຂອງເຈົ້າ: ການທົດລອງ 30 ມື້
ສຳລັບຊາວໜຸ່ມໃນສາດສະໜາຈັກທີ່ຫຍຸ້ງຫລາຍໃນຊີວິດ, ອາດເປັນສິ່ງງ່າຍ ທີ່ຈະຫຍຸ້ງຢູ່ກັບການເຮັດກິດຈະກຳຢ່າງທີ່ເຄີຍເຮັດທຸກວັນ, ໂດຍສະເພາະກັບສິ່ງທີ່ເປັນທາງວິນຍານ. ເຮົາອ່ານພຣະຄຳພີຂອງເຮົາ, ອະທິຖານ, ແລະ ນະມັດສະການ ໃນວິທີດຽວກັນເກືອບທຸກວັນ ແລະ ຈຶ່ງສົງໄສວ່າ ດ້ວຍເຫດໃດເຮົາຈຶ່ງ ເບິ່ງຄືວ່າ ເຮົາຈົມຢູ່ໃນຄວາມຕ່ຳຕ້ອຍທາງວິນຍານ.
ວິທີທີ່ດີທີ່ສຸດຢ່າງໜຶ່ງທີ່ສາມາດຮັກສາໃຫ້ກະບອງແຫ່ງວິນຍານຂອງເຈົ້າໃຫ້ລຸກໄໝ້ຢ່າງຮຸ່ງເຫລື້ອມ ຄືການໃຫ້ແນ່ໃຈວ່າ ເຈົ້າມີປະສົບການທາງວິນຍານ ທີ່ມີຄວາມໝາຍ. ແຕ່ມັນເປັນສິ່ງທີ່ເວົ້າງ່າຍເຮັດຍາກ, ສະນັ້ນ ຕໍ່ໄປນີ້ແມ່ນຄຳແນະນຳ ທີ່ຈະຊ່ອຍເຫລືອເຈົ້າ ໃຫ້ມີຄວາມກ້າວໜ້າທາງວິນຍານ: ໃຫ້ຄິດກ່ຽວກັບກິດຈະກຳທີ່ກ່ຽວຂ້ອງກັບ ພຣະກິດຕິຄຸນທີ່ເຈົ້າບໍ່ເຄີຍເຮັດມາກ່ອນ (ຫລື ສ່ວນຫລາຍບໍ່ໄດ້ເຮັດ) ແລະ ໃຫ້ຕັ້ງໃຈເຮັດມັນທຸກມື້ ເປັນເວລາໜຶ່ງເດືອນ. ເຈົ້າສາມາດເລີ່ມຕົ້ນເຮັດໜ້ອຍໜຶ່ງ ເພາະເຈົ້າຈະພົບວ່າ ມັນງ່າຍທີ່ຈະປ່ຽນເທື່ອລະນ້ອຍ ໃຫ້ກາຍເປັນສິ່ງຍາວນານ. ການເຮັດສິ່ງທີ່ບໍ່ສະດວກ ອາດຮຽກຮ້ອງສັດທາ ແລະ ຄວາມພະຍາຍາມຈາກເຮົາ, ແຕ່ເມື່ອເຮົາເຮັດມັນ, ເຮົາຈະເຊື້ອເຊີນ ພຣະວິນຍານບໍລິສຸດໃຫ້ມາສະຖິດຢູ່ກັບເຮົາ, ແລະ ເຮົາຈະສະແດງໃຫ້ເຫັນສັດທາທີ່ມີຫລາຍ ໃນພຣະບິດາເທິງສະຫວັນ ແລະ ປາດຖະໜາທີ່ຈະເຂົ້າໃກ້ພຣະອົງຫລາຍຂຶ້ນ. ຕໍ່ໄປນີ້ ແມ່ນສອງສາມວິທີທີ່ຈະຊ່ອຍໃຫ້ເຈົ້າເລີ່ມຕົ້ນ:
-
ຕັ້ງເປົ້າໝາຍທີ່ຈະອະທິຖານໃນຕອນເຊົ້າ ແລະ ຕອນແລງ. ລອງອະທິຖານອອກສຽງ.
-
ໃຊ້ເວລາ 15 ນາທີ ເພື່ອອ່ານພຣະຄຳພີ ກ່ອນໄປໂຮງຮຽນ.
-
ອ່ານບົດຄວາມປາໄສຈາກກອງປະຊຸມໃຫຍ່ທີ່ຜ່ານມາ.
-
ຕິດຂໍ້ຄວາມຈາກພຣະຄຳພີມໍມອນ ໃສ່ໃນການສື່ສັງຄົມ.
-
ຟັງເພງສວດ ຫລື ເພງຂອງສາດສະໜາຈັກ ແທນເພງທີ່ເຈົ້າຟັງເປັນປະຈຳ.