Fakataukei Fakatokāteliné

ʻI he ʻahó ni ʻi he māmani ʻo e maʻu vave e fakamatala ʻInitanetí, ʻoku ʻikai toe mamaʻo ai e toʻu tupú mei he kakai ʻoku nau ʻohofi e Siasí. Ka ʻoku ʻi ai ha polokalama foʻou ʻoku ui ko e Fakataukei Fakatokāteliné, ke tokoni ki he fānaú ke nau fakatupulaki ha mahino lahi ange ki he tokāteline ʻo e ongoongoleleí pea mo fakatupulaki ʻenau tui kia Sīsū Kalaisí.

ʻOku ako foki e fānau akó ki he founga ke nau tali ai ha ngaahi fehuʻi faingataʻa kae pehē ki ha ngaahi kaveinga ʻaki ʻenau ngāue ʻi he tuí, vakavakaiʻi e ngaahi tafaʻakí mo e ngaahi fehuʻí ʻi ha vakai mei he tafaʻaki ʻo e taʻengatá, pea feinga ke maʻu ha mahino lahi ange ʻo fakafou ʻi he ngaahi maʻuʻanga tokoni fakalangí.

ʻI ha lea ʻa ʻEletā M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ki he kau ngāue ʻo e Seminelí mo e ʻInisititiutí, ʻo fekauʻaki mo e Fakataukei Fakatokāteliné, naʻá ne pehē ai: “Ko ha polokalama ʻeni kuo ueʻi fakalaumālie mo taimi totonu. Te ne takiekina lelei hotau toʻu kei talavoú.”

Ko e tefitoʻi kaveinga ʻo e Fakataukei Fakatokāteliné ke tokoniʻi e fānau akó ke:

1. Maʻu ʻa e ʻIlo Fakalaumālié.

2. Taukei ʻi he tokāteline ʻo e ongoongoleleí pea mo e ngaahi potufolofola ʻoku akoʻi ai e tokāteline ko iá.

Naʻe faʻufaʻu ia mei he meʻa ne ʻosi lavaʻi ʻo fakafou ʻi he Fakataukei Folofolá, pea ʻoku lava ʻa e fānau akó ʻi he founga loloto ange ko ʻení, ke fakamālohia ʻenau uluí mo e tukupā ko e ākonga ʻo Sīsū Kalaisí, maʻu ha maluʻi mei he ngaahi ivi takiekina ʻo e filí pea mo faitāupekina e moʻui ʻa e niʻihi kehé.

ʻE lava ke maʻu e ngaahi maʻuʻanga tokoni ki he Fakataukei Fakatokāteliné ʻi he lds.org/si/seminary/manuals.