ຂ່າວສານຈາກຝ່າຍປະທານສູງສຸດ, ເດືອນສິງຫາ 2016
ຄວາມຫວັງໃນ ຄວາມຮັກຂອງຄອບຄົວນິລັນດອນ
ໂດຍ ປະທານເຮັນຣີ ບີ ໄອຣິງ
ທີ່ປຶກສາທີໜຶ່ງໃນຝ່າຍປະທານສູງສຸດ
ໃນຂອງປະທານທັງໝົດທີ່ພຣະບິດາເທິງສະຫວັນຂອງເຮົາໄດ້ຈັດຫາໃຫ້ລູກໆຂອງພຣະອົງ, ອັນທີ່ຍິ່ງໃຫຍ່ທີ່ສຸດ ແມ່ນຊີວິດນິລັນດອນ (ເບິ່ງ D&C 14:7). ຂອງປະທານນັ້ນ ຄືການມີຊີວິດຢູ່ໃນທີ່ປະທັບຂອງພຣະເຈົ້າ ອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງຕະຫລອດການ ນຳຄອບຄົວ. ພຽງແຕ່ໃນອານາຈັກທີ່ສູງສຸດຂອງພຣະເຈົ້າເທົ່ານັ້ນ, ເອີ້ນວ່າ ອານາຈັກຊັ້ນສູງ, ທີ່ຄວາມຮັກຂອງຊີວິດຄອບຄົວ ຈະດຳເນີນຕໍ່ໄປ.
ເຮົາທຸກຄົນຫວັງທີ່ຈະມີຄວາມສຸກໃນການໄດ້ຢູ່ກັບຄອບຄົວທີ່ມີຄວາມຮັກຕໍ່ກັນ. ສຳລັບບາງຄົນໃນພວກເຮົາ, ມັນເປັນຄວາມຮູ້ສຶກທີ່ເຮົາບໍ່ເຄີຍປະສົບການມາກ່ອນ—ເປັນຄວາມຮູ້ສຶກທີ່ເຮົາຮູ້ວ່າ ເປັນໄປໄດ້ ແຕ່ຍັງບໍ່ເຄີຍຮູ້ຈັກມາກ່ອນ. ເຮົາອາດເຄີຍໄດ້ຍິນມັນ ໃນຊີວິດຂອງຄົນອື່ນ. ສຳລັບຄົນອື່ນໆໃນພວກເຮົາ, ຄວາມຮັກໃນຄອບຄົວ ເບິ່ງຄືວ່າ ເປັນຄວາມຈິງ ແລະ ມີຄ່າ ເມື່ອຄວາມຕາຍ ໄດ້ແຍກເຮົາຈາກລູກ, ຈາກແມ່, ຈາກພໍ່, ຈາກອ້າຍນ້ອງ, ຈາກເອື້ອຍນ້ອງ, ຫລື ຈາກພໍ່ແມ່ທີ່ຮັກຂອງເຮົາ.
ເຮົາທຸກຄົນມີຄວາມຫວັງວ່າໃນມື້ໜຶ່ງ ເຮົາຈະສາມາດຮູ້ສຶກເຖິງຄວາມຮັກອັນອົບອຸ່ນ ຂອງສະມາຊິກໃນຄອບຄົວ ທີ່ເຮົາຮັກຫລາຍທີ່ສຸດ ແລະ ຕອນນີ້ກໍຢາກໂອບກອດເຂົາເຈົ້າດັ່ງທີ່ເຄີຍ.
ພຣະບິດາເທິງສະຫວັນທີ່ຮັກຂອງເຮົາ ຮູ້ໃຈຂອງເຮົາດີ. ພຣະປະສົງຂອງພຣະອົງ ແມ່ນໃຫ້ເຮົາມີຄວາມສຸກ (ເບິ່ງ 2 ນີໄຟ 2:25). ສະນັ້ນ ພຣະອົງຈຶ່ງໄດ້ປະທານພຣະບຸດຂອງພຣະອົງໃຫ້ເຮົາ ເພື່ອວ່າຄວາມຜູກພັນຢ່າງມີຄວາມສຸກຂອງຄອບຄົວ ຈະຄົງຢູ່ສືບຕໍ່ໄປຕະຫລອດການ. ຍ້ອນວ່າພຣະຜູ້ຊ່ວຍໃຫ້ລອດໄດ້ເຮັດໃຫ້ສາຍຮັດແຫ່ງຄວາມຕາຍຂາດອອກ, ເຮົາຈຶ່ງຈະໄດ້ຟື້ນຄືນຊີວິດ. ຍ້ອນວ່າພຣະອົງໄດ້ຊົດໃຊ້ແທນບາບຂອງເຮົາ, ໂດຍສັດທາ ແລະ ການກັບໃຈ, ເຮົາຈຶ່ງຈະສາມາດມີຄ່າຄວນສຳລັບອານາຈັກຊັ້ນສູງ, ບ່ອນທີ່ຄອບຄົວໄດ້ຖືກຜູກມັດເຂົ້າກັນ ໃນຄວາມຮັກຕະຫລອດການ.
ພຣະຜູ້ຊ່ວຍໃຫ້ລອດ ໄດ້ສົ່ງສາດສະດາ ເອລີຢາ ມາຫາ ໂຈເຊັບ ສະມິດ ເພື່ອຟື້ນຟູຂໍກະແຈແຫ່ງຖານະປະໂລຫິດ (ເບິ່ງ D&C 110). ດ້ວຍຂໍກະແຈເຫລົ່ານັ້ນ ອຳນາດແຫ່ງການຜະນຶກ ຈຶ່ງໄດ້ມີມາ, ໄດ້ນຳຂອງປະທານທີ່ຍິ່ງໃຫຍ່ທີ່ສຸດຂອງພຣະເຈົ້າ ມາໃຫ້ລູກໆຂອງພຣະອົງ—ນັ້ນຄື ຊີວິດນິລັນດອນ ຢູ່ນຳກັນເປັນຄອບຄົວ ຕະຫລອດການ.
ມັນເປັນຂໍ້ສະເໜີທີ່ລູກທຸກຄົນຂອງພຣະເຈົ້າ ຜູ້ທີ່ໄດ້ມາສູ່ໂລກນີ້ ສາມາດທວງເອົາໄດ້. ໜຶ່ງສ່ວນສາມຂອງລູກໆທາງວິນຍານຂອງພຣະອົງ ໄດ້ປະຕິເສດຂໍ້ສະເໜີຂອງພຣະອົງຕອນຢູ່ໃນໂລກວິນຍານ. ໂດຍທີ່ບໍ່ມີສັດທາພຽງພໍ ແລະ ໂດຍການກະບົດ, ພວກເຂົາຈຶ່ງບໍ່ເຄີຍຮູ້ຈັກ ຄວາມສຸກຂອງຄອບຄົວນິລັນດອນ ທີ່ພຣະບິດາເທິງສະຫວັນໄດ້ປະທານໃຫ້.
ສຳລັບເຮົາທຸກຄົນ ທີ່ໄດ້ຜ່ານການທົດສອບອັນຈຳເປັນນັ້ນ ໃນໂລກວິນຍານກ່ອນຊ່ວງມະຕະ ແລະ ມີຄ່າຄວນທີ່ຈະໄດ້ຮັບຂອງປະທານ ຊຶ່ງເປັນຮ່າງກາຍທີ່ເປັນມະຕະ, ການເລືອກອັນຍິ່ງໃຫຍ່ ເລື່ອງຊີວິດນິລັນດອນ ຍັງເປັນສິ່ງທີ່ເຮົາຕ້ອງເລືອກຢູ່. ຖ້າຫາກເຮົາໄດ້ຮັບພອນ ເພື່ອໃຫ້ພົບເຫັນພຣະກິດຕິຄຸນທີ່ຖືກຟື້ນຟູຄືນມາໃໝ່, ເຮົາຈະສາມາດເລືອກເຮັດ ແລະ ຮັກສາພັນທະສັນຍານຳພຣະເຈົ້າ ອັນທີ່ຈະຊ່ວຍເຮົາໃຫ້ເໝາະສົມສຳລັບຊີວິດນິລັນດອນ. ເມື່ອເຮົາອົດທົນດ້ວຍຄວາມຊື່ສັດ, ແລ້ວພຣະວິນຍານບໍລິສຸດ ຈະຢືນຢັນຕໍ່ຄວາມຫວັງ ແລະ ຄວາມແນ່ນອນໃຈຂອງເຮົາວ່າ ເຮົາກຳລັງເດີນໄປໃນເສັ້ນທາງທີ່ຖືກຕ້ອງ ສູ່ຊີວິດນິລັນດອນ, ເພື່ອຈະໄດ້ຢູ່ກັບຄອບຄົວຕະຫລອດການ ໃນອານາຈັກຊັ້ນສູງ.
ສຳລັບບາງຄົນ, ຄວາມສຸກນິລັນດອນນັ້ນ ອາດໄກກວ່າທີ່ຈະເອື້ອມເຖິງ ຫລື ເກີນກວ່າທີ່ຈະຫວັງ. ພໍ່ແມ່, ລູກໆ, ອ້າຍນ້ອງ, ແລະ ເອື້ອຍນ້ອງບາງຄົນ ອາດເລືອກເຮັດບາງສິ່ງ ທີ່ເບິ່ງຄືວ່າ ຕັດເຂົາເຈົ້າອອກຈາກຊີວິດນິລັນດອນ. ທ່ານອາດສົງໄສວ່າ ທ່ານກໍເໝາະສົມຢູ່ບໍ ຜ່ານການຊົດໃຊ້ຂອງພຣະເຢຊູຄຣິດ.
ເທື່ອໜຶ່ງສາດສະດາຄົນໜຶ່ງຂອງພຣະເຈົ້າໄດ້ແນະນຳຂ້າພະເຈົ້າຊຶ່ງນຳສັນຕິສຸກມາໃຫ້ຂ້າພະເຈົ້າ. ຂ້າພະເຈົ້າເປັນຫ່ວງວ່າ ການເລືອກຂອງຄົນອື່ນ ອາດກີດກັນບໍ່ໃຫ້ຄອບຄົວຂອງຂ້າພະເຈົ້າບໍ່ໄດ້ຢູ່ນຳກັນ ຕະຫລອດການ. ເພິ່ນໄດ້ເວົ້າວ່າ, “ທ່ານເປັນຫ່ວງນຳເລື່ອງບໍ່ເປັນເລື່ອງ. ຂໍໃຫ້ທ່ານພຽງແຕ່ດຳລົງຊີວິດໃຫ້ມີຄ່າຄວນຕໍ່ອານາຈັກຊັ້ນສູງກໍພໍແລ້ວ, ແລະ ການຈັດຕຽມຄອບຄົວນັ້ນ ຈະເລີດກວ່າທີ່ທ່ານຄິດ.”
ຕໍ່ທຸກຄົນທີ່ເຄີຍມີປະສົບການ ຫລື ສິ້ນຫວັງກັບການແຕ່ງງານ ແລະ ສິ້ນຫວັງກັບລູກໆ—ຫລື ບໍ່ເຄີຍມີຄອບຄົວ ຫລື ບໍ່ເຄີຍມີລູກເລີຍ—, ຂ້າພະເຈົ້າຂໍເປັນພະຍານວ່າ ພຣະບິດາເທິງສະຫວັນຮູ້ຈັກທ່ານ ແລະ ຮັກທ່ານ ໃນຖານະທີ່ເປັນລູກໆທາງວິນຍານຂອງພຣະອົງ. ຕອນທ່ານໄດ້ຢູ່ກັບພຣະອົງ ແລະ ພຣະບຸດຂອງພຣະອົງ ກ່ອນມາສູ່ຊີວິດນີ້, ພວກພຣະອົງໄດ້ເອົາຄວາມຫວັງເຖິງຊີວິດນິລັນດອນ ໃສ່ໄວ້ໃນໃຈຂອງທ່ານແລ້ວ. ດ້ວຍອຳນາດແຫ່ງການຊົດໃຊ້ຂອງພຣະເຢຊູຄຣິດ ທີ່ທຳງານຢູ່ ແລະ ດ້ວຍການນຳພາຂອງພຣະວິນຍານບໍລິສຸດ, ທ່ານຈະສາມາດຮູ້ສຶກໃນເວລານີ້ ແລະ ຈະຮູ້ສຶກໃນໂລກຕໍ່ໄປ ເຖິງຄວາມຮັກຂອງຄອບຄົວ ທີ່ພຣະບິດາ ທີ່ຮັກຂອງທ່ານ ແລະ ພຣະບຸດຂອງພຣະອົງ ປະສົງຫລາຍທີ່ສຸດ ໃຫ້ທ່ານໄດ້ຮັບ.
ຂ້າພະເຈົ້າເປັນພະຍານວ່າ ເມື່ອທ່ານດຳລົງຊີວິດໃຫ້ມີຄ່າຄວນຕໍ່ອານາຈັກຊັ້ນສູງ, ແລ້ວຄຳສັນຍາທີ່ສາດສະດາໄດ້ກ່າວໄວ້ ທີ່ວ່າ “ການຈັດຕຽມຄອບຄົວນັ້ນ ຈະເລີດກວ່າທີ່ທ່ານຄິດ” ຈະເປັນຂອງທ່ານ.
© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ First Presidency Message, August 2016. Laotian. 12868 331
ການສອນຈາກຂ່າວສານນີ້
ໃຫ້ພິຈາລະນາເລີ່ມຕົ້ນໂດຍການບອກຄົນທີ່ທ່ານສອນ ເຖິງຕອນທີ່ທ່ານມີຄວາມກະຕັນຍູຫລາຍ ສຳລັບຄວາມຫວັງຕໍ່ຄອບຄົວນິລັນດອນ. ເຊື້ອເຊີນເຂົາເຈົ້າ ໃຫ້ໄຕ່ຕອງເຖິງ ຕອນທີ່ທ່ານຮູ້ສຶກມີຄວາມກະຕັນຍູຕໍ່ຄອບຄົວນິລັນດອນ. ຖາມເຂົາເຈົ້າ ຖ້າຫາກວ່າເຂົາເຈົ້າຢາກແບ່ງປັນຫລືບໍ່. ແລ້ວ ທ່ານສາມາດເຊື້ອເຊີນເຂົາເຈົ້າ ໃຫ້ຄິດເຖິງວິທີທີ່ຈະພັດທະນາຕົນ ແລະ ດຳລົງຊີວິດໃຫ້ມີຄ່າຄວນຕໍ່ອານາຈັກຊັ້ນສູງ ເພື່ອວ່າຄຳສັນຍາຂອງສາດສະດາ ທີ່ວ່າ “ການຈັດຕຽມຄອບຄົວນັ້ນ ຈະເລີດກວ່າທີ່ທ່ານຄິດ” ຈະເປັນຂອງເຂົາເຈົ້າ.