Mensahe sang Unang Panguluhan, Enero 2017
Pagpunteriya sa Sentro
Ni Pangulong Dieter F. Uchtdorf
Ikaduhang Manuglaygay sa Unang Pangulohan
Sang sini lang, nagtan-aw ako sang grupo sang mga tawo nga nagapraktis sang kinaadman sa pagpana. Sa pagtan-aw lang, nangin klaro sa akon nga kon gusto mo gid makabisado ang pana kag baslay, kinahanglan ang tiyempo kag praktis.
Daw indi mo gid maangkon ang reputasyon sang katanda sa pagpana paagi sa pagtiro sang blangko nga pader kag dayon drowingan sang mga target ang palibot sang mga baslay. Kinahanglan mo matun-an ang kinaadman sa pagpangita sang target kag pagsakam sini sa tunga.
Pagpinta sang mga Target
Ang pagtiro una kag pagdrowing sang target pagkatapos tiro daw kahalam-utan, pero kon kaisa kita mismo ang nagapakita sang amo sina nga pagginawi sa iban nga sirkumstansya sang kabuhi.
Bilang mga miyembro sang Simbahan, may huyog kita kon kaisa nga iangot ang aton kaugalingon sa mga programa sang ebanghelyo, mga isyu, kag bisan pa gani sa mga doktrina nga daw nakakuha sang aton interes, importante, ukon masadya para sa aton. Nagakatentar kita nga magdrowing sang mga target sa palibot sang mga ini, nga nagapapati sa aton nga nagapunteriya kita sa sentro sang ebanghelyo.
Mahapos lang ini himuon.
Sa tanan nga panahon nakabaton na kita sang maayo gid nga mga laygay kag inspirasyon gikan sa mga propeta sang Dios. Nagabaton man kita sang direksyon kag pagpaathag gikan sa pila ka mga balasahon, mga libro nga gabayan, kag manwal sang Simbahan. Madali naton nga pilion ang aton paborito nga topiko sang ebanghelyo, magdrowing sang iliguan sa palibot sini, kag magsiling nga nakita naton ang sentro sang ebanghelyo.
Ang Manluluwas Nagaklaro
Indi ini problema nga makita lang sa aton panahon. Sang dumaan nga panahon, ang relihiyoso nga mga lider naghinguyang sang dako kaayo nga tiempo sa pagkalaging, pagpasunod, kag pagdebate kon diin sa ginatos ka mga kasuguan ang pinakaimportante.
Isa ka adlaw, isa ka grupo sang mga mangin-alamon sa relihiyon ang nagtinguha nga ganuyon ang Manluluwas sa amo nga kontrobersiya. Ginhangkat nila Sia nga magtugda sa isa ka isyu nga diutay lang ang nagasugtanay.
“Manunudlo,” pamangkot nila sa Iya, “ano bala ang dakung sugo sa kasuguan?”
Nahibaluan naton tanan kon paano nagsabat si Jesus: “Higugmaa ang Ginuo nga imo Dios sa bug-os mong tagipusuon, kag sa bug-os mong kalag, kag sa bug-os mong hunahuna.
“Ini amo ang dako kag nahaunang sugo.
“Kag ang ikaduha kaangay sa sini, Higugmaa ang imo isigkatawo subong sa imo kaugalingon.
“Sa sining duha ka sugo natingob ang bug-os nga kasuguan kag ang mga manalagna.”1
Palihog tandai ang ulihi nga ginhambal: “Sa sining duha ka sugo natingob ang bug-os nga kasuguan kag ang mga manalagna.”
Ang Manluluwas wala lamang nagpakita sa aton sang target, pero ginpakita Niya ang pinakasentro.
Pag-igo sang Target
Bilang mga miyembro sang Simbahan, nakigsaad kita nga dalhon naton sa aton kaugalingon ang ngalan ni Jesucristo. Kalakip sa sinang saad amo ang paghangop nga tinguhaan naton nga hibaluon ang parte sa Dios, palanggaon Sia, patubuon ang aton pagtuo sa Iya, dayawon Sia, magsunod sa Iya banas, kag magtindog sing mabakod bilang mga saksi Niya.
Mas labi nga matun-an naton ang parte sa Dios kag mabatyagan ang Iya pagpalangga sa aton, mas marealisar naton nga ang wala’y katapusan nga sakripisyo ni Jesucristo isa ka langitnon nga dulot sang Dios. Ang Dios nagapapagsik sa aton nga gamiton ang banas sang matuod nga paghinulsol, nga nagatuytoy padulong sa milagro sang kapatawaran. Ang ini nga proseso nagatugot sa aton nga mag-angkon sang mas dako nga pagpalangga kag kaluoy para sa mga yara sa aton palibot. Matun-an naton nga indi pagtalupangdon ang mga tatak. Mapakigbatuan naton ang tentasyon nga akusaron ukon hukman ang iban sa ila mga sala, kakulangan, musing, politikal nga pagpili, pagpati sa relihiyon, rasa, ukon kolor sang panit.
Makita naton ang tagsa nga masugata naton bilang anak sang aton Amay nga Langitnon—aton utod nga lalaki ukon babayi.
Magadab-ot kita sa iban nga may pag-intiende kag pagpalangga—bisan pa yadtong mga indi mahapos palanggaon. Magapangasubo kita upod sadtong mga nagapangasubo kag magpaumpaw sadtong mga nagakinahanglan sang kaumpawan.2
Kag matun-an naton nga indi kita kinahanglan magpalibog parte sa husto nga target sang ebanghelyo.
Ang duha ka dalagko nga kasuguan amo ang target. Sa sining duha ka sugo natingob ang bug-os nga kasuguan kag ang mga manalagna.3 Sa pagbaton naton sini, ang tanan nga iban pa nga maayo nga mga bagay maplastar lang sa ila husto nga lugar.
Kon ang aton mayor nga ginatutukan, panghunahuna, kag pagpanikasog nakatuon sa pagpadugang sang aton pagpalangga sa Gamhanan nga Dios kag sa pagbukas sang aton tagipusuon sa iban, mahibaluan naton nga nasalapuan naton ang husto nga target kag nagapunteriya kita sa pinakasentro—ang mangin tunay nga mga sumulunod ni Jesucristo.
© 2012 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, January 2017. Hiligaynon. 97921 861
Pagtudlo gikan sa Sining Mensahe
Antes ipaambit ang ining mensahe, mahimo ninyo kantahon ang “Our Savior’s Love” (Hymns, no. 113). Dayon binag-binaga ang pagpaisog sadtong inyo ginabisita nga hunahunaon ang mga “target” sa ila kaugalingon nga mga kabuhi. Mahimo ninyo hambalan ang mga paagi agud siguruhon nga ang duha ka dalagko nga kasuguan—nga “Higugmaa ang Ginuo nga imo Dios” kag “Higugmaa ang imo isigkatawo subong sa imo kaugalingon” (tan-awa sa Mateo 22:37, 39)—amo ang pirme nagagiya sang ila mga buhat. Mahimo man kamo magpaambit sang mga paagi kon paano ninyo gintutok ang inyo mismo kabuhi kay Cristo kag magpaambit sang panaksihon kon paano ini nagbugay sa inyo.