Ko Hono Taukapoʻi e Tauʻatāina Fakalotú

ʻOku totonu ke kau ʻa e Kāingalotu ʻo e Siasí “ʻi ha founga langaki moʻui, ki he feinga ke maʻu ʻa e tauʻatāina fakalotú,” ko e lea ia naʻe fai ʻe ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻi ha konifelenisi fekauʻaki mo e tauʻatāina fakalotú naʻe fai ʻi Tekisisi, USA ʻi Sepitema ʻo e 2016. “Ko hono moʻoní, ʻoku totonu ke mahino ki he taha kotoa pē ʻa e ʻuhinga ʻo e tauʻatāina fakalotú mo e ʻuhinga ʻoku mahuʻinga aí, ʻo tatau pē mei he fānau kinitakātení, ki he kakai ngāue fakapalōfesinalé mo e ngaahi faʻeé, ngaahi tamaí, kaungāmeʻá pea mo e kaungāʻapí.”

Naʻe toe lea foki mo ʻEletā D. Todd Christofferson ʻo e Kōlomu ʻo e Kau ʻAposetolo ʻe Toko Hongofulu Mā Uá ke taukapoʻi e tauʻatāina fakalotú ʻi ha ouau ki he mateakiʻi fonuá naʻe fai ʻi ʻIutā, USA ʻi Sune. Naʻá ne pehē, “Kuo toki manakoa mai kimuí ni ʻa hono taukapoʻi ko e tauʻatāina fakalotú, ko e totonu moʻoni ia ke lotú, kae ʻikai ko e totonu ke fakahaaʻi tauʻatāina hoʻo tuí ʻi hoʻo moʻui fakaʻahó.” Naʻá ne pouopuʻi e kāingalotu tuí, ke nau tuʻu hake ʻo taukapoʻi e tauʻatāina fakalotú ʻaki ʻenau feinga ke ʻiloʻi, lea ke ongoʻi, pea kau atu ki he ngaahi polokalama mo e ngaahi kautaha fakafonua, fakakolo pea mo fakapolitikalé.

Kuo toutou leaʻaki ʻe he kau taki ʻo e Siasí e kaveinga ko e tauʻatāina fakalotú, ʻo kau ai ʻenau fai ha ngaahi lea mo kau atu ki ha ngaahi konifelenisi ʻi ʻAositelēlia, Palāsila, Mekisikou pea mo Pilitānia kae pehē ki ha ngaahi feituʻu kehekehe ʻi he USA. Te ke lava ʻo maʻu ʻenau ngaahi leá mo ako lahi ange ki he tauʻatāina fakalotú mo e meʻa te ke lava ʻo fai ke maluʻi iá, ʻaki haʻo hū ki he religiousfreedom.lds.org. ʻOku fakapatonu ha niʻihi ʻo e ngaahi meʻa ʻoku ʻasi aí ki he ʻIunaiteti Siteití, ka ʻe lava ke liliu e ngaahi tefitoʻi moʻoní ke tuha mo e ngaahi fonua kehé.