Ko Hono Vahevahe ʻo e Ongoongolelei Kuo Toe Fakafoki Maí
Fai ʻe ʻEletā Dallin H. Oaks
ʻO e Kōlomu ʻo e Kau ʻAposetolo ʻe Toko Hongofulu Mā Uá
ʻOku ʻikai ko ha polokalama e meʻa ʻoku tau ui ko e “ngāue fakafaifekau ʻa e mēmipá,” ka ko ha tōʻonga moʻui ʻo e ʻofá mo e loto ke tokoniʻi kinautolu ʻi hotau ʻātakaí.
I.
ʻI he ofi ke ʻosi e ngāue hotau Fakamoʻui ko Sīsū Kalaisí ʻi he māmaní, naʻá Ne fekau ʻEne kau ākongá: “Ko ia ke ’alu ’a kimoutolu, ’o fakalotu’i ’a e ngaahi pule’anga kotoa pē” (Mātiu 28:19) pea “Mou ʻalu ki māmani kotoa pē, ʻo malanga ʻaki ʻa e ongoongoleleí ki he kakai fulipē” (Maʻake 16:15). ʻOku moʻulaloa e kau Kalisitiane kotoa ki he fekau ko ʻeni ke vahevahe e ongoongoleleí ki he kakai kotoa pē. ʻOku ui ʻe ha kakai tokolahi ʻeni “ko e fekau lahí.”
Hangē ko hono fakamatalaʻi ʻe ʻEletā Niila L. ʻEnitasoni he fakataha pongipongí, ʻoku kau e Kāingalotu ʻo e Siasí he kakai ʻoku nau mateakiʻi moʻoni e fatongiá ni. ʻOku tonu pē ia ke pehē he ʻoku tau ʻilo e ʻofa ʻa e ʻOtuá ki Heʻene fānaú kotoa pea ʻi he ʻaho fakaʻosí ni naʻá Ne fakafoki mai ha ʻilo mahuʻinga lahi mo e mālohi ke tāpuekina kotoa kinautolu. Ne akoʻi ʻe he Fakamoʻuí ke tau ʻofa he taha kotoa he ko hotau kāinga, pea ʻoku tau fakaʻapaʻapaʻi e akonaki ko iá ʻaki hono vahevahe e fakamoʻoni mo e pōpoaki ʻo e ongoongolelei kuo toe fakafoki maí ki he “ngaahi puleʻanga, ngaahi faʻahinga, ngaahi lea, mo e kakai kotoa pē” (T&F 112:1). Ko ha konga mahuʻinga ʻeni ʻo e hoko ko ha Kāingalotu ʻo e Siasí. ʻOku tau ʻilo ko ha faingamālie fakafiefia ʻeni. Ko e hā mo ha toe meʻa fakafiefia ange ka ko hono vahevahe e moʻoni taʻengatá ki he fānau ʻa e ʻOtuá?
ʻOku tau maʻu he ʻahó ni ha ngaahi maʻuʻanga tokoni lahi ke vahevahe atu ai e ongoongoleleí, ne ʻikai maʻu ia ʻe he ngaahi toʻu tangata ki muʻá. ʻOku tau maʻu e TV, ʻinitanetí, mo e ngaahi sēnolo he mītia fakasōsialé. ʻOku lahi ha ngaahi pōpoaki mahuʻinga ke fakafeʻiloakiʻaki e ongoongolelei kuo toe fakafoki maí. ʻOku ʻiloa e Siasí ʻi ha ngaahi puleʻanga lahi. ʻOku tupu fakautuutu e tokolahi ʻetau kau faifekaú. Ka ʻoku tau fakaʻaongaʻi nai e ngaahi maʻuʻanga tokoni ko ʻení ki he lahi tahá? ʻʻOku ou tui ko e tokolahi ʻo kitautolú te tau pehē mai, ʻikai. ʻOku tau fakaʻamu ke toe lelei ange hono fakahoko hotau fatongia fakalangi ko hono malangaʻi ʻo e ongoongolelei kuo toe fakafoki maí ki he māmaní hono kotoa.
ʻOku lahi ha ngaahi fakakaukau lelei ki hono vahevahe ʻo e ongoongoleleí ʻe ngāue lelei ia ki he ngaahi siteiki pe fonua fakafoʻituitui. Neongo ia, koeʻuhi ko ha Siasi fakamāmani lahi kitautolu, ʻoku ou loto ke ʻoatu ha ngaahi fakakaukau ʻe ngāue lelei ʻi ha faʻahinga feituʻu pē, mei he ʻiuniti foʻou tahá ki he ʻiuniti kuo fuoloa hono fokotuʻú, mei he anga fakafonua ʻoku nau tali lelei e ongoongolelei ʻo Sīsū Kalaisí ki he ngaahi anga fakafonua mo e puleʻanga ʻoku kei fehiʻa ki he siasí. ʻOku ou fie lea ki he ngaahi fakakaukau ʻe lava ke ke vahevahe mo kinautolu ʻoku tui mateaki kia Sīsū Kalaisí, kae pehē ki he niʻihi ʻoku teʻeki ai pē ke nau fanongo ʻi Hono huafá, kae ʻumaʻā e niʻihi oku fiemālie pē heʻenau moʻui lolotongá, kau ai mo kinautolu ʻoku feinga tavale ke fakalakalaka ʻenau moʻuí.
Ko e hā te u lea ʻaki ke tokoni ki hoʻo vahevahe e ongoongoleleí, ʻo tatau ai pē pe ko e hā ho tūkungá? ʻOku tau fie maʻu ke tokoni e kāingalotú kotoa, pea ʻe lava ke tokoni e mēmipa kotoa pē, he ʻoku lahi e ngāue ke fai ʻi heʻetau vahevahe e ongoongolelei kuo toe fakafoki maí ki he puleʻanga, faʻahinga, lea, mo e kakai kotoa pē.
ʻOku tau ʻiloʻi kotoa e mahuʻinga ke kau mai e kāingalotú he ngāue fakafaifekaú ke fakatou lava ai e fakauluí mo e pukepuké. Naʻe pehē ʻe Palesiteni Tōmasi S. Monisoni: “Ko e taimi ʻeni ki he kāingalotú mo e kau faifekaú ke nau ngāue fakataha … [ʻi he] ngoue vaine ʻa e ʻEikí ke ʻomi e ngaahi laumālié kiate Ia. Kuó Ne teuteu ʻa e founga ke tau vahevahe atu ai e ongoongoleleí ʻi ha ngaahi founga lahi, pea te Ne tokoni ʻi heʻetau ngāué ʻo kapau te tau ngāue ʻi he lototui ke fai ʻEne ngāué.”1
Ko hono vahevahe atu ʻo e ongoongolelei kuo toe fakafoki maí, ko hatau tufakanga mo e faingamālie faka-Kalisitiane ia ʻoku fai he kotoa ʻetau moʻuí. Naʻe fakamanatu mai ʻe ʻEletā Kuenitini L. Kuki kiate kitautolu, “Ko e ngāue fakafaifekaú ʻoku ʻikai ko ha konga pē ia ʻe taha ʻo e ongoongoleleí; ka ko ha konga mahuʻinga ia ke tukutaha ai e tokangá he kotoa ʻetau moʻuí kapau ʻoku tau loto ke fenāpasi ʻetau moʻuí mo ʻetau tukupā ki he moʻui faka-Kalisitiané mo e ongoongolelei ʻo Sīsū Kalaisí.”2
II.
ʻOku ʻi ai ha meʻa ʻe tolu ʻe lava ke tokoni ai e kāingalotu kotoa pē ki hono vahevahe ʻo e ongoongoleleí, ʻo tatau ai pē ko e hā e tūkunga ʻenau moʻuí mo e ngāué. ʻOku totonu ke tau fai kotoa e ʻu meʻá ni.
ʻUluakí, te tau lava ʻo lotua ke maʻu e holi ke tokoni ʻi he konga mahuʻinga ko ʻeni ʻo e ngāue ʻa e fakamoʻuí. Ko e ngāue kotoa pē ʻoku kamata ʻaki ha holi.
Uá, te tau lava ʻo tauhi e ngaahi fekaú. Ko e kāingalotu faivelenga mo talangofuá ʻa e kau fakamoʻoni lelei taha ki he moʻoní mo fakamahuʻingaʻi e ongoongolelei kuo toe fakafoki maí. Ka ʻoku mahuʻinga ange ke maʻu maʻu pē ʻe he kāingalotu faivelengá Hono Laumālié, ʻo tataki kinautolu ʻi heʻenau feinga ke kau ʻi he ngāue maʻongoʻonga ko hono vahevahe ʻo e ongoongolelei ʻo Sīsū Kalaisi kuo toe fakafoki maí.
Tolú, te tau lava ke lotua ha tataki fakalaumālie ki he meʻa te tau lava ʻo fai ʻi hotau tūkunga fakafoʻituituí ke vahevahe ai e ongoongoleleí ki he niʻihi kehé. ʻOku kehe ʻeni mei hono lotua e kau faifekaú pe lotua e meʻa ʻe lava ke fai ʻe he niʻihi kehé. ʻOku totonu ke tau lotua e meʻa te tau lava ke fai fakatāutahá. ʻI heʻetau lotú, ʻoku totonu ke tau manatuʻi ko e faʻahinga lotu ko ʻeni ke maʻu ha tataki fakalaumālié, ʻe tali ia kapau ʻoku ʻalu fakataha mo ha tukupā—ko e meʻa ʻoku ui ʻe he folofolá ko e “loto fakamātoato” pe ʻi he “loto moʻoni.” Lotu mo tukupā ke ngāue ʻo fakatatau ki he ueʻi te ke maʻú, ʻo palōmesi ki he ʻEikí kapau te Ne ueʻi koe ke ke lea ki ha taha ʻo kau ki he ongoongoleleí, te ke fai ia.
ʻOku tau fie maʻu e tataki ʻa e ʻEikí koeʻuhí ʻe ʻi ai ha niʻihi ʻe mateuteu pe ʻikai mateuteu ki he ngaahi moʻoni makehe ʻo e ongoongolelei kuo toe fakafoki maí. ʻOku ʻikai totonu ke tau fakamaauʻi pe ko hai kuo mateuteu pe ʻikai mateuteu ke tali e ongoongoleleí. ʻOku ʻafioʻi ʻe he ʻEikí e loto kotoa ʻo ʻEne fānaú, pea kapau te tau lotua ha tataki fakalaumālie, te Ne tokoniʻi ke tau ʻiloʻi ha taha ʻokú Ne ʻafioʻi “kuo teuteuʻi … ke fanongo ki he folofolá” (ʻAlamā 32:6).
ʻI heʻeku hoko ko ha ʻAposetolo ʻa e ʻEikí, ʻoku ou kole ki he mēmipa mo e fāmili kotoa ʻi he Siasí ke lotu ki he ʻEikí ke tokoni ke nau ʻilo e kakai kuo mateuteu ke tali e pōpoaki ʻo e ongoongolelei ʻo Sīsū Kalaisí. Naʻe fai mai ʻe ʻEletā M. Lāsolo Pālati e faleʻi mahuʻinga ko ʻení, ʻa ia ʻoku ou tui ki ai: “Falala ki he ʻEikí. Ko Ia ʻa e Tauhi Sipi Leleí. ʻOkú Ne ʻafioʻi ʻEne fanga sipí. … Pea kapau ʻoku ʻikai ke tau kau ki ai, ʻe fakalaka ia ʻi ha tokolahi ʻo kinautolu ne nau mei fanongo ki he pōpoaki ʻo e Fakafoki mai e ongoongoleleí. … ʻOku mahinongofua pē ʻa e ngaahi tefitoʻi moʻoní—lotu, fakatāutaha pea mo fakafāmilí, ke maʻu ha ngaahi faingamālie ngāue fakafaifekau.”3 ʻI heʻetau fakahaaʻi ʻetau tuí te tau maʻu ha ngaahi faingamālie taʻe “fakakounaʻi … pe ha tali pau. Te nau hoko fakanatula pē koeʻuhi ko ʻetau ʻofa ʻi hotau kāingá.”4
ʻOku ou ʻilo ʻoku moʻoni ʻeni. ʻOku ou palōmesi atu kapau te tau tui ki he tokoni ʻa e ʻEikí, ʻe tataki mo ueʻi kitautolu pea te tau maʻu ha fiefia lahi ʻi he ngāue mahuʻinga taʻengata ko ʻeni ʻo e ʻofá. ʻE toki mahino kiate kitautolu ʻoku tupu e lavameʻá ʻi hono vahevahe ʻo e ongoongoleleí, pea ʻi hono fakaafeʻi e kakaí ʻi he ʻofa mo e loto moʻoni ke tokoniʻi kinautolu ʻo tatau ai pē pe ko e hā ʻenau talí.
III.
Ko ha ngaahi meʻa kehe ʻeni te tau lava ʻo fai ke ola lelei ange ai hono vahevahe ʻo e ongoongoleleí.
-
ʻOku fie maʻu ke tau manatuʻi “ʻoku toki ako e kakaí he taimi ʻoku nau mateuteu aí, kae ʻikai ko e taimi ʻoku tau mateuteu ai ke akoʻi kinautolú.”5 Ko e meʻa ʻoku tau tokanga ki aí, hangē ko e ngaahi akonaki fakatokāteline mahuʻinga ʻo e Siasi kuo toe fakafoki maí, ʻoku ʻikai ko e meʻa ia ʻoku tokanga ki ai e niʻihi kehé. ʻOku ʻi ai ha niʻihi kehe ʻoku nau fie maʻu pē e ola ʻo e tokāteliné, kae ʻikai ko e tokāteliné. ʻI heʻenau fakatokangaʻi pe aʻusia e ola ʻo e ongoongolelei ʻo Sīsū Kalaisi kuo toe fakafoki maí ʻi heʻetau moʻuí, ʻoku nau ongoʻi ai e Laumālié pea kamata ke nau tokanga ki he tokāteliné. Mahalo te nau toki tokanga mai ʻi heʻenau fekumi ki ha fiefia lahi angé, ofi ki he ʻOtuá, pe maʻu ha mahino lahi ange ki he taumuʻa ʻo e moʻuí.6 Ko ia ai, kuo pau ke tau fekumi fakalelei mo lotua ke maʻu e founga ke ʻiloʻi e taimi ʻoku fie ako lahi ange ai ha tahá. ʻE makatuʻunga ʻeni ʻi ha ngaahi meʻa kehekehe, hangē ko e tūkunga lolotonga ʻo e tokotahá mo e anga ʻetau feohi mo iá. Ko ha kaveinga lelei ʻeni ke aleaʻi ʻi he fakataha alēleá, kōlomú, mo e Fineʻofá.
-
ʻI heʻetau lea ki he niʻihi kehé, ʻoku fie maʻu ke tau manatuʻi ko e fakaafe ko ia ke ako lahi ange kia Sīsū Kalaisi mo ʻEne ongoongoleleí, ʻoku lelei ange ia ʻi he fakaafe ke ako lahi ange ki hotau Siasí.7 ʻOku tau loto ke ului e kakaí ki he ongoongoleleí. Ko e fatongia maʻongoʻonga ia ʻo e Tohi ʻa Molomoná. ʻOku toki maʻu ʻe ha taha ha ongo ki hotau Siasí hili ʻene ului kia Sīsū Kalaisí; ka ʻoku ʻikai hoko ia ki muʻa. Neongo ʻoku ʻi ai ha tokolahi ʻoku nau huʻuhuʻu ki ha ngaahi tui fakalotú ka ʻoku nau maʻu ha ʻofa ki he Fakamoʻuí. Fakamuʻomuʻa e meʻa mahuʻingá.
-
ʻI heʻetau feinga ke fakafeʻiloaki e kakaí ki he ongoongolelei kuo toe fakafoki maí, ʻoku totonu ke tau fai ia ʻi ha founga ʻoku totonu pea ʻi he ʻofa moʻoni ki he tokotaha fakafoʻituituí. ʻOku hoko ʻeni heʻetau feinga ke tokoniʻi e niʻihi kehé ʻi heʻenau ngaahi palopalemá pe taimi ʻoku tau ngāue ai mo kinautolu he ngaahi ngāue tokoni fakakoló, hangē ko hono fakafiemālieʻi e faingataʻaʻiá, tokangaʻi e masivá mo e tukuhausiá, pe fakaleleiʻi e tuʻunga moʻui ʻa e niʻihi kehé.
-
ʻOku ʻikai totonu ke fakangatangata pē ki hotau kaungāmeʻá mo e kaungā ngāué, ʻa ʻetau feinga ke vahevahe e ongoongoleleí. Ne mau ʻilo ha fakaʻuli tekisī Siasi ʻi Lio ti Sinilo he Sipoti ʻOlimipikí naʻe ʻalu holo mo ha ngaahi tatau ʻo e Tohi ʻa Molomoná ʻi ha lea fakafonua ʻe fitu ʻo tufa ki ha taha pē te ne fie maʻu. Naʻá ne ui ia ko e “fakaʻuli tekisī ngāue fakafaifekaú.” Naʻá ne pehē, “Ko [hoku] malaʻe ngāue fakafaifekaú … e ngaahi hala ʻo Lio ti Siniló.”8
Ne pehē ʻe Keleitoni M. Kulisiteniseni, ʻa ia ʻoku lahi ʻene aʻusia heʻene hoko ko ha mēmipa faifekaú, “ne mau fakatokangaʻi he taʻu ʻe uofulu tupu kuohilí ʻa e ʻikai ke fengāueʻaki lelei e vā fetuʻutakí mo e ngalingali tokanga ʻa ha taha ke ako ki he ongoongoleleí.”9
-
ʻE lava ke palani ʻe he kau pīsopeliki ʻo e uōtí ha houalotu sākalamēniti makehe pea kole e kāingalotú ke ʻomi ki ai ha taha ʻe fie ako ki he ongoongoleleí. ʻE vēkeveke e kāingalotu ʻo e uōtí ke ʻomai honau ngaahi mahení ki ha fakatahaʻanga peheni koeʻuhí he ʻoku nau ʻiloʻi pau ʻoku palaniʻi lelei e fakatahaʻangá ke tupu ai ha fie ʻilo ki he ongoongoleleí mo fakafofongaʻi lelei e Siasí.
-
ʻOku ʻi ai ha ngaahi faingamālie lahi ke vahevahe e ongoongoleleí. Hangē ko ʻení, ne u maʻu ha tohi fiefia he faʻahitaʻu māfana ko ʻení mei ha mēmipa foʻou naʻá ne ako e ongoongolelei kuo toe fakafoki maí ʻi ha telefoni ange hano kaungā ako ʻo ʻeke hono puké. Naʻá ne tohi ʻo pehē: “Ne u fiefia he anga ʻene fakafōtunga mai kiate aú. Ne papitaiso au hili [ha] māhina siʻi hono akoʻi au ʻe he faifekaú. Kuo tupulaki ʻeku moʻuí talu mei he meʻá ni.”10 ʻOku tau ʻiloʻi kotoa ʻe lava ke fakatupulaki e ngaahi moʻui lahi ʻe he ongoongolelei kuo toe fakafoki maí. ʻOku tau tokoniʻi nai kinautolu?
-
ʻOku maʻu ha faingamālie makehe ʻe he kāingalotu kei talavoú heʻenau manako mo taukei he mītia fakasōsialé, ke tokoniʻi e niʻihi kehé ke nau saiʻia he ongoongoleleí. ʻI hono fakamatalaʻi e hā ʻa e Fakamoʻuí ki he kau Nīfaí, ne hiki ai ʻe Molomona ʻo pehē, “Naʻá ne akoʻi mo tauhi ki he fānaú … , pea naʻá ne vete ange honau ʻeleló … ke nau lea” (3 Nīfai 26:14). ʻI he ʻaho ní, ʻoku ou tui te tau pehē ʻe “vete ange honau [tuhú] ka nau lava ʻo lea.” Fai leva ia toʻu tupu!
ʻOku ʻikai ko ha kavenga hono vahevahe e ongoongoleleí ka ko ha fiefiaʻanga. ʻOku ʻikai ko ha polokalama e meʻa ʻoku tau ui ko e “ngāue fakafaifekau ʻa e mēmipá,” ka ko ha tōʻonga moʻui ʻo e ʻofá mo e loto ke tokoniʻi kinautolu ʻi hotau ʻātakaí. Ko ha toe faingamālie ke fakamoʻoniʻi e ongo ʻoku tau maʻu ki he ongoongolelei ʻa hotau Fakamoʻuí kuo toe fakafoki maí. Ne akoʻi ʻe ʻEletā Pālati, “Ko e fakamoʻoni mahuʻinga taha ʻo ʻetau uluí mo e ongo ʻoku tau maʻu ki he ongoongoleleí ʻi heʻetau moʻuí, ko ʻetau loto ko ia ke vahevahe ia ki he niʻihi kehé.”11
ʻOku ou fakamoʻoni kia Sīsū Kalaisi, ko e Maama mo e Moʻui ʻo e Māmaní (vakai, 3 Nīfai 11:11). ʻOku hanga ʻe he maama ʻo ʻEne ongoongolelei kuo toe fakafoki maí, ʻo tataki ʻetau fononga fakamatelié. ʻOku fakapapauʻi mai Heʻene Fakaleleí ʻa e moʻui hili e maté mo e mālohi ke tuiaki ki he moʻui taʻe-faʻa-maté. ʻOku ʻomi Heʻene Fakaleleí kiate kitautolu ha faingamālie ke fakamolemoleʻi ʻetau angahalá, pea maʻu e moʻui taʻengatá ʻi he palani nāunauʻia ʻo e fakamoʻuí ʻa e ʻOtuá, ʻa ia ko e meʻaʻofa “mahuʻinga taha ia he ngaahi meʻaʻofa kotoa pē ʻa e ʻOtuá” (D&C 14:7). ʻI he huafa ʻo Sīsū Kalaisí, ʻemeni.