ຊາວໜຸ່ມ
ການແບ່ງປັນຄວາມສຸກນິລັນດອນ
ສິ່ງທີ່ດີທີ່ສຸດຢ່າງໜຶ່ງກ່ຽວກັບພຣະກິດຕິຄຸນແມ່ນ ການມີຄວາມຮູ້ເຖິງແຜນແຫ່ງຄວາມລອດ. ເຮົາມີໂອກາດທີ່ດີ ທີ່ຈະໄດ້ຢູ່ກັບຄອບຄົວຂອງເຮົາຊົ່ວນິລັນດອນ. ຄວາມຮູ້ນັ້ນ ຊ່ວຍເຮົາໃຫ້ມີຄວາມຫວັງ ເມື່ອໃດກໍຕາມທີ່ເຮົາຮູ້ສຶກກົດດັນຫລາຍຈາກໂລກ. ປະທານໄອຣິງ ສອນວ່າ, “ພຣະບິດາເທິງສະຫວັນທີ່ຮັກຂອງເຮົາ ຮູ້ໃຈຂອງເຮົາດີ. ພຣະປະສົງຂອງພຣະອົງ ແມ່ນໃຫ້ເຮົາມີຄວາມສຸກ (ເບິ່ງ 2 ນີໄຟ 2:25). ສະນັ້ນ ພຣະອົງຈຶ່ງໄດ້ປະທານພຣະບຸດຂອງພຣະອົງໃຫ້ເຮົາ ເພື່ອວ່າຄວາມຜູກພັນຢ່າງມີຄວາມສຸກຂອງຄອບຄົວ ຈະຄົງຢູ່ສືບຕໍ່ໄປຕະຫລອດການ. … ມັນເປັນຂໍ້ສະເໜີທີ່ລູກທຸກຄົນຂອງພຣະເຈົ້າ ຜູ້ທີ່ໄດ້ມາສູ່ໂລກນີ້ ສາມາດທວງເອົາໄດ້.”
ພອນນັ້ນແມ່ນສຳລັບຄົນທີ່ມີຊີວິດຢູ່ໃນເວລານີ້ ແລະ ສຳລັບຄົນທີ່ໄດ້ລ່ວງລັບໄປແລ້ວ—ແຕ່ຜ່ານທາງຄວາມຊ່ວຍເຫລືອຂອງເຮົາເທົ່ານັ້ນ. ບັນພະບຸລຸດຂອງເຮົາຢູ່ໃນໂລກວິນຍານໃນເວລານີ້ ກຳລັງລໍຖ້າເຮົາໃຫ້ຕຽມຊື່ຂອງເຂົາເຈົ້າສຳລັບພິທີການໃນພຣະວິຫານ ເພື່ອກະທຳແທນເຂົາເຈົ້າ. ແຕ່ບາງຄັ້ງ ມັນອາດເປັນວຽກງານທີ່ຫຍຸ້ງຍາກ ທີ່ຈະເຮັດສຳລັບເຂົາເຈົ້າ. ເຮົາອາດຫຍຸ້ງຫລາຍ, ຫລື ເຮົາອາດອາໄສຢູ່ໄກຈາກພຣະວິຫານ ຈົນບໍ່ສາມາດໄປພຣະວິຫານເລື້ອຍໆ.
ໂຊກດີຫລາຍ ທີ່ເຮົາຍັງມີວິທີອື່ນ ທີ່ເຮົາສາມາດຊ່ວຍເຫລືອບັນພະບຸລຸດຂອງເຮົາໄດ້, ເຊັ່ນການສືບປະຫວັດຄອບຄົວ, ການຈັດດັດຊະນີລາຍຊື່, ຫລື ຊ່ວຍດູແລນ້ອງ ໃນຂະນະທີ່ພໍ່ແມ່ໄປພຣະວິຫານ. ດ້ວຍການໃຫ້ຄວາມຊ່ວຍເຫລືອ, ເຮົາໄດ້ຮັບໃຊ້ພຣະຜູ້ເປັນເຈົ້າ ແລະ ນຳຄວາມຫວັງຂອງຄອບຄົວນິລັນດອນ ມາໃຫ້ຜູ້ທີ່ຢູ່ໃນໂລກວິນຍານ.