ຂ່າວສານການຢ້ຽມສອນ, ເດືອນກັນຍາ 2016
ການເປັນພໍ່ແມ່ ເປັນໜ້າທີ່ອັນສັກສິດ
ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈໃບ “ຄອບຄົວ: ການປະກາດຕໍ່ໂລກ” ເພີ່ມສັດທາຂອງທ່ານໃນພຣະເຈົ້າ ແລະ ເປັນພອນໃຫ້ແກ່ຄົນທີ່ທ່ານດູແລ ຜ່ານການຢ້ຽມສອນ ໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.
ສັດທາ, ຄອບຄົວ, ສົງເຄາະ
ພຣະບິດາເທິງສະຫວັນຂອງເຮົາ ໄດ້ສ້າງຕັ້ງຄອບຄົວຂຶ້ນ ເພື່ອຊ່ວຍເຮົາໃຫ້ສອນຫລັກທຳທີ່ຖືກຕ້ອງ ໃນສະພາບແວດລ້ອມທີ່ມີຄວາມຮັກ. ປະທານທອມມັສ ແອັສ ມອນສັນ ໄດ້ກ່າວວ່າ: “ໃຫ້ຍ້ອງຍໍ ແລະ ໂອບກອດລູກ, ເວົ້າວ່າ, ‘ພໍ່ ຫລື ແມ່ຮັກລູກ’ ຫລາຍຂຶ້ນ; ໃຫ້ກ່າວຄຳຂອບໃຈສະເໝີ. ຢ່າປ່ອຍໃຫ້ບັນຫາທີ່ຈະຕ້ອງແກ້ໄຂ ມີຄວາມສຳຄັນຫລາຍກວ່າຄົນທີ່ຈະຕ້ອງຮັກ.”1
ຊູແຊນ ດັບເບິນຢູ ແທນເນີ, ອະດີດປະທານອົງການຍິງໜຸ່ມສາມັນ, ໄດ້ສອນວ່າ: “ພຣະບິດາຜູ້ສະຖິດຢູ່ໃນສະຫວັນໄດ້ຕັ້ງແບບແຜນໄວ້ ເພື່ອໃຫ້ເຮົາປະຕິບັດຕາມ. ພຣະອົງຮັກເຮົາ, ສອນເຮົາ, ອົດທົນກັບເຮົາ, ແລະ ໄດ້ປະທານອຳເພີໃຈໃຫ້ເຮົາ. … ບາງເທື່ອ ການລົງໂທດ, ຊຶ່ງໝາຍເຖິງ ‘ການສອນ,’ ຖືກເຂົ້າໃຈຜິດວ່າເປັນການຕຳນິຕິຕຽນ. ເດັກນ້ອຍ—ເຊັ່ນດຽວກັບ ຄົນອື່ນໆ ໃນທຸກໄວ—ຈະປັບປຸງນິໄສຈາກຄວາມຮັກ ແລະ ການຊຸກຍູ້ ຫລາຍກວ່າການຈັບຜິດ.”2
“ເມື່ອເຮົາມີການອະທິຖານເປັນຄອບຄົວ, ສຶກສາພຣະຄຳພີ, ມີການສັງສັນໃນຄອບຄົວ, ການໃຫ້ພອນຂອງຖານະປະໂລຫິດ, ແລະ ການໄປນະມັດສະການໃນວັນຊະບາໂຕ ເປັນປະຈຳ,” ແອວເດີ ຄວນຕິນ ແອວ ຄຸກ ແຫ່ງກຸ່ມອັກຄະສາວົກສິບສອງ, ໄດ້ກ່າວ, “ແລ້ວລູກຂອງເຮົາຈະ… ຕຽມພ້ອມສຳລັບບ້ານນິລັນດອນ ໃນສະຫວັນ, ບໍ່ວ່າຈະມີຫຍັງເກີດຂຶ້ນກັບເຂົາ ຢູ່ໃນໂລກທີ່ຫຍຸ້ງຍາກນີ້ກໍຕາມ.”3
ຂໍ້ພຣະຄຳພີເພີ່ມເຕີມ
1 ນີໄຟ 8:37; 3 ນີໄຟ 22:13; Doctrine and Covenants 93:40; 121:41
ເລື່ອງຈິງໃນຊີວິດ
ແອວເດີ ຣໍເບີດ ດີ ແຮວສ໌ ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ, “ຂ້າພະເຈົ້າກຳລັງອ່ານໜັງສືພິມຢູ່ ຕອນຫລານຊາຍນ້ອຍຂອງຂ້າພະເຈົ້າ ໄດ້ໝົ້ນເຂົ້າມາຫາຂ້າພະເຈົ້າ.” “ໃນຂະນະທີ່ຂ້າພະເຈົ້າອ່ານ, ຂ້າພະເຈົ້າດີໃຈຫລາຍ ທີ່ໄດ້ຍິນສຽງທີ່ອ່ອນຫວານຂອງລາວ ເວົ້າລົມຢູ່ໃກ້ໆ. ຂ້າພະເຈົ້າຕົກໃຈພຽງໃດ ເມື່ອບໍ່ດົນຈາກນັ້ນ, ລາວໄດ້ແຫຍ້ຕົວລາວເອງເຂົ້າໄປລະຫວ່າງຂ້າພະເຈົ້າ ແລະ ໜັງສືພິມນັ້ນ. ໄດ້ເອົາມືຈັບໜ້າຂ້າພະເຈົ້າ ແລະ ເນັ້ນດັງຂອງລາວໃສ່ກັບດັງຂອງຂ້າພະເຈົ້າ, ລາວໄດ້ຖາມວ່າ, ‘ພໍ່ຕູ້! ພໍ່ຕູ້ຢູ່ໃນນີ້ບໍ?’
“… ການຢູ່ໃນ ນີ້ ໝາຍເຖິງການເຂົ້າອົກເຂົ້າໃຈ ຫົວໃຈຂອງຄົນໜຸ່ມຂອງເຮົາ ແລະ ການພົວພັນຢູ່ກັບພວກເຂົາ. ແລະ ການພົວພັນຢູ່ກັບພວກເຂົາ ບໍ່ພຽງແຕ່ໝາຍເຖິງການໂອ້ລົມກັບພວກເຂົາ, ແຕ່ແມ່ນການເຮັດສິ່ງຕ່າງໆກັບພວກເຂົາດ້ວຍ. …
“ເຮົາຕ້ອງວາງແຜນ ແລະ ສວຍໂອກາດເວລາສັ່ງສອນ. …
“… ເມື່ອຂ້າພະເຈົ້າມີຊີວິດນານເທົ່າໃດ ຂ້າພະເຈົ້າຍິ່ງຮູ້ວ່າ ຕອນທີ່ຂ້າພະເຈົ້າໄດ້ຮັບການສັ່ງສອນຄາວຍັງໜຸ່ມ, ໂດຍສະເພາະສິ່ງທີ່ພໍ່ແມ່ໄດ້ສອນໃຫ້, ໄດ້ມີອິດທິພົນຕໍ່ຊີວິດຂອງຂ້າພະເຈົ້າ, ແລະ ເຮັດໃຫ້ຂ້າພະເຈົ້າເປັນຄົນ ທີ່ຂ້າພະເຈົ້າເປັນຢູ່ໃນເວລານີ້.”4
© 2016 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ Visiting Teaching Message, September 2016. Laotian. 12869 331
ໃຫ້ພິຈາລະນາສິ່ງນີ້
ເປັນຫຍັງພຣະກິດຕິຄຸນຈຶ່ງປະສົບຄວາມສຳເລັດຫລາຍ ເມື່ອຖືກສອນດ້ວຍພາສາ ແລະ ແບບຢ່າງ ທີ່ເປັນຄວາມຮັກ?