ຊາວໜຸ່ມ
ການຮັກສາພຣະບັນຍັດ ແລະ ການຮັກຄົນອື່ນ
ເມື່ອເຮົາຄິດເຖິງຄວາມຮັກ, ສ່ວນຫລາຍແລ້ວ ສິ່ງທຳອິດທີ່ເຂົ້າມາສູ່ຄວາມຄິດຂອງເຮົາແມ່ນ ໜັງເລື່ອງຄວາມຮັກ, ເຂົ້າໜົມໂຊໂກລ້າ, ແລະ ດອກໄມ້. ແຕ່ຄວາມຮັກ—ທີ່ແທ້ຈິງ—ແມ່ນເລິກຊຶ້ງ ແລະ ບໍ່ເຫັນແກ່ຕົວຫລາຍກວ່ານັ້ນ. ພຣະເຢຊູຄຣິດໄດ້ມີພຣະຊົນຢູ່ເພື່ອເຮົາ ແລະ ໄດ້ສິ້ນພຣະຊົນເພື່ອເຮົາ ເພາະພຣະອົງຮັກເຮົາ. ຕາມຈິງແລ້ວ, ມີພຣະບັນຍັດທີ່ຍິ່ງໃຫຍ່ຢູ່ສອງຂໍ້ ຄືໃຫ້ຮັກພຣະເຈົ້າ ແລະ ໃຫ້ຮັກທຸກຄົນ (ເບິ່ງ ມັດທາຍ 22:36–40). ແຕ່ເຮົາຈະສາມາດ ສະແດງ ໃຫ້ຄົນອື່ນເຫັນວ່າ ເຮົາຮັກເຂົາດ້ວຍວິທີໃດ?
ປະທານອຸກດອບ ໄດ້ແບ່ງປັນຄຳອຸປະມາຂອງພຣະຄຣິດເລື່ອງພໍ່ຄົນໜຶ່ງທີ່ມີລູກຊາຍສອງຄົນ, ຄົນໜຶ່ງໄດ້ເຮັດວຽກໃຫ້ພໍ່ ແລະ ອີກຄົນໜຶ່ງບໍ່ເຮັດວຽກໃຫ້ພໍ່. ພຣະຜູ້ຊ່ວຍໃຫ້ລອດເນັ້ນໜັກວ່າ ພຽງແຕ່ລູກຊາຍຜູ້ທີ່ເຊື່ອຟັງພໍ່ຂອງຕົນເທົ່ານັ້ນ ທີ່ຮັກພໍ່ຂອງຕົນແທ້ໆ. ຄ້າຍຄືກັນນີ້, ເມື່ອເຮົາເຊື່ອຟັງພຣະບັນຍັດຂອງພຣະເຈົ້າ, ເຮົາໄດ້ສະແດງວ່າ ເຮົາຮັກພຣະອົງ ແລະ ຢາກກັບຄືນໄປຫາພຣະອົງ.
ແຕ່ເຮົາຈະເຮັດແນວໃດ ຈຶ່ງຈະເປັນການສະແດງອອກວ່າ ເຮົາຮັກທຸກຄົນ? ປະທານອຸກດອບ ອະທິບາຍຄືກັນວ່າ: “ຖ້າເຮົາຮັກເພື່ອນມະນຸດດ້ວຍກັນແທ້ໆ, ເຮົາຕ້ອງເອື້ອມອອກໄປຊ່ວຍເຫລືອ ‘ຄົນຍາກຈົນ ແລະ ຄົນຂັດສົນ, ຄົນເຈັບປ່ວຍ ແລະ ຄົນເປັນທຸກ.’ ເພາະຄົນໃດທີ່ເຫັນອົກເຫັນໃຈ ແລະ ໃຫ້ການຮັບໃຊ້ຢ່າງບໍ່ເຫັນແກ່ຕົວ, ຄົນນັ້ນກໍເປັນສານຸສິດຂອງພຣະເຢຊູຄຣິດ.”
ສະນັ້ນ ເທື່ອໜ້າເມື່ອເຈົ້າເຫັນພໍ່ແມ່, ອ້າຍເອື້ອຍນ້ອງ, ຫລື ໝູ່ເພື່ອນຂອງເຈົ້າ, ໃຫ້ເຈົ້າຄິດຫາວິທີຮັບໃຊ້ເຂົາເຈົ້າ ເພື່ອສະແດງຄວາມຮັກຕໍ່ເຂົາເຈົ້າ. ມັນບໍ່ພຽງແຕ່ຈະເຮັດໃຫ້ເຂົາເຈົ້າ ແລະ ເຈົ້າມີຄວາມສຸກເທົ່ານັ້ນ, ແຕ່ມັນຈະເຮັດໃຫ້ພຣະບິດາຜູ້ສະຖິດຢູ່ໃນສະຫວັນມີຄວາມສຸກດ້ວຍ.