ຂ່າວສານການຢ້ຽມສອນ, ເດືອນສິງຫາ 2016

ການທະນຸຖະໜອມຄອບຄົວນຳກັນ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈໃບ “ຄອບຄົວ: ການປະກາດຕໍ່ໂລກ” ເພີ່ມສັດທາຂອງທ່ານໃນພຣະເຈົ້າ ແລະ ເປັນພອນໃຫ້ແກ່ຄົນທີ່ທ່ານດູແລ ຜ່ານການຢ້ຽມສອນ ໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.

ສັດທາ, ຄອບຄົວ, ສົງເຄາະ

“ສາມີ ແລະ ພັນລະຍາ ມີໜ້າທີ່ຮັບຜິດຊອບທີ່ຈະຮັກແພງເອົາກັນ ແລະ ຮັກແພງລູກໆຂອງຕົນ.”¹ “ບ້ານເຮືອນຄວນເປັນບ່ອນວິໄຈຄວາມ ຮັກແລະ ການຮັບໃຊ້ຂອງພຣະເຈົ້າ,” ປະທານຣະໂຊ ເອັມ ແນວສັນ, ປະທານກຸ່ມອັກຄະສາວົກສິບສອງ ໄດ້ກ່າວ.

“ພຣະບິດາເທິງສະຫວັນຂອງເຮົາປະສົງໃຫ້ສາມີ ແລະ ພັນລະຍາ ຊື່ສັດຕໍ່ກັນ ແລະ ນັບຖື ແລະ ປະພຶດຕໍ່ລູກໆຂອງເຂົາເຈົ້າ ວ່າເປັນມໍລະດົກຈາກພຣະຜູ້ເປັນເຈົ້າ.”²

ໃນພຣະຄຳພີມໍມອນ, ຢາໂຄບໄດ້ກ່າວວ່າ ຄວາມຮັກທີ່ສາມີ ມີຕໍ່ພັນລະຍາຂອງຕົນ, ຄວາມຮັກທີ່ພັນລະຍາມີຕໍ່ສາມີຂອງຕົນ, ແລະ ຄວາມຮັກຂອງທັງສອງມີຕໍ່ລູກໆຂອງຕົນ ເປັນເຫດຜົນຢ່າງໜຶ່ງໃນເຫດຜົນທັງຫລາຍ ທີ່ເຮັດໃຫ້ຊາວເລມັນ ໃນຈຸດໜຶ່ງ ມີຄວາມຊອບທຳຫລາຍກວ່າຊາວນີໄຟ (ເບິ່ງ ຢາໂຄບ 3:7).

ວິທີໜຶ່ງທີ່ດີທີ່ສຸດ ທີ່ຈະເຊື້ອເຊີນຄວາມຮັກ ແລະ ຄວາມຖືກຕ້ອງປອງດອງ ໃຫ້ເຂົ້າມາໃນບ້ານເຮືອນຂອງເຮົາ ແມ່ນການເວົ້າຈາທີ່ອ່ອນຫວານ ຕໍ່ຄົນໃນຄອບຄົວຂອງເຮົາ. ການເວົ້າຈາທີ່ອ່ອນຫວານ ຈະນຳພຣະວິນຍານບໍລິສຸດມາ. ຊິດສະເຕີ ລິນດາ ເຄ ເບີຕັນ, ປະທານສະມາຄົມສະຕີສົງເຄາະສາມັນ, ໄດ້ຂໍໃຫ້ເຮົາໄຕ່ຕອງຄຳນີ້: “ເລື້ອຍປານໃດ ທີ່ເຮົາຕັ້ງໃຈ ‘ກ່າວຖ້ອຍຄຳທີ່ອ່ອນຫວານຕໍ່ກັນ’?”³

ຂໍ້ພຣະຄຳພີເພີ່ມເຕີມ

ໂຣມ 12:10; ໂມໄຊຢາ 4:15; Doctrine and Covenants 25:5

ເລື່ອງຈິງໃນຊີວິດ

ແອວເດີ ດີ ທອດ ຄຣິສໂຕເຟີສັນ ແຫ່ງກຸ່ມອັກຄະສາວົກສິບສອງ ໄດ້ແບ່ງປັນປະສົບການຕອນເພິ່ນຍັງນ້ອຍ ອັນທີ່ເຮັດໃຫ້ເພິ່ນຮູ້ເຖິງຄວາມສຳຄັນຂອງຄອບຄົວທີ່ມີຄວາມຮັກ. ຕອນເພິ່ນກັບອ້າຍນ້ອງຂອງເພິ່ນຍັງນ້ອຍ, ແມ່ຂອງພວກເພິ່ນໄດ້ຮັບການຜ່າຕັດມະເລັງ ທີ່ເຮັດໃຫ້ແມ່ໄດ້ຮັບຄວາມເຈັບປວດຫລາຍ ເມື່ອເພິ່ນໃຊ້ແຂນເບື້ອງຂວາຂອງເພິ່ນ. ໂດຍທີ່ມີລູກຊາຍຫລາຍຄົນ, ຈຶ່ງຕ້ອງໄດ້ລີດເຄື່ອງຫລາຍສົມຄວນ, ແຕ່ໃນຂະນະທີ່ແມ່ຂອງເພິ່ນລີດເຄື່ອງຢູ່ນັ້ນ, ເພິ່ນມັກຈະຢຸດພັກ ແລະ ເຂົ້າໄປໃນຫ້ອງນອນ ເພື່ອຮ້ອງໄຫ້ ຈົນກວ່າຄວາມເຈັບປວດໄດ້ບັນເທົາລົງ.

ເມື່ອພໍ່ຂອງແອວເດີ ຄຣິສໂຕເຟີສັນ ຮູ້ວ່າມີຫຍັງເກີດຂຶ້ນ, ເພິ່ນຈຶ່ງໄດ້ອົດບໍ່ຊື້ເຂົ້າສວຍກິນ ເກືອບເຖິງໜຶ່ງປີ ເພື່ອທ້ອນເງິນຊື້ເຄື່ອງຈັກ ທີ່ເຮັດໃຫ້ການລີດເຄື່ອງງ່າຍຂຶ້ນ. ເພາະຄວາມຮັກຂອງເພິ່ນທີ່ມີຕໍ່ພັນລະຍາ, ເພິ່ນຈຶ່ງໄດ້ເປັນແບບຢ່າງເຖິງການທະນຸຖະໜອມຄອບຄົວ ໃຫ້ແກ່ພວກລູກຊາຍຂອງເພິ່ນ. ແອວເດີ ຄຣິສໂຕເຟີສັນ ໄດ້ກ່າວເຖິງປິຕິກິລິຍາທີ່ອ່ອນໂຍນນີ້ວ່າ, “ຂ້າພະເຈົ້າບໍ່ເຄີຍຮູ້ຈັກເຖິງການເສຍສະລະຂອງພໍ່ເລີຍ ແລະ ການກະທຳດ້ວຍຄວາມຮັກສຳລັບແມ່ຂອງຂ້າພະເຈົ້າ ໃນເວລານັ້ນ, ແຕ່ຕອນນີ້ ຂ້າພະເຈົ້າຮູ້ແລ້ວ, ຂ້າພະເຈົ້າໄດ້ເວົ້າກັບຕົນເອງວ່າ, ‘ນັ້ນແຫລະຄື ສຸພາບບຸລຸດ.’”⁴

© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ Visiting Teaching Message, August 2016. Laotian. 12868 331

ໃຫ້ພິຈາລະນາສິ່ງນີ້

ຄວາມຮັກ ແລະ ຄວາມເປັນຫ່ວງເປັນໃຍຕໍ່ກັນ ຈະເຊື້ອເຊີນພຣະວິນຍານໃຫ້ເຂົ້າມາໃນບ້ານເຮືອນຂອງເຮົາແນວໃດ?