Thawj Pawg Thawj Tswj Hwm tsab Xov, Kaum Hli Ntuj 2015
Mus txog Kawg nrog Koj tus Tsau Tseem Cig
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Nyob hauv teb chaws Kilis thaum ub, muaj neeg uas sib tw khiav hla dhau tej theem tej theem mus hu ua lampadedromia.1 Thaum lawv khiav, lawv nqa ib tug tsau thiab muab rau tus uas khiav tom qab, mus li ntawd txog thaum tus kawg tau hla txoj kab xaus kev sib tw khiav.
Tsis tau muab nqi zog rau pawg uas khiav nrawm tshaj plaws—twb muab nqi zog rau pawg uas los txog rau ntawm txoj kab xaus kev sib tw khiav es lawv tus tsau tseem cig.
Zaj no yog ib zaj lus qhia tseem ceeb heev, yog ib zaj uas cov yaj saub thaum ub thiab niaj hnub nim no tau qhia: txawm qhov uas yus pib khiav yog ib qho tseem ceeb, qhov uas peb ua tag thaum peb tus tsau tseem cig yeej tseem ceeb tshaj.
Xalaumoos Zoo Thaum Pib
Tus Vaj Ntxwv Xalaumoos yeej yog ib tug neeg uas zoo thaum pib. Thaum nws yog ib tug tub hluas, nws “muab siab npuab tus Tswv thiab ua raws li nws txiv Daviv tej lus qhuab ntuas” (1 Vaj Ntxwv 3:3). Vajtswv zoo siab rau nws thiab hais tias, “Koj xav kom kuv muab dab tsi rau koj” (1 Vaj Ntxwv 3:5).
Nws tsis thov kom muaj nyiaj los yog ua neej nyob ntev heev, tiam sis Xalaumoos thov pub “kom kuv muaj tswv yim tswj hwm koj haiv neeg ncaj ncees thiab paub qhov phem qhov zoo” (1 Vaj Ntxwv 3:9).
Qhov no ua rau tus Tswv zoo siab heev Nws thiaj li foom koob hmoov rau Xalaumoos kom nws muaj tswv yim thiab muaj nyiaj txiag tshaj
Txawm Xalaumoos yeej muaj tswv yim heev thiab ua ntau yam zoo heev, nws tsis tau ua zoo thaum kawg. Tu siab uas thaum nws laus, “[Xalaumoos] tau ua txhaum rau tus Tswv thiab tsis ua raws li tus Tswv lub siab nyiam” (1 Vaj Ntxwv 11:6).
Xaus Peb txoj Kev Sib Tw Khiav
Pes tsawg zaus peb tau pib ib yam dab tsi thiab tsis ua tag? Kev noj kom yuag? Kev qoj cev? Kev cog lus tias yuav nyeem vaj lug kub txhua hnub? Kev txiav txim siab tias yuav rais los ua thwj tim zoo dua rau Yexus Khetos?
Pes tsawg zaus peb cia li cuab hom phiaj thaum lub Ib Hlis Ntuj thiab rau siab ua tau ob peb hnub, ob peb lub lim tiam, los yog ob peb lub hlis ces thaum lub Kaum Hli Ntuj, pom hais tias qhov hluav tawv ntawm peb lub hom phiaj twb yog hmoov tshauv txias txias lawm?
Muaj ib hnub kuv pom ib daim duab txaus luag txog ib tug aub uas pw ze ib daim ntawv uas nws tau tom tag. Daim ntawv ntawd hais tias “Daim Ntawv Pov Thawj Tau Qhia tus Aub Kom Mloog Lus.”
Tej lub sij hawm peb yeej zoo li ntawd.
Peb xav ua zoo; peb ua zoo thaum pib; peb xav ua neeg zoo tshaj plaws. Tiam sis thaum kawg peb muab peb tej lub hom phiaj tso pov tseg, thiab tsis nco qab lawm.
Tib neeg yeej dawm, poob, thiab tej lub sij hawm peb tsis xav khiav ntxiv. Tiam sis vim peb yog Yexus Khetos cov thwj tim, peb twb cog lus tias peb yuav pib khiav thiab khiav kom tag—thiab khiav tag nrog peb tus tsau uas tseem cig. Tus Cawm Seej cog lus rau Nws cov thwj tim hais tias, “Tus uas ua siab ntev mus txog hnub kawg, tus ntawd yuav dim” (Mathais 24:13).
Cia kuv qhia hais tias tus Cawm Seej tau cog lus rau peb li cas nyob hauv peb lub caij nyoog no: yog peb ua raws li Nws cov lus txib thiab ua kom tag thaum peb tus tsau tseem cig, ces peb yuav tau txoj sia nyob mus ib txhis, uas yog lub txiaj ntsim zoo tshaj plaws uas Vajtswv tau foom pub (saib Q&K 14:7; kuj saib 2 Nifais 31:20).
Txoj Kev Kaj uas Yeej Tsis Tuag
Tej lub sij hawm tom qab peb ntog, poob, los yog tso tseg, peb poob siab thiab ntseeg hais tias peb lub teeb twb tuag thiab peb tsis yeej txoj kev sib tw khiav lawm. Tiam sis kuv ua tim khawv hais tias Khetos txoj Kev Kaj tuag tsis tau. Khetos txoj Kev Kaj ci ntsa iab hauv qhov tsaus ntuj tshaj plaws thiab yuav ua rau peb lub siab cig yog tias peb muab siab npuab nws (saib 1 Vaj Ntxwv 8:58).
Txawm peb poob deb los yog poob ntau npaum li cas los, Khetos txoj Kev Kaj ci ntsa iab heev mus ib txhis. Thiab txawm peb nyob hauv qhov tsaus ntuj nti, yog peb yuav mus cuag Nws, Nws txoj kev kaj yuav ua rau qhov tsaus ntuj ploj mus thiab ua rau peb sab ntsuj plig rov qab cig.
Kev sib tw khiav ntawm kev ua thwj tim tsis yog ib txoj kev khiav ceev; yog kev sib tw khiav ntev. Thiab peb khiav ceev npaum li cas los tsis ua li cas. Muaj tseeb tiag, tib txoj kev peb yuav swb yog thaum peb tso tseg ua ntej qhov kawg.
Yog peb nce mus thiab mus cuag peb Cawm Seej tas li, peb yuav yeej txoj kev sib tw khiav nrog peb tej tsau uas cig loj heev.
Vim tus tsau tsis piv txog peb los sis piv txog tej yam peb ua.
Tus tsau piv txog tus Cawm Seej ntawm lub ntiaj teb no.
Yog ib txoj Kev Kaj uas yeej yuav tsis qauj le. Yog ib txoj Kev Kaj uas ua rau qhov tsaus ntuj ploj mus, kho peb tej qhov txhab, thiab ci ntsa iab txawm yog peb nyuaj siab kawg nkaus thiab nyob hauv qhov tsaus ntuj nti.
Yog ib txoj Kev Kaj uas tsis muaj leej twg to taub.
Thov kom peb txhua tus yuav mus txog thaum kawg ntawm txoj kev uas peb pib taug. Thiab nrog peb tus Cawm Seej thiab tus Txhiv Dim, Yexus Khetos, txoj kev pab, peb yuav zoo siab mus txog thaum kawg nrog peb tej tsau uas tseem cig.
© 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/15. Pub txhais ua lus Hmoob: 6/15. Kev txhais First Presidency Message, October 2015. Hmong. 12590 295
Qhia los ntawm tsab Xov No
Cia li xav seb puas xav yaum cov uas koj qhia kom lawv xav txog qhov uas lawv txog ntawm qhov twg thaum lawv “khiav” hauv lub neej no. Lawv tej tsau puas cig loj heev? Tej zaum koj yuav xav nyeem kab lus uas hais tias Khetos txoj Kev Kaj yog “ib txoj Kev Kaj uas ua rau qhov tsaus ntuj ploj mus, kho peb tej qhov txhab, thiab ci ntsa iab txawm yog peb nyuaj siab kawg nkaus thiab nyob hauv qhov tsaus ntuj nti.” Ces cia li xav seb puas xav sib tham nrog cov uas koj qhia seb Khetos txoj Kev Kaj tau pab lawv lub neej dhau los thiab pab lawv lub neej tam sim no li cas.